ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Мои статьи

Эрюш Вежай. Ёвтнема. Сярдовеле

СЯРДОВЕЛЕ

-'Чош-шш-шк !' - мерьсь ловось латяня кузонь тарадтнэнь лангсто нолаштомсто ды сиянь почтонь сувокс кармась озамо кельмевкс ловкувонть лангс. Сеск кузонть алдо, теке чопача, сулейксэкс вельмесь ды кирнявтсь ков валдосо валозь вирьчирень штапоконянть лангс покшке сярдолевкс. Стакасто лексезь таймаскадсь: Витьстэ икелензэ покштояк покш алтюжакс алкинестэ нурьгсь пешксе ковось. Сонзэ аэрикс, ловтаня валдосонть сиясо ды сырнесэ пикстерьдьсь ловшушмов пандочамась, мельганзо - чаво паксясь. Паксянть томбале, пельвайгельбешка туро, раужолдсть веленьчирень кудотне:
-'Уу-у-уо-оо-ов!' - каятотсь те шкане виренть потсто авасолсто седейс кундыця, пелемас каявтыця, урнома. Сярдынесь мик ландявсь тень пингстэ кувака удалсь пильгензэ лангс, таймаскадсь, ды, прянзо виренть ёнов велявтозь, сорныця судоварянзо келейстэ тетьксезь, виевстэ никсесь якшамо коштонть. Пилекаворензэ сравтынзе варакань лопакс, стявтынзе, ды ней кунсолы эрьва кашторксонть, мик лексеманзояк лоткавтызе. Сон содась, мезе канды тензэ те малавгадыця урномась. Исяк веть сынь стардызь сярдолевксэнть аванзо марто. Вазов сярдоскалось серей ловганть эзь оргодеве, пек сизесь. Сярдынесь неизе, кода аванзо кирьгас, урозей пеензэ низелгавтозь, каявсь сехте покш верьгизэсь ды ашо ловось перьканзо кармась вериямо:
Сэтьме, тарьксэв варминесь веленть ёндо кандсь навозонь ды качамнень чинеть. Тоёндо марявсь кискань онгома. Сярдынесь видемтинзе сиземадонть ды пелемадонть сурневтиця пильгензэ. Ней аштесь, теке арсесь: ков прянзо каямс? Удалонзо - кулома, икелензэ:
-' Во-у-уо-оов!' - эшкевсь сярдынеть пилезэнзэ тунь маласто. Ды те урномась теке локшосо керизе вирьпачанть пеке алга. Меельць виензэ пурназь, ловшушмотнень кавтов явтазь, сярдынесь кополсо ёматотсь кудотнень ёно:
Мерят, сеск вирьстэнть нолаштсть вете каштмолиця сулейть. Икеле покшось, мельганзо седе алкинесь ды колмо седе вишкинеть. Прявтось, судонзо нолдазь, лоткась се таркантень, козо вана ансяк-ансяк лотксекшнэль сярдолевксэсь. Озась. Теке мереманзо коряс ваксозонзо лоткась ды таго пулонзо венемтезь озась верьгизавакась, мельганзо - покшкеть левксэст. Толсо палыця сельмсэнзэ верьгизатякась варштась веленть ёнов, косо, мерят, онгозевсть весе велень кискатне. Сон чарькодсь: течинь ярсамопелесь пеензэ алов а понги. Кенерсь менеме.
Зярыя шка вергизтнэ аштесть каштмолезь, теке арсесть, мекс лиссь истямо ильведькс вирьпачанть мельга пансемасонть. Секень вант ва стардыксэлизь:Эзь лисе.
Прявт верьгизэсь комавтызе масторёжов келейконя прянзо, мейле кепедизе нерензэ менелев,ковонть ёнов, ды нолдась истямо кувака ды тандавтниця урнома: - 'Во-у-уо-о-уо-уоов!', - конань каршо кискатне алкукс вейкень пес таго шалакадсть ды онгозевсть. Вейкесь тандадомадонть мик чова вайгельсэ цийнезевсь ды кармась кувать кавномо, теке те самай сонзэ верьгизтнэ састь повамонзо.
Шкань ютазь теляшавтозь кискатне оймасть. Веленьчиресэ аштиця алка, чиремезь ды ловшушмос ваявтозь кудынесэнть валдомгадсь вейке эль неявиця, эев вальмине. Вергизтнэ вете сулеень чопода рисьмесэ кода лиссть, истяяк каштмолезь ёматотсть лов потсо ваязь вирьсэнть. Теке арасельтькак.
***
Аштай атя учось Якстерькай скалонзо вазыямонзо, зярыяксть стякшнось варштамонзо, секскак эзь матедевкшнэяк, зярдо маризе Ирнай кисканзо онгоманзо. Тона васня онгсь истя, кода онголесь, зярдо мезеяк эли киньгак марякшнось костояк васолдо. Ды шкань ютазь сон истя азаргадсь, теке, мерят, орькс овто эци утомозот медь мельга. Сыре ломантне ёвнесть, келя, эрсекшнесть истят тевтькак седикеле.
-'Прах саевлизе идемевсень кисканть!' - машнетезевсь эсь пачканзо атясь,- 'Виде-паро превстэнзэ лиссь сыре онгакаесь'. - Кискась те шкане кармась аволь онгомо, мик кижнэзь кижнэме вайгелень ёмамос.
-'Таго сави стямс!'- сась мельс Аштай атя ды кепедевсь таркастонзо. Тонгинзе пильгензэ лембе кендень кемезэнзэ, путызе прязонзо кавтопиле чапканзо, копачизе шубанзо. Пувась тол. 'Чожолк, чожолк, чожолк:',- чожолдозь казямо лазонь киякскаванть пандозь кемсэнзэ, лиссь кудыкельксэс. Кискась яла азаргалесь.
-'А стяко те!' - арсезевсь атясь ды кодамояк апаротевень каршо ноцковтызе потмарсто кшнинь сянгонть.
Кискась онгсь нудейстэ теезь латалксонть эйсэ, сонзэ се чопода ужосонть, конас ков валдось эзь понгоне. Секскак Аштай атянень сеск эзь неявовояк, кинь лангс оймень лисемс истя кежейстэ онги, ирны ды кижны Ирнаесь. Васня неявсь тензэ ваз, мейле вашине ды, ансяк толонть кандомсто,окойники чарькодсь: икелензэ сярдолевкс! Ирнаесь эйстэнзэ эль-эль саевсь, яла терявтсь сускомонзо сярдыненть кувака серькадо. Савсь сюлмамс сонзэ кардайсэ. Ды тосояк тона кодаяк эзь оймакшно, яла терявтсь менеме ды одс эцеме апак учонь инженть ёнов.
-'Оймак, злыдарь пине! Несак, кинь кучизе тень вазонь таркас Верепазось:' - моткодсь эстензэ судонзо алов латалкс ортанть кеместэ сёлгомсто Аштай атя.- ' Мезть ней тень тейнемс те идем ракшиненть марто ? Паряк, панемс мекев вирев?' Тесэ марявсь тензэ виренть ёндо: 'Ву-о-о-оуу-ув!..'.Каршо онгозевсть велень кискатне.
-'Вергизт!? Ва-ай:Ва-ана кить тонь тезэнь панидизь:',-чарькодсь Аштай атя.-'Кадсакая те тевенть валскес. Ков ней паньсак пиштяканть? Ансяк пежетьс прят совавтсак:Сэвсызь апаротне:'

***
Ашолгадома марто Аштай лиссь вирень инженть варштамонзо. Тона аштесь секе латалкс ужосонть ды вансь тосто домка эрькень кондямот, покш эрьге раужо сельмсэнзэ. Ортань чикорксстонть тарск тейсь. Аштайнень сон неявсь берякшкекс, секс панемадонзо мелесь марявсь тензэ ней а видекс.
-'Эряви васня андомс, кадык аламодо ёжос сы ды виеми',- арсезевсь Аштай. -'Ды виревгак васня сави эстень якамс. Эряви варштамс, улить-арасть тосо аванзо чалгавксонзо?', - Каясь сярдынентень ярсамкакс вадря тикшеде, сёлгсь яслятнес костязь пекше лопань тенсть, мадема таркантень кандсь оромшка олгопакш, кадык, келя, ярсы-оймси, зярс атясь яки вирев. Лиссь латалксстонь ды зярыя шка варинева вансь, карми а карми сярдынесь ярсамо. Тона эзь варштаяк каванямканть лангс.
-'Ванока, а ласты, унксов судось', - машнетевсь Аштай атя. - 'Паряк, симемазо сась, секс а ярсыяк?',-Кандсь кундамка марто чувтонь парькасо эждязь ведьте. Эзь кенере атясь латалксстонть лисеме, кода сярдынесь пелезь ладсо васня никсизе парьканть, мейле теке чарькодсь: пелемс а мезде, ды кармась покш мельсэ симеме. Симизе веденть потмаксос.
-'Паро, пек паро, оям!' - кецязевсь Аштай. - 'Ней сеск а сэстат. Симемат явавтык, ней, бути вачомить, ярсамояк кармат', - Истя лисськак.
Вирьсэнть Аштай атя курок муинзе сярдыненть ды вергизтнэнь чалгавкс яност. Эзгаваст ветешка вайгельбень ютазь, муизе се таркантькак, косо прядызе эрямонзо пайстомо сярдоскалось.
-'Вана мень апаро тев тесэ лиссь',- чарькодсь атясь.- 'Лисни а ков ней панемс сярдолевксэсь. Вирьсэнть сон ськамозо ансяк стяко ёми. Кадык тундос кедьсэм эри. Тосо вансынек мезть мартонзо тейнемс.' - Истя сярдолевксэсь кадовсь эрямо Лепелей велесэ.

***
Аштай эзь учояк, кода курок тонадсь кедезэнзэ сярдынесь. Таргошка ютазь, тона кодак несы атянть, мик кирнявты каршонзо. Ды кода лиякс? Аштай пачк максы тензэ мезеяк тантейне. Сехте пек сярдынесь вечкиль салсо почодозь кши печтьке. Сэвсы кшинть, мейле эцесы прянзо Аштаень кавалалонзо ды учи, зярдо тона а киневтьсы пиле удалга. Скалонтеньгак тонадсь, кармась ловомо эйсэнзэ аванзо таркас.
Курок весе велесь кармась содамо: Аштай атя три уроз сярдыне. Пелевеле, вишкинек-покшнэк, сакшность сярдолевксэнть варштнемензэ. Содазь, Аштаень мельс те пек эзь тукшно. Ды мезть тейнят, савсь а весть тензэ ёвтнемс, косто ды кода понгсь тензэ те вирь пачась.
Тундос сярдынесь виемсь ды аламодо кассь. Кизэнь перть Аштай атя важодсь велень стадань ваныцякс. Кизэнь перть мартонзо ульнесь сярдынеськак. Сон паркстомсь, мазылгадсь, конясонзо кармась касомо ламо рашков сюро. Сярдонь азоронтень ней велесэнть кармасть мереме аволь Аштай атя - Сярдай атя. Ды те атянть кежензэ эзь савтне. Пек сон вечкилизе эсь трявксонзо.
Теде мейле ламо иень перть сярдось ульнесь теке велень букакс, стадань прявтокс. Келей меште, виев рунго, мазый сюракш, тусто пона, кувака пильге, аволь кежей, теке марто мездеяк а пелиця. Истямо сон ульнесь. Сон а весть идекшнизе стаданть эсь умонь яттонзо - верьгизтнэде. Вирев сон тукшнокшнось ансяк кавто-колмо таргос, талай сёксня, сярдоавака мельга пансеме. Ды мейле ялатеке велявтыль Аштаень кардайс, секе нудеень латалксонтень.
А весть эзэнзэ пезнавкшность сявадыця сельмтькак. Урядникесь зярыяксть мерекшнесь Аштайнень, келя, ветик сярдот монень. Аштай сестэ прянзо невтиль рузкс а чарькодицякс. Рузонь церьковань бачкаськак бажакшнось сярдонть рамамонзо. Сенень Аштай мериль, келя, сярдонть тензэ эрзянь Инешкипазось казизе, секс сон а микшневияк.
Сярдось теке содась весемеде теде ды Аштаень башка киньгак эзь кунсоло, киненьгак прянзо эзизе максне. А истямо виев, пельс идем ракшанть, азёка кундык! Сонзэ оно кодамо сюракшозо!
Истя вана эряськак сярдось Лепелей велесэнть. Ды истя кувать, мик велентеньгак лия велень эрицятне кармасть мереме Сярдо веле.
Весть, сёксь ёнов, велень стадась сась велев чокшнэ ланга ськамозо. А Аштай атя, а сярдось - мартонзо эзть ульне. Ломантне чарькодсть: те а стяко. Цёратне секе чокшнэстэнть сыргасть вешнемест. Валске ёнов неизь вирь чиресэ аштиця сярдонть. Ардсть малазонзо, ваныть, сярдонть икеле -кунст, кулозь Аштай атя. Чинь ютазь сонзэ калмизь. Кулома тарказонзо эрзянь койсэ стявтсть лемень кундамо тешкскудыне. Паро, чевте седей, ломанесь ульнесь.
Се шкастонть саезь сярдонть велесэнть кияк эзизе некшнэяк. Ансяк вирев якицятне ёвтнильть, келя некшныльть вирьсэ мазый, виев сярдо. Паряк, те самай сон ульнеськак? Кие соды:

***

Сырькаесь таргизе оймензэ ды ванькс ашо пацинесэ нардынзе сельме кочкарянзо, конатнес пурнавсть сельведть:Мейле олазь сельмсэнзэ варштась чамазом, кунсолан-арась эйсэнзэ? Таго таргизе оймензэ ды прядызе ёвтнеманзо: - 'Всё еты мне мордовску сказывала Олдабабай... Селе ея Астай Олда звали:А сама-то я мордовски уш и не можу:Вот отсюды и Сярда:Ды зачем тебе, сынок, ета нады?'
Мон сюконинь бабинентень ведьсэ каванямонть кис ды ёвтнеманзо кис:Алкукс, мейсь монень эряви содамс, мекс те веленть эрзянь лемезэ - Сярда ? Кинень теде содамось эряви? Оно сеть эйкакштнэнень, конат сынсь эрзянь чачосо, а чоледить налксемстэ рузкс?
Нолдыя машинанть моторонзо ды сыргинь седе тов. Ким кувака. Ледьсь мелезэм лияяк ютазь велень лем - Сандерка: Ды эдь теяк эрзянь лем: Сандей Эрьке! Мекс се велесь истя лемдязь? Кие теде соды? Кие теде ды кинь туртов ёвтнесы?
Мейле арсезевинь вана мезде. Варштакая, ловныця, Эрзянь Масторонь картанть лангс. Ванок зяро ламо лангсонзо тешкстазь велеть истямо 'мазый' лемсэ: Покровское, Рождественское, Михайловское, Монастырское, Богородское :
Монень неяви истямо потмонеявкс: Умонь шка. Арды Эрзянь Масторонь кирдиесь попонзо марто эсь губернияванзо. Каршонзо велетне весе эрзянь лемсэ. Те мень истят тевть? Те мезе, Россия эли кодамояк Тьмутаракань? Велень лемтнень ёвтамсто весе келетькак яжасак-синтресак! Эрицяст лемдязь? Лемдязь! Писарть, лемдинкая нейке весе неть велетнень мазый рузонь ды православной лемсэ! Ды сеск ёмасть Эрзянь Масторсо зярыя эрзянь велень лемть:
Омбоце неявкс: Аволь умонь шка. Арды Эрзянь Масторганть васенце секретаресь. Каршонзо ней уш ансяк зярыя велеть эрзянь лем марто. Ялатеке, те мень а чарькодевикст лемть? Кодамо сынст зэмест-смустест? Ков сынь тердить советской эрицяст? Содазь, аволь коммунизмав! Лездыцят, нейке арседе неть велетненень мазыйть, икелев тердиця лемть! Ды шкань ютазь эрзянь велетнень лемест полавтызь. Ней сынст лемдить: Путь Ильича, Светлый Путь, Луч, Звезда, им.Чкалова, им. : съезда:Мазыйть лемтне! Ды сехте паро - рузкс шождасто ёвтавить, смустесткак ней чарькодеви!
Лисни, Сандерка ды Сярда велетнень трокст зярс вейкеяк покш рузонь прявт эзь ютакшно. Меньсэ тевесь. Эрицятне рузыясть. Кадовсь ансяк муемс тенст неень шкань мазый лемть. Туить койсэм истят пек мазыйть: им. Великой, им. Неделимой, им. Державы, им Демократичной, им.Патриотичных сил..., ды седе тов:
Истя, эрзят, эрятано:.Истя, эрзят, эсь коенек-иланок ванстатано:

*** *** ***

ЭРЮШ Вежай. 1998 ие. Полярной ош, сундерьков, 7 чи.

Категория: Мои статьи | Добавил: tati (17.09.2009)
Просмотров: 1134 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz