КИШТЕМА ЭРЗЯНЬ МОРО

Авай, вирев мон молян,

Тусто вирев мон молян.

Мон молян, мон молян,

Тумо вирев мон молян.

Виде тумине керян,

Кеме чувто сявордан.

Мон керян, мон керян,

Эчке тумо сявордан.

Тумо керенть лаксеса,

Кеме тумонть витнеса.

Витнеса, лаксеса,

Виде тумонть лаксеса.

Кудов тумонть мон кандса,

Чочконть кардазов сайса.

Мон кандса, мон кандса,

Тумонть кардазов сайса.

Кардазом мон пиряса,

Латом чочксо нежедьса.

Нежедьса, нежедьса,

Латонть чочксо нежедьса.

Мазый ортат мон теян,

Келей ортат понгавтан.

Понгавтан, понгавтан,

Мазый ортат понгавтан.

Ялгат инжекс мон тердян,

Оят инжекс серьгедян.

Мон тердян, серьгедян,

Оят-ялгат мон тердян.

Мазый тейтерь никс саян,

Полакс тейтерь мон кочкан,

Мон кочкан, мон кочкан,

Эрзянь тейтерь никс саян.

Карман сонзэ вечкеме,

Эрьва чистэ палсеме,

Палсеме, вечкеме,

Эрьва чистэ палсеме.

Чачты монень сон эйкакшт,

Карматано нурьсемаст.

Нурсемаст, андомаст,

Кадык чачты тень эйкакшт.

Карман парсте эрсеме,

Лавсень морот морсеме,

Морсеме, нурьсеме,

Лавсень морот морсеме.

Карман парсте эрямо,

Улинь-паронь таштамо,

Пурнамо, таштамо,

Карман парсте эрямо.

Эрзянь раськенть кастомо,

Эрзянь келенть ванстомо.

Ванстомо, ванстомо,

Эрзянь раськенть кастомо.

Ламолгады, виеми,

Эрзянь раськесь виеми,

Виеми, келеми,

Эрзянь келесь а ёми.

Эрзят, парсте эрядо,

Парсте, эрзят, эрядо.

Эрядо, эрядо,

Виев раськекс касодо!

Паз чангодть!

Эрюш Вежай, эрзянь раськень морамо лувонь коряс. 2010 ие