МИКИШ АТЯ

Меельце шкастонть Микишень эйсэ стардтнесть ормат-мормат: то пильгензэ чулгсететсть, то седеезэ сэредсь. Шумбрачись кувака пингесэнть раздевсь. Ды вана атянтень истямо он цюдавсь: буто кулось сон, кувака эземс уловонзо оршазь-наряжазь путызь. Велькссэнзэ сырькайнеть лайшить, кудопотмось штатолсо качады.

Зярдо сыргозсь атясь, весе неезденть-марязденть пачтясь семиянстэнь ды кармась тоначив анокстамо.

… Токась Страстной таргонь меельце чись, мазый субутась — Микишень седеяк покш тарькст куродызь. Сормсевезь, санов кедтнень меште лангсо кирдемстэ сон лексесь стакасто, теке кевть кепсесь.

Нуцьказо, Данько, конанень улкоть кемгавтово топодсть, секе тев лотксесь ваксозонзо, атянть чамас вансь судязь-чумондозь.

Цёрканть мельс сон эзь тукшно — ды весе. Тесэ Данько эзь кирдеве, верьга-вайгельть моразевсь:

Кува, кува чуди Сэняш лейнесь,

Вирь юткова, пандо алга,

Вай, пандо алга!..

Микиш сыркак эзь тее, прок кургозонзо ведь сайсь. Натой вечкевикс моронзо кунсоломсто.

Данько путсь табуретка, кузсь лангозонзо, пазава икельде мадстинзе штатолтнэнь ды мекев валгсь. Эцесь каштлангс, эсензэ кедьсэ теевть «пистолетэнтень» ватксесь пицька прят ды кирвазтизе. Виев бахадемадонть кудось соракадсь.

— Дань-ко!.. — ливтясь атянть кургсто.

— Мезе, сыргозить? Мон теть максан куло-мс! Стяк, ме-рян! — пижкадсь нуцькась, ды таго «пистоленть» серасо пештизе. — Ма-рят! — ды истя виевстэ ледсь — кудыкеле кекердиця саразтнэ пуштсо ливтясть ушов.

Микиш кенерепакарь лангс кепедевсь, лавшо вайгельсэ ушодсь:

— Велявты тетят, тензэ пе-ня-цян…

— Пе-ня-цяк! — сырькаенть шнызе Данько, сонсь пеельнесэ одс кармась пицька прянь ванськавтомо.

— Идемевсь левкс, визь-ксэть тунь ёма-втык. Ку-донть пул-та-сак…

— Тон мекс эземпряс мадить, а? — састь Даньконь кежензэ.

— Те а тонь тевесь… — кувсезевсь атясь.

Цёркась пекстынзе сельмензэ ды, каштомонь стенантень велявтозь, бахадсь.

— Да-нько, понксот но-лда-сынь!

— А кенерят! — цёркась труба удалов кекшсь.

Микиш койкастонть нолдынзе пильгензэ, тонгсь лембе кемть, оршась шуба ды капшазевсь ушов, ков нуцькась кенерсь оргодеме.

Кардазсо качадсь пичойсэ. Солазь ведьганть, сэрейстэ пильгень кепсезь, ков-бути капшась Мурка каткаст.

Кузтемпень эземстэнть Микиш нардызе летьке эйпенть, озась оймень таргамо. Ульцянть тона пеле, матразь ловонь коцт лангсо, кеверькшнесь лонщакке.

— Эка, зяро парочи эйсэнзэ, — тямказевсь Микиш ды чамаванзо — петь-петь — тусть сельведть. — А тесэ, мерть, пингем прядовсь!..

Ансяк ёвтынзе неть валтнэнь марямга, кода чирь киулостонть прянзо невтизе Сильдей Сёма. Чирьстэ аштиця шапказо ды панжадо шубась невтсь: Идицянть одс вельмеманзо «тешкстызе» парынестэ.

— Шумбрат-парт, Микиш Петрович! — такшардыця пильгтнень киштевтезь, лоткась ваксозонзо апак учонь «инжесь».

— Ульть шумбра, кирдаш, — судалов бубстась Микиш.

— Кие сими ды кинь прясь маней, сень весе шабратне каванить! — каштангадсь Сёма.

Тунь пильгало, валгиця чипалысэ якстерьгавтозь ловсонть, стылиця гульканть чевте вановтсо онкстазь, Микиш кепедизе прянзо Сёмань таргозезь чамантень. Кирдажонть седе кевкстиксэлизе — видестэ-аволь кортыть: Инечистэ кулозтне ансяк райс понгонить, тесэ Сёма ахолдась шуба ожасонзо — тандавтозь гулькакс выркадсь.

Чипаесь сяворсь пандонть удалов, ды тосто, сонзэ таркас, сырне тюсонь пельть кепететсть. Микишень седеезэ нармунь сёлмокс кармась чавомо, теке валгозь чипалынть сасыксэлизе.

— Покштяй, авам ужинамо терди! — кузтемпестэ пижакадсь Данько! — Кадык Сёма атянь, сон таго покордатанзат, педиця лёмзиесь!..

— Ават фермасо, мейс манчат? — эзь кирдеве Микиш.

— Тосто чияк велявтсь! Пирекинь пачк, кува чистэ якси. Кудов бойкинестэ чийть, пельментне уш анокт!

— Монтемень ярсадо, — кармавтозь мерсь Микиш, сонсь кежевстэ прясто пильгс онкстызе Сильдей Сёмань. — Сестэ, теня, годок, мон велеванть ютан…

«Ятонзо» марто вастовомадонть Микишень мештьс педясь сэпштень кондямо. Те ломанесь эрямонзо перть косояк эзь важоде — ды вана теть, теке бояр. А сон…

Раужо-сэнь эйсэ ацазь Ратор лейстэнть кепедевсь усиянь кондямо, лазнозь варястонзо неявсть домка лазновкст. Тундось ранаяк сась ды а пек уш марявикстэ: то ловт-эйть солавтсь, то мекев эйсэст кельмевтнесь.

Китне куш наволгадсть, ловось ялатеке солыль нузялдозь. Пандо чамантень эль кузевезь, Микиш кувать пшти вановтсо онкстнесь леенть келензэ ды кувалмонзо. Перть-пельксэнь мазычинть теке меельцеде несь.

— Одов а вастовттано, простямак, — ливтясь Микишень кургсто. — Эрямось нурькадо нурька: чачат-касат — ды, вант уш, мода потс тонгтадызь. Эхма!..

Лисьмапрянть пелев, кона кизэнек-теленек чавсь лей чиресэнть, капшась сырькай-сырькайне. Лавтовсонзо — чувтонь курся, чаво ведратне калдордсть. Анка! Микишень седеезэ баягакс чавозевсь. Анка баба, икелев улонь венстязь, лексесь стакасто. Прясонзо олазь шаль, пильгсэнзэ калоша марто кевердезь кемть.

— Теть а лездамс? — лиссь каршозонзо Микиш, куш велесэст атятне ведьс а яксильть.

Анка мизолгадсь.

— А мон маринь, таркасто а стякшноват. Пичкить?

— Стяконь лавгамот! Цюцёв тарьксэс ваякшнынь! — ёртсь Микиш ды велявтызе прянзо. — Мезть а эряви кунсолат!..

Марявсь, кода лексесь солазь ловось, лазнозь эйтнес эшксевсь кольниця вармась.

— Сестэ истя… монь эйсэ кудосо учить! — лавтовсто курсянть нолдазь, Анка кармась ведратнень пештямо. — Тон азё, а то шайтян атям несамизь…

Турва лангсо Анкань мизолксонзо кирдезь, Микиш ильтясь сырькайненть нусманя вановтсо, мендязь рунгинестэнзэ несь икелень мазый тейтерь, конань сон вечксь ды, паряк, нейгак вечксы. Ды тесэ мекс-бути тензэ ледстявсь, кода Анкань кисэ пелекуломс кучкорякшнызь. Сёма ды кавто лелянзо, конат войнас чавовсть… Теде мейле кода-бути сеске Анка лиссь Сёмань экшс, а сон, Микиш, одирьва вети шабра велестэ. Ней Микиш печти пингензэ цёранзо семиясо, мелят баба ялгазо, Мотя, кулось. Кавто тейтерензэ мирде экшсэть, эрить Рузаевкасо.

— Пок-штяй, тетям сась! Ярсамо тонь эйсэ учить, — стакасто лексезь, ве панарнэсэ чийсь атянть ваксс Данько. — Кудов адя, а то козомо кармат!

Аламонь-аламонь Микиш сась паро ёжос, ды сон капшазевсь нуцьканть мельга.

… Инечистэнть велень куротне пештявсть народсо. Эйкакштне нуремасо люкакстнесть, налксесть каташкесэ, а вана покш цёратне, кинь ульнесть ружияст, Покшчинть шнасть менельс леднемасо. Данько пелеветь стясь, ялганзо марто ютызе весе веленть, пурнась сядодо ламо алт. Каванизе покштянзо ды мерсь тензэ «вайгелензэ» кунсоломо. Курок, алкукс, ушосто каятотсь виев цярадема.

— Эха, пистерькай «пистольстэнзэ» бахадсь, — мизолгадсь Микиш. — Сельмем икеле покш охотник касы, а мон тоначив туиксэлинь. Превень тунь ношкалгадсть! — марямга сон кортазевсь эсензэ марто. — Раесь вана косо — нуцькам вакссо. Пильге лангс васня сонзэ стявтома!..

Атянть чамава чийнесть вальматнень пачк кудос совиця чипалынь «нумолкайтне».