Дипломатось, журналистэсь-международникесь Алексей Лукьянович Лежиков чачсь 1941-це иень чадыковонь 14-це чистэ Московонь областень Люберцы ошсо робочеень семиясо. Эйкакшпингезэ ютась Пенза ёнксонь Шемышейкань буень Ермеёв велесэ.

1958—1960-це иетнестэ важодсь слесарекс Люберцы ошонь заводсо. Служась Советской Армиясо (1960—1963). Прядызе СССР-нь МИД-нь международной отношениянь Московонь государственной институтонь (МГИМО-нь) восточной отделениянть (1969). Важодсь дипломатокс Турциясо, Ливиясо, Болгариясо. 1986—1989-це иет­нестэ сон —«Азия и Африка сегодня» журналонь сотрудник, зярыя иеть, 1989-це иестэ саезь, важодсь Сириясо Ближней Востоконь мастортнэнь коряс спецкорокс.

1967-це иестэ саезь ёвтнеманзо, ёвксонзо, юморесканзо ды фельетононзо лиснить «Эрзянь правда», «Эрзянь Мастор» газетатнесэ, «Сятко» ды «Чилисема» журналтнэсэ. 1991-це иестэ Мордовиянь книгань издательствасо нолдазель «Каргонь Ки» эйкакштненень алтазь ёвтнемань сборникезэ.

А.Л. Лежиков покш мель явсь «Масторава» национальной движениянтень, Эрзянь келень ванстома фондонть правлениясо важодемантень.

Алексей Лукьянович Лежиков А.П. Рябов  лемсэ премиянь лауреат (2004).