***

Гитарам, ялгам, ладсицям умонь,

Мои кедезэнь тонь саитинь а стяко.

Гитарам, ялгам, таго идят монь,

Тон ськамот содат, кода монень стака.

Моронок валдо, сон терди васов...

Ков-бути мартот пачкодтяно вейсэ...

Тон таго таргик седеем ушов,

Ансяк а содан, ков мон сонзэ тейса.

Седяк, гитарам! Вейсэтяно минь!

Те чокшнесь — минек! Сон эйсэнек вечки!

Седик сеньгак, мезес исяк кеминь!

Седик сеньгак, мезес а кеман течи!

Седик се варманть, конась монь манчи,

Менеленть, тешттнень, а солыця эенть,

Конась кельмевти эйсэнь эрьва чи

Ды кевекс лепшти сорныця седеенть!

Вайгелеть эйсэ талнома марян.

Сон истямо, кодамо монь видькстамось:

Те шкас а содан, кода мон эрян,

Те шкас а содан, кие мон истямось...

Гитарам, ялгам, таго идят монь,

Тон ськамот содат, кода монень стака.

Гитарам, ялгам, ладсицям умонь,

Моронок лиссь нусманя ды кувака...