АВАНЕНЬ

Пек тень паро, нетян, зярдо

Лембе мизолкссо тон палат.

Сельмстэть пуркси сиянь валдо,

Пингень перть те валдонть валат.

Истя саевсь эйкакш пингстэ:

Кува молян, кува чиян,

Яла мелявкст кирдят мельсэ:

Аволь лисе мартон зыян.

Шказо мольсь, мон вана касынь,

Эрян ёнсто, шумбрачисэ.

Паро ялга эстень вастынь,

Тонеть — мелявкст кавтонь кисэ.

Эрьва косо, эрьва чистэ

Минек кувалт седей керят.

Авай, ёвтак монень витьстэ:

Зярдо эсь прят кисэ эрят?