ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Стихи

Александр Арапов. Велявтома
Велявтома
 
Афганистансто
Ардыть цёратне,
Афганистансто…
Вагонсонть кецнить
Кисэст ломантне:
Эзть ёма, ванстовсть.
 
Лыки вагонось…
Вальмало кинень
Аволить кальтне?
Зэрнить стопкатне…
Ды баягинекс
Дильнить медальтне.
 
Дильнить медальтне,
Гайгить баягакс
Масторонь келес —
Содасызь питнест,
Кие т о в якась
Ды т о с т о велявтсь.
 
Мезе нейсть тосо,
Т о с о, войнасо, –
А ёвтамс валсо.
Часияст —
Сынь аволь кандолазсо
Кудов сыть валске.
 
Седяк, гитара!!!
Чарыть, стукадо!!!
Морыть цёратне…
Нусманят морост —
Ойменть а кадыть
Одс ледстнематне.
 
Сельмсэст — сизема,
Стомавкс ды сэредькс.
Ламо а кортыть…
Эх, проводница…
Чарькодть, вадрине, —
Кадык копордыть.
 
Тенст прась часия,
Тенст прась уцяска —
Кадовсть э р я м о!
…Путсызь гитаранть,
Лекстить стакасто,
Лисить таргамо.
 
Кромождозь, састо
Моли сержантось —
Казямо вайгель.
Ды жалязь ладсо —
Чатьмонезь, талнозь, —
Бабинесь айги.
 
Каштансто вакскаст
Юты тейтересь –
Мазыйть пильгензэ.
Эсь вечкевиксэнть
Ледстясы эрьвась,
Эрьвась — э с е н з э.
Седей витить
Эсь масторонь пандтнэ
Ды экше коштось.
Паряк, те он ульнесь —
Сеть дувалтнэ,
Се вачо ошось?
 
Паряк, те он ульнесь —
Сэпей, стака, —
Ливтить пулятне,
Конатне — велькска,
Конатне — вакска,
Седейс конатне?
 
Паряк, те аволь
Сынст марто ульнесь:
А иди Пазось —
Кукорнясь ялгась,
Сэредькстэнть пульзясь,
Палы КАМАЗ-ось?
 
Леднема. Вайгельть.
Чикордыть пейтне.
Тулкадть, пехота!!!
Учи колоннась:
Кись ансяк вейке,
Ковгак а потат.
 
Верь потсо ялгась —
Шинеленть лангсо
Тошки вийтеме:
«Арази, цёрат,
Мон карман калмсо?»
Сон од, а кеми.
 
А он те овсе…
Те ульнесь мартост —
Сеть читне, ветне…
Те весе — а л к у к с!
Сынст верьсэ артозь
Гератонь кевтне.
 
Те сынст пеельсэ,
Пулясо пельнесть —
Седейсэ киксэсь.
Зяро цёрынеть маштовсть…
Кинь кевкстемс:
«Мекс? Мезень кисэ?!»
 
«Мекс? Мезень кисэ?!» —
Авань сельведтнень
А онкстамс сталмост.
Кувакат, тарьксэвть,
Певтеметь ветне –
Цёразо калмазь.
 
Горязо сонзэ
А кельги менельс,
А кельги мештес.
«Жалямак, левкскем…» —
Лайшесь ды энялдсь,
Ды цинкенть эждясь.
 
Те к и н е н ь эрявсь?!
Тов кучизь м е з е к с?
Геройкс улеме?
Штобу тетянстэнь
Сонзэ пря песэ
Прамс кеверькшнеме?
 
Мекс веле ушов
Эйдезэ кандозь?
Ки чумось тесэ?
Кодамо истямо долк
Савсь пандомс
Ломань питнесэ?
 
Седяк, гитара…
Кудов… войнасто
Цёратне ардыть.
А вейке зыян
Эрямстост вастыть…
Паряк, цидярдыть.
 
Ардыть цёратне…
Ансяк а менемс
Се сэпей шкастонть, —
Эсь потсо пинге
Кармить кандтнеме
Афганонь канстонть.
 
Сеть, кинь сынь маштызь,
Кармить сакшномо
Онс, овсе малас…
Душмантнэ ульнесть
Истят жо ломанть,
Сынст учость аваст.
 
А весть цёратне
Кармить рангомо,
Сорномо сэрьсэ —
Мерькавить таркаст,
Валовить оност, —
Вельтявить верьсэ.
 
… Томбалень китне
Тонавтызь ламос.
Сынь содыть седе —
А весть эшкевить
Визькстэме чамас,
Калгодо седейс.
 
Томбалень зыйтесь
Седейстэнть яви
Стакасто, састо…
Эх, проводница…
Тенст кувать сави
Ардомс войнасто.
 
 
Категория: Стихи | Добавил: tati (22.09.2010)
Просмотров: 957 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz