Кодамо тантей эрзянь пачалксесь…

Кодамо тантей эрзянь пачалксесь…
Кода качады ансяк педязь ловсось,
Кодамо лембе панезь прякинесь,
Кодат ламбамот авань сюкоронзо…
Лембе варьгатне тонгозь кедезэть,
Лембе кудось, конасонть ават-тетят,
Тия ялгат мартот кепе чийнесть,
Тесэ пильгеть моданть лангс чалгасть…
Кодат тесэ валдот валскеть,
Кодат тердицят чопода чокшнэтне,
Тов, косо рангить веньперть атёкшкеть,
Тов, кува ойметь ливти менель верьга…
Бути чарькодик ойметь мелявксонть,
Бути ванстат седейсэть тиринь авать чаманть,
Сестэ иля стувто эрзянь келенть!
Иля мие эсь Эрзя раськень лементь!

Эрюш Вежай.
Полярной ош, суньдерьков, 2 чи.