ЧАДЫВЕДЬ
Кувака, пси кизэнь чись. Седеяк кувака сон
ошсо. Калязь асфальтось прок бажи солавтомс ланганзо молицятнень. Пулесь а
максы шождынестэ лекстямс, таргамс ойметь. Чинек-венек урныть машинат,
конатнень мельга кадови куловтыця кошт. Маряви, вана пекстасыть сельметь, ды
весе те валови вейке увтс, тееви вейке чадыведекс, кона салы эрьва башка
ломаненть – апак кевкстне, прок алкуксонь азор масторонть лангсо….
Ошонь чадыведесь свал капши, секе тев
полавтови. Ломанесь жо а марияк, кода тееви сонзэ урекс. Сонензэ а саты шка
арсемс эрьва тевенть лангсо, сон пели кадовомс, секскак весементь марто бажи
теевемс содавиксэкс. Сеедьстэ – чиезь ладсо, ланга-прява. Монень маряви, пек
стака сетненень, кить весе эрямост ютавтыть ошсо, косо чадыведесь минутаскак а
нолды потстонзо…
Неть арсематнеде мейле седеяк вечкевиксэкс тееви
тиринь велем. Зярдо велявтан тов, маряви, эрямось сови алкуксонь лувозонзо,
тееви седе шожда, сэтьме, кеме. Капшамось кадови та-ков удалов, прок максы ки
эрямодо арсематненень. Ошсо лакиця чадыведесь велесэ тееви сэтьме леекс. Маряви
сизесь ойменть шождасто лекстямозо, кона веши сэтьме вармине, аволь заводтнэнь
ёндо лепиявтыця качадома.
Ансяк се, кие кеместэ сюлмазь веленть марто,
зярдояк а ваи ошонь лакиця чадыведентень…
***
Пелеве. Аштян
стольэкшсэ ськамон. Телень весь умок уш
нилизе кельме ошонть, конась вастымим апак кевкстне: мезекс тесан, мезе вешнян,
зярс сынь?
Эрямось моли. Частнэ
ловить эрьва минутанть, а менстить вейкеяк. Ды, маряви, те аволь мон, те овсе
лия, ве ёндо ломань, конань мельга мон ванан, прок киносо.
Икелень журнал. Пачтизь тень васолдо, кудосто.
Ловнан сёрмадовкст эсень лемем ало. Маряви, сёрмадыньгак аволь мон, та кие лия…
Се, кие арась ды зярдояк а ули масторсонть. Арась мелезэяк улемс. Мон жо –
эрян: ярсан, удан, пейдян… Бути седеенть ули чамалицязо, сон велявтызе сонзэ, пекстынзе
сельмензе. Ней сон сеедьстэ ванны потс ды арси эсь пачканзо… Мекс эрямось
вастовтни эйсэнек ломантнень марто, зярдо икелепелев соды – эрьванть эсензэ
кизэ? Паряк, пеедькшни? Паряк, невти эрямонть зярыя чамалицянзо, кинзэ,
танстензе? Ансяк эрьва ломанентень «сермадозь» вейке, эсензе…
Идемевсесь жо тошки:
«Вант, истяяк можналь весементь велявтомс, ансяк – арась, а ули!» Минь жо яла
велявтнетяно прянок удалов ды майсетяно. Лиси те жо секс, мекс эрьва шкане
кадтано удало ойме паморькскеть, седей панкскеть. Ды лиси мейле: панжить друк
сельметь, варштыть пертьпельга ды арсезевить: «Кода мон понгинь тей?»
Эрямонь иневедесь жо яла канды ды ансяк
сонсь соды-ков.
| 
