Апак муе уцяска

(Ёвтнема)

Кодамо уцяска  мездеяк а арсемс! Весемеденть налкстынь –  туинь подпольяв. Тесэ вадря  ды лембе. Кияк  седейс а эци, а тонавты эрямо….

Апак учо кие-бути гайгезевсь кенкшентень… Абунгадынь. Киньгак а учан. Зярдо панжия кенкшенть лангозом вансь умонь ялгам.

– Нолдасамак-арась? – мизолдозь кевкситим Аня.

Монь арасель вием невтемс чамасом покш кеняркс. Эзинь пейдевтькак. Ськамочинь колызь. Оймсевинь!

– Совак!

– Кода умок кедьсэть араселинь,   поладсь ялгам. – Мон сынь теть кортамс вейке тевень коряс.

Кумажамгак сорнозевсть. Седеемгак кримицявсь. Те кодамо тевде кортамо? Чарькодеви, аволь Зимбабвень стратегической планост кувалма. Мезе теевсь?

– Тон содат,  мон мирдень марто явинь? – кевкстсь Аня, зярдо озась икелень. Сонзэ пиже сельмсэнзэ неявсь стакачи ды ризкс.

– Зярдо кенериде? – эзинь кеме.

– Тундат… Сон истямо…

Ды ушодовсь: пель часонь перть карминь содамо, кодамо Дима аволь ломань, нузякс, туво, а вечкиця, кажварч, серьгелиця, пияниця, мик  тюриця…

– Эрявсь тень сестэ тонь кунсоломс, –  эзь лотксе Аня. – Мерить эдь «иля капша венчамо».

– Мон истя меринь? – абунгадынь.

– Мерить.

Визьксчама саимим. Монськак а ледстяса, зярдо тензэ истя превть максынь. Сыредеме карминь, нать. Ванды жо пенсияв!

–– Минь сонзэ марто таго вейсэ эрятано. – Анянь сельмстэ лиссь вейке сельведь, покш ды салов.

– Кода вейсэ? Тынь жо явиде?

–  Явинек, одов васодевинек.

Лангозонзо ванынь ды арсинь. Пазось теизе моданть-масторонть, Адамонь ды  тейтерьавань седеензэ, конань те шкамс кияк эзизе чарькоде.

– Таго тензэ венчить?

– Эзинь. Эрятано вейсэ. Мон сонзэ а вечкса… А эряван мартонзо…

– Мекс жо таго вейсэтядо?

– Жаль маряви, сон сэреди…

Варштынь сельмезэнзэ – тосо канава сэрей ведь марто.

– Мекс явсиде?  – пелезь кевктсия сонзэ.

– Кедь кепсесь лангозон, – сельведензэ седеяк лиссть. Кедтнеяк  кармасть сорномо. – Ней мерсь, келя, туят эйстэнь, берянь улиндеряй тень – тон чумось лисят…

Те ансяк киносо цёратне мазыйть, превейть, виевть, тошкить седейс токиця валт, апаротнедеяк ванстыть. Эрямосо –  сынь эрьва-кодат, чавдадызьгак, васовгак кучтадызь. Бути эйстэст туят – чумокс лисят. Кода эно, сэредицят а кадныть, ваномс мельгаст эряви, мелявтомс кисэст…

– Сон алкукс сэреди?

– Аздан, теке тевелявтонзо марсевить. Аволь умок тензэ ярмакт максынь – операцияс. Сон неть ярмактнень пандынзе машинань ремонтос.

Чарькодеви, машинась шумбрачиде питней!

– Кувать мартонзо эрямо арсят?

– Аздан. Тонадынь.

Весе Анянь сэредьксэнь смустезэ ашти вейке валсо «тонадынь». Те сталмонть сон сонсь каизе лавтовонзо лангс  ды ней уски эйсэнзэ. Куш мезе илязо тее «мирдесь» – тонададсь.

Те шкастонть сон таргизе зепстэнзэ пациненть. Кармась сельведень ваднеме. Ней ансяк редия, кода сон сыредсь, сормсевкстнэяк появасть, сельмстэнзэ кенярксчиськак солась. Те шкастонть, нать, косояк васоло истя жо пеняци козяйканзо лангс се цёрась, конась алтазь Анянь туртов. Якить неть кавто пайстомо ломантне масторганть ды а неить вейкест-вейкест. Аня жализе сень, кие пижнесь, кедь кепсесь лангохонзо. Сон тонадсь ды арась мелезэ мезеяк полавтомс эрямосонзо. Ды монень ней сась вейкень кувалма – кияк жалявлизе. Куш весть, седейга. Куш весть сельведтнень потмо марто чамдомс. Шождалгадомс.

– Бути эйкакшонк карми, мезе карматадо теме? – а кадан эйсэнзэ.

Мезе – трямо, – апак кавтолдо мерсь Аня, прок кортась «мезе тень лияды теемс?»

Эйкакшонть трясызь. Ансяк эряви-арась сон? Эйдесь а чумо Анянь «тонадомасо». Кода лиясто тенек стака мезеяк полавтомс вандынь чисэнть. Пельдяно, мезе шабратне мерить, тетятне-аватне. Эрямось минек, кочкавксось минек, уцяскась минек.

Аня нардтнесь сельведензэ. Пацинезэ начксь, сонськак липакадсь.

– Бути ули мелеть авардемс – авардть. Иля визде эйстэнь.

Сон абунгадозь варштась лангозон. Сась монень прев мельга – мон жо цярадинь «авардть».

 – Мезе ней тень теемс?

– Варения марто чайде симемс.

– Пейдят лангсон?

– Арась.

Мезе мон тензэ мерян? Тонавтомо эрямо карман? Ёвтан, зяро ават истя жо сельведть валыть. Стака туемс а вечкевикс мирденть экшстэ – тонадовсь. Чавить эйсэть – тонадовсь. Сёвныть – тонадовсь. Эйкакш карми – сонензэяк тонадови тетятнень-аватнень свалшкань  сёвномаст. Сталмо кармить ускомо колмо ломанть. Кода стака апак пеле варштамс тень лангс ды меремс «эряви муемс эсень уцясканть».