***

Тон содат: те ломанесь – калгодо седей. Велявтыть эйстэнзэ ды стувтык.

Валске вастык сонзэ жо, ансяк сюпав оршамопельсэ. Куя зепензэ кувалма эрьва ёндо цимбельдить тензэ мизолкст. Тонгак келемтик кургот каршонзо, стувтыть варштамс потс… Ды весе минь истя эрятано: пансетяно ансяк неявиксэнть мельга, конась мазый, цитниця ды… кельме.

***

Ваннат талант марто ломаненть лангс ды маряви: кода шожда тензэ эскелямс эрямованть!.. (Ансяк сонсь содасы, кодамо те «шождачись»). Паряк, алкукс шожда ансяк сенень, кинь мезескак арась талантозо, ды бажамояк тенень а кивчкали. Мезекс Пазось макснесы талантонть?.. Казнекс эли эрьва чинь майсемакс? Лангс ванозь – казнекс, алкукс жо – майсемакс.

***

«Ванта, зяро сон тейсь эрямонзо перть!» – абунгадат лиянть лангс ванозь. Ды капшазеват теемс седе ламо, а кадовомс. Бажить ламо, алкукс жо эзь тееве вейкеськак.

***

Арсезеват косто-косто: косо видечись, кинь кедьсэ? Эрьванть сон эсензэ. Бути вейкенть – истямо, лиянть – тунь лията. Паряк, сон араськак?

Видечись ули. Сон седейшкава чумонь нолдамосо ды вечкемасо. Ансяк кодамо вечкемасо? Сонзэ ламо чачонзо! Арсян, эрьвасонть, бути тосо ули кансёрошка алкуксонь вечкема.

***

Кись свал максы ламо арсемат, кевкстемат, эсеть марто кортнемат, конат чачить прок сынсь, ансяк молить ойменть потсто. Сынь сыргозить ды кармить чарамо-велямо прясот, сюлмавить вейкест-вейкест марто, явить одов, ансяк свал бажить икелев, кода перькат таргавиця кись…

Сеедьстэ аволь истямо питней се таркась, ков ардат, кода кись, кода кись, кона тензэ вети… Сестэ ледить мелезэнь вейке сёрмадыцянть валонзо: «Молят, ардат, аштят – зярдояк преветь илить кадно оймсеме!»

***

Ютыть чить, ковт, иеть. Ютыть сёксть, телеть… Штатолось палы, а лыказеви. Ансяк пувазеви костояк варма, ды толнэсь карми сорномо. Эль-эль а мади. Ды, маряви, шкаськак лоткась, пели лекстямс, мадстемс сонзэ…

Эрьва ломаненть эрямосо ули истямо пелькс, зярдо сон мари, кодамо питней те штатолонть паломазо. Ды те шкась пештясы седеензэ, прок эряськак сон ансяк неть минутатнестэ, конатне нардызь весе кевкстеманзо, макссть вий кандомс эсь штатолонть ды содамс – ков.

Зярдо жо минь алкукс эрятано?.. Зярдо чарькодтяно: мезекс. Чарькодтяно – ды кирдтяно превсэ куломас…

***

Эрят – ды эрьва чине арсят лия эрямодо. Тосо вадря: лембе, валдо, сэтьме…

Вакссот ломанесь ванны ды арси: «Эх, вадряль чишка эрямс сонзэ эрямосо!...»

Тон жо яла учат лия эрямонь самонть. Учить-учить – эзь са. Вант, тонсетеськак уш ютась…