***

Ветиця прявтнэ Русенть свал

Келейгавтсть ды кемекстасть яла,

Эзть явше сонзэ палонь-пал

Ды ули-паронзо эзть салавт.

Кода ятнэ пеест эзть порть,

Ансяк виськсчама тенст сатокшнось.

Донской ли, Грозный, эли Петр

Кирдсть кеместэ сювордазь мокшнаст.

Ды мейлеяк – сялдытя тон

Сеть прявтнэнь, конат тензэ сатотсть,

Кинь пингстэ прасть Наполеон

Ды Гитлер, сехте азарсь ятось?

Сонсь пря эзь максне ды лездась

Свал сенень, ки понгонесь зыянс.

Пельсть ятнэ, ялгатне содасть –

Свал венсти оянь кедь Россиясь.

Аволь вейке мастор ванстовсь

Ды виензась флагонзо ало,

Ды эрясть ломантне ды ловсть

Эсь эрямонть уцяскавкс яла.

Но а неявикс давол стясь

Ды яки масторонок ланга.

Идема эйстэнзэ арась –

Эрямонть весе лувонть янги.

Народтнэ овсе стувтызь пряст –

Кармасть пелькстамо ды тюреме.

Сень, мезенть ансяк исяк шнасть,

Кармасть сялдомо ды панеме.

Кияк а кунсолы киньгак –

Гоморра ды содом истямо,

А маштат евтамс валсояк,

Прок сынь састь, меельць читне самай.

Ятонок уш а порить пейть,

Неить: пря чавтано эсь кедьсэ.

Ваныть морянь томбальде тей,

Дивсить тенек ды, нама, кецить.

Ютась шкась, зярдо Русенть ванстасть,

Келейгавтсть ды кемекстасть яла,

Ней сонзэ сезнить панксонь-панкс,

Ды ансяк нузяксось а салы.

Александр Кадоркин

В. Васнецов. Витязь на распутье, 1882