МОРО САНЯДО

Эрьва мезе ули! Натой кши,

Натой ули чурьканок пей алов.

Бутылканок одирьвакс ашти —

Саня нацяс чопавтнесь аксялов.

Стопканть — верев! Эно минек кис!

А сэредемс тенек, а сыредемс!

Секень кис — илязо сялго пштикс —

Эряви аламодо иредемс.

Кавто Санят, кавто кепе прят,

Минь карадо каршо аштетяно.

Суликанок — стядо, апак прядт,

Стопказонок ковось верде ваны.

Ансяк Саня нусмакадсь, ванан,

Копорды ды прясонзо чаравты.

Чатьмонян ды сельмен мон конян,

Мон чарькодян, мезде сон мелявты.

— Весе юты, Саня! Лоткак… брось!

Ансяк содан — мезеськак а юты.

Эрьва фотось, косо сон матрос,

Седейстэнзэ панкс верь марто луты.

Морянь шалтось сакшны тензэ онс…

Госпиталень седей тарькст-якшамот…

Ков понгонесь, алуж, арсек тонсь —

Тосто живстэ велявтнить аламот.

Элезэнзэ саи сон баян —

Теке эйкакш, пеняци баянось:

«Косат, косат, ялгам монь Иван?

Косо, косо морясь-океанось?»

Морянь таркас икелензэ — сёлт,

Портось — пире песэ калмазыресь…

Вальмасонзо валскес палыть толт,

Кувси Саня марто Жилин виресь.

Увны вармась, ризксэнть ушов тарги.

Киненьгак тень неемс а эряви,

Кода Саня ськамонзо аварди

Ды кияксонть мокшнасонзо чави.

Кенкшезэ панжадо келес свал —

Ки симеме сови, ки — истяко.

Весе содыть — Саня муи вал,

Лембе вал сон муи, кинень стака.

Сон истямо — соды ломань кой,

Сон истямо — мари ломань сэредькс.

Саня, сон — л о м а н е н ь,

Cон — «Людской»,

Нать, а стяко истя тензэ мерить.

Эх, эрямо! Мезе ней теят,

Ломаненть сон нарьги эрьва кода.

Ялатеке кецнят: зярс лексят,

Зярс эзинзеть сае кельме мода!

Стопканть — верев! Эно минек кис!

А сэредемс тенек, а сыредемс!

Секень кис — илязо сялго пштикс —

Эряви аламодо иредемс.