Маштозь эрзянтень

Тонь маштыдизь Чечнясо, эрзянь цёра.
Кувать пильгеть кельмевкс моданть вацорясть,
Од, виев рунгот кодаяк эзь нолда ойменть…
Кундатозь кельсэть, улема,
Рангстыть – «Ав-вай…» эли « Ма-мма…»
Кодамо кельсэ? Арсян – рузонь… Рузокс…
Ды кадык те… Ёвтак! Тон мезень кис
Кадык эсь Масторот урозокс?!

Кода тон прыть, кияк эзинзеть нее,
Пингеде-пингес ней кадовсть теветь - апак тее…
Чопода пеленть экшстэ ковось лиссь,
Неизе сон, сезнезь мештесэнть – вересь пись.
Каштмольсь чеченэнь модась…
Лангсонзо – эрзянь цёрась, кунст празь аштесь…

Истяня ютась весь…
Эзть марявт леднематне,
Пелезь-пелезь, кармасть лиснеме ломантне,
Конат исяк кекшнесть.
А сэрей, вишка кудынестэнть лисекшнэсь ава…
Тандадозь, сон сеске сёлгизе кенкшкенть:
Кардайсэнть – чавозь ят!
Мартонзо тейнемс мезть?!!
Лисни, маризе Паз-Аллахось озноманзо,
Зярдо пельдензэ вешсь сон куломат
Сетненень, ки исяк
Маштызе вечкевикс цёранзо?
Сельведть чудезевсть, повасть ниреждематне,
Кежесь пандовсь!
Пандовсь шкань апак сацтне!

Ней авась лиссь варштамо,
Кинь Аллахось саизе пандовксокс цёранзо кис?
Сэньшт сельме цёра, ашо пря… Неяви – руз!
Аванть седейсэ – кеж кецямо!
Таргизе зепстэнзэ ушман лопанть –
Сась мелезэ маштозенть лемензэ содамо.
Ловны: «мордвин»… Ризаев…
Те кие сон? Лисни, манявсь Аллахось?
Аволь ят раськень цёрась?
Кода сон понгсь тезэнь?
Сон косто тезэнь паневсь?
Эзь марсе чеченавась зярдояк
Эрзянь раськеденть,
Секс лавшомтызе сювордазь
Коськана кеденть.
Велявтсь ды тусь, совась кудонтень,
Кадызе маштозенть Аллах Пазонтень…
Чокшнэс арсесь,
Мартонзо мезть ней тейнемс?
Улевель руз – ёртовлизе латконтень…
Ансяк… Сон - аволь руз…
Та-кодамо Ризай…
Ламот Рузонь масторсонть раськеть,
Конань – рамизь, конань – лепштызь,
Эйстэст ней «пидить» пушкань «сывель»…

Зярдо чизэ пандтнэнь удалов валгсь,
Авась таго уловонть малав сась.
Маштозенть понань кумбос тапардызе
Ды пире пес стака канстонть ускизе,
Цёранзо калмонть ваксс…
Кшнинь коймсэ домка калмо чувсь,
Потмаксос коське тикшеть путсь…
Аллахонтень ознозь,
Истя эрзянь цёранть калмизе…

Ней кавто калмот
Чеченаванть пире песэ,
Сон эрьва чистэ састо озны тесэ,
Аллах Пазонтень…
Кадовсь урозокс сыре чеченавась,
Эрзянь Масторсо – аварди эрзявась…

Христосось чавонь мельть верде ваны,
Нишкепазонть умок калмизе,
Мезекс верь каявксонть пурны?
Мейсь эрзянь эрямонть сезизе?

Mashtozj erzänten