Петряйкин Сегань эрямосто
Сеганень топодсть
кемнилее иеть. Сон сэрей ды превей, сювасо а манясак. Вечки ловномо ды ванномо
ниндзятнень. Седе пек вечки ярсамо: бутербродт, костязь кшинеть, чипсат – сонзэ
свалшкань каванямказо.
А вечки сёрмадомо диктант ды тонавтнеме стихотвореният.
Ванкшны свал географиянь
атласонть лангс, конась понгавтозь удома тарканзо экшсэ. Сельмень конязь невтьсы
куш кодамо томбалень масторонть.
Вейке валсо цёрась эри
Гарри Потерсэ, ниндзятнесэ ды налксематнесэ, конатнесэ тюрить ды леднить.
Вишка Сега
– Сега, пачалкседе сак
ярсамо.
– Пекем эзь вачо.
– Мезть кенгелят, эзить
ярса. Седе курокке чийть, вант, Бобаесь лангозот кежиявты, сы ды салатанзат.
– Те кода истя?
– Истя, кузи вальмава,
сови ды кескав потс.
– Ветеце этажос Бобаесь а
кузеви. Сон а ливтни.
– Сонзэ самолетозо ули.
– Самолетонь урноманть
маряса, тердян МЧС.
– Сонзэ самолетозо а
урны, а лажны.
– Кадык сестэ сы, авай, кортнетяно
Бобаенть марто. Пекстык кенкшенть, ниндзятнень леднесынь.
Сега васенце классо тонавтнемсэ
– Ирина Валерьевна, ужодо,
кортнемс мартонк эряви.
– Мезе теевсь, Алена
Васильевна?
– Тынк Сергеенк… А
содатано мезть тейнемс мартонзо. Исяк вейксэце классонь церыне марто
тюргазевсь.
– Кода тюрьгазевсь? Сон
жо васенцес якси?
– Теньсэ тевеськак.
Мезть-бути эзь явовт тенст…
– Сергей мезеяк эзь ёвтне
тень… Шумбра-паро теке.
– Сон тынк шумбра. Тона
цёрынентень пек понгсь. Чамазояк сэнь.
– Сергей минек дзюдонь
кужос якси.
– Тона цёрынеськак ней
теде соды. Пели ваксканзо ютнемскак.
Мезеяк эряви Сергеень марто теемс…
Сега ды Пушкин
–
Сега, мон теть чачома чизэть раман Пушкинэнь сочинениянзо.
– Авай, меснят? Нарьгат?
– Мекс нарьган. Пек паро
казне.
– Монень те Пушкинэсь
уроксояк кирьга видьс сакшны.
– Сон жо классика,
келезэяк вадря, сёрмадовксонзояк мельстуицят.
– Монь эсеньгак келем а
берянь, бути карман мезеяк ёвтнеме Пушкингак кургонзо автьсы.
Мелявтыця Сега
– Сергей, варштака
псакиненть кие-бути кенкш удалов ёртызе. Вант, кодамо мазыйне.
– Авай, эряви васня
варштамс улить-арасть сонзэ шучаканзо, невтемс ветеринарнэнь. Мейле арсемс…
– Мезть арсемс? Сайсынек
ды весе. Кармат эйсэнзэ андомо?
– Ансяк чокшне малов.
Валске марто монськак эль кенерян ярсамо.
| 
