СУРВЕЛЕНЬ   ВАСЕНЦЕ   ТОНАВТЫЦЯ

Ули мелем ёвтнемс рузонь ломанде, тонавтыцядо, кона весе пингензэ алтызе эрзянь эйкакштнень тонавтомантень ды куломазонзо (1962) эрясь эрзянь велесэ, косо сонськак тонадсь эрзякс кортамо.

Ламо иеть ютасть седе мейле, кода тусь эрямостонть Алек­сандра Петровна Лавровская. Ансяк течис сонзэ а стувтнить Кочкурбуень Сурвелесэ. Ледстнить эйстэнзэ минек масторонь ламо таркатнева сетькак, кить зярдо-бути тонавтнемстэ пурнасть превть сонзэ пельде. Ды нейгак те тонавтыцядонть марят ансяк седейстэ лисиця паро валт. Кодгеменде ламо иеть важодсь сон эрзянь школасо. Тень кисэ ульнесь казезь Ленинэнь ды Трудонь Якстере Знамянь ордентнэсэ, теде башка максозель тензэ «За доблест ный труд в Великой Отече­ственной войне 1941—1945гг.» медаль, конатне эрямстонзо свал цитнесть мештьсэнзэ. Тедедень эйзюрковонь 20-це чистэ Александра Петровнань чачома чистэ топодить 140 иеть.

Симбирской       губерниянь Карсунской уездэнь (ней Мор­довия Республикань Кочкурбуе) Сурвелев Александра Петровна Лавровская сась кевейксэе иесэ Симбирск ошсо епархиянь тейтерьавань гимназиянть прядомадо мейле. Ульнесь сон ушодкс школань прявтокс, путовтсь кудо, ков сакшность тонавтнеме эйкакшт эрзянь колмо велестэ. Тейтерьавась покш вий путсь велесэ те васень школанть стявтомсто. Натой кемень иеть якась-энялдсь земствань прявтонтень ды тесэнь помещикентень, фон Шлеппенбах барононтень, ды окойники тевесь лиссь. Шкань ютазь те кудось каладсь, ды Октябрянь революциядо мейле тагояк Александра Пет­ровнань мелявтоматне лездасть кепедемс Сурвелесэ кавто этажсо школа. Сонзэ таликазо ули Нерлейсэ, Давыдвелесэ школатнень строямосояк.

Александра Петровна аволь весть кочкавкшнось Кочкуровань райсоветэнь депутатокс. Истя, депутатокс улемстэ топавтынзе эсензэ кочкицятнень, Сурвелень сокицятнень-видицятнень, мелест теемс Сабаевань ушодкс шко­ланть кемень иень школакс. Александра Петровна содылизе Симбирскоень раськень училищатнень прявтонть И.Н. Ульяновонь, кона кучизеяк Сурвелев эйкакшонь тонавтомо. Вастневсь сон Владимир Ильич Ленин мартояк. А.П. Лавровская эсен­зэ тонавтницянзо туртов мельс-паросо ёвтниль неть ломантнеде, седе, кода сонензэ, нужачисэ эриця тейтернентень, сынь пек лез­дасть гимназиясо тонавтнемстэ. Самай тосо тонавтнемстэ сон ва-сенцеде вастовсь Владимир Иль­ич марто. Сурвелень эрицятнень ютксо те шкас кортыть, Ленин, марят, сакшнось Александра Петровнанень натой Сурвелев.

Илья Николаевич свал бажась весенень лездамс. Лездась сон епархиянь училищань тонавтницятнененьгак. Ансяк сонзэ мереманзо коряс Лавровскаянень кармасть пандомо стипендия. «Весть телень цят якшамоне, - ледстнесь А.П. Лавровская — училищасто молемстэ каршозон понгсть зярыя церат. Вейкесь лоткавтымим ды мерсь тень: «Тон чамаумареть кельмевтить. Кудов пачкодят, мерть тетятень, кадык рами теть лембе оршамопельть». Мон видькстынь тензэ: тетям арась, авам васоло, пек кажовсто эри. Цёрась кевкстимим, косо тонавтнян, сёрмадызе лемем, фамилиям ды тусь эсь кияванзо.

Кавтошка таргонь ютазь тердимим училищань прявтось ды, лангозон чирьстэ ванозь, кевкстимим: «Лавровская, тон мезекс якить Илья Николаевичнень пеняцямо?» Мон абунгадынь, меринь: «Ковгак эзинь яка, киненьгак эзинь пеняця». — «Саты прят идемс, — эзь кеме сон. — Вана Илья Николаевич мерсь максовтомс теть стипендия...»

А.П. Лавровскаядо сёрмадозь ламо. Ледстясынек ансяк вейке книганть, кона теевсь содавиксэкс масторонь келес. Те «Учительница» драмась, конань сёрмадызе Пётр Кириллов. Сонзэ главной героинянть экшсэ Сурвелень васенце тонавтыцясь А.П. Лавровская. Пётр Семёно­вич сёрмадызе «Сельская учи­тельница» художественно-доку­ментальной фильмань сценариентькак.

А.П. Лавровскаянь тонавтницянзо эйстэ лиссть ламо учёнойть, тонавтыцят, агрономт, зоотехникть, инженерт, врачт... Ледстясынек ансяк кой-конатнень. Неть В.И. Яшков полковникесь, кона ламо иеть важодсь Байконур космодромсо, Мордовиянь Н.П. Огарёв лемсэ госуниверситетэнь светотехникань кафедрань икелень прявтось, тех­нической наукань кандидатось, профессорось, МАССР-нь заслу­женной изобретателесь, Ленинэнь премиянь лауреатось И.Г. Учайкин, силовой электроникань НПО-нь научной сотрудникесь В.Н. Цыпкайкин, Сурвелень школань пряв­тось Н.И. Пронькин, С.С. Бызгаев ды П.П Горбунов инженертнэ, военной инженерэсь, Советской Армиянь офицерэсь В.А. Полесушкин ды ламо лият.

А.П. Лавровскаянь икелень тонавтницянзо пшкадекшнесть М.Е. Евсевьев лемсэ Мордов­ской госпединститутонь ректоронтень ютавтомс вузсонть пе­дагогической ловномат, конат нень алтамс Александра Петровнанень. Ансяк течис истят ловномат эзть ютавтово. Пароль, тонавтыцянь иестэ стявтомс калмонзо лангс памятник. Арсян, тесэ виест путсызь Сурвелень икелень тонавтницянзояк, конатнень ютксо аволь аламо сюпав ломанть.