Верькст-алкст
Умок те ульнесь, зярдо Сура лей
чиресэ увность дюм чопода вирть. Неть таркатнесэ сестэ
эрясть веенст эрзят. Лия раськень ломанть тесэ арасельть.
Эрзятне эрясть стамбарнэ — сокасть мода, виднесть
сюро, леднесть тикше. Виртнестэ вешнесть идем мекшень керязт. Сёксня-тельня якасть оцинямо
(охотямо). Зярдо киненьгак эзь сатно сокамонь-ледемань ума, се ломанесь вешнесь
вирьстэ паро тарка ды ушодыль тосо чувттнэнь керсеме-сандямо. Сявордсызь чувтонть,
ундоксонзо таргасызь ды теске пултасызь. Куловдо модась седе паролгады, седе покш норов
канды.
Сеть шкатнестэ эрзянь вейке велесэ эрясь
цёра. Мертяно тензэ Промза. Сонзэ умазо апокшкель, сандязель умок. Секс «сюрось эйсэнзэ кассь а пек сэрейстэ, берякшкель. Сизесь
модась. Ды сайсь Промза истямо мель: келейгавтомс паксянть, икеленсенть кадомс
оймсеме. Мусь вирьстэ вадря тарка ды ожань илештязь кармась чувттнэнь правтнеме. 
Сандявсь (выкорчевать) тензэ аламошка
тарка. Те шкасто
чопода вирьстэ лиссь каршонзо пондакш пря, сэрейде сэрей овто. Кепедевсь кавто пильгензэ лангс ды верьга вайгельть серьгедсь: «Тон мекс, эрзя, вирем керсят апак кевкстне?! Тень кис сэвтян!» Промзань оймезэ кочкаряс новольсь, сонсь апак тално, пеедькшнезь каясь каршо вал:
— Овто леляй!
Эзинь сода — те вирьсэнть тон азорат. Истяк, нама, кевкстевлитинь. Нолдык чумом. Иля кежиявтне
лангозом. Сэвемем кенерят. Седе паро ули — карминдерятано виренть вейсэ сандямо. Мейле паксянть сокасынек,
видтяно репст. Несак, модась тесэ паро, сюпав. Репстнэ покшт ды ламбамот улить.
Овтось арсесь-тейсь, каршо эзь моле: «Эно,
лездан теть». Кармасть вейсэ важодеме. Промза весть-кавксть вачкоди
узерьсэнзэ мукорь ланга ды пшкади овтонтень: «Уск эйсэнзэ». Тонань виензэ а онкставить зняро, сельгень прамс
таргасы мукоренть. Цёрась кандтни толбандянтень човине тарадкеть, овтось —
эчке кувака чочкот.
Истя сандявсь тенст сатышка тарка.
Промза энялды: «Овто леляй! Несак, алашанть ирдезэнзэ неявить. Лавшо телень перть. Истямо паксясь тензэ а
сокави». Музгордезь кувси вирень азорось. Эно кода — лангсонзо сокамо кармить! Ансяк ков туят, зярдо тевс кундыть.
Пелевидьс а лоткат. Кильдизе цёрась овтонть сокантень. Соки, сонсь секе тев капшавты «алашанзо»:
«Иля нувсе, чирь пильге, курок видемалангось сы!»
Сокизь-изызь паксянть. Видесть репст. Промза тусь велев оймсеме. Овтось кадовсь теске, паксянть ванстомо. Кизэнь
перть якась мельганзо. Зыянов тикшеть кочконесь, валнось, нармунть кшувавтнесь.
Налкстась учозь. Пек састыне репстнэ касыть. Сась варштамонзо Промза. Несы, Овтось репстнэнь
прядо верев састыне ускси. Пижакадсь пиже-ожо вайгельсэ:
—Тон
мезе теят, чавола?!
—Седе
куроксто касост!
—Истя
иля теине. Ундоксост сезнесыть, репстнэ ёмить.
Курок репстнэ кенерсть. Промза кевкстни: «Тон эстеть мезе
саят — алкст, верькст?» Талакадсь чирь
пильгесь. Те тевсэнть торлаяк а соды,
а чарькоди. Арсесь-тейсь — верькст мери. 
Саинзе Промза «алкстнэнь». Телень перть тантей репстэ ярсась. Овтонть пизэсэнзэ репсэнь
«верькстнэ» наксадсть.Тунда лиссь сон оляв вачодо, кежей, сельмстэнзэ сяткт пургсить. Чувттнэнь-куракштнэнь яжи, верьга вайгельть виренть келес ранги. Потсонзо аёвтавомашка
кеж лаки.
Продолжение
| 
