КЕНДЯЛТ-МЕНДЯЛТ
Ташто Мурзава куля-дуля кеверькшнесь: Надя Арбузова чачтась негралевкс. Институтто икеле сон эсь велесэст почта кандтнесь, эйстэнзэ ве берянь вал эзть марсе, а тесэ… Азё нолдык истямонть тонавтнеме!
Марязденть Оря чамас ожолгадсь. Лоткиль кудо куншкас ды, прок пильгензэ кияксос педильть, талайс истя ашти. «Паряк, лавгить? — лиясто оймавтсь авась седеензэ. — Ды мейс лавгить — Лена Пархаева, конань марто Надя тусь Московов, эйкакшкенть сонсь некшнизе. Чачтома кудосто. Ташто Мурзав Лена сеске гайневтсь телефонсо: «И-ись, цёрынесь страсть кодамо раужо!..»
Надя икелеяк Орянень мерекшнесь: арси омбо масторонь студент экшс венчамо. Свадьбавтомо. Свадьбас ярмакост ялатеке арасельть, пурныть столь-стольне ды саты. Тейтерензэ Оря мирдевтеме кастызе, «пиципалакс потмонь» сон. Ошонь общежитиясо эрямсто нажовизе. Паро, Надя шумбракс-превеекс кассь, ярмак мельга а пансицякс. Ошов Оря кучиль аламнешка ярмакт — сетнень кисэяк сюкт тензэ ёвтниль. Ды косто ламотнень сайсынзе — кооперативсэст тунь а пандыть, пенсияв зярс рана лисемс. Текень кувалма свадьбадо икеле истя сон сёрмадсь Надянень: «Лисят, тейтерем,— те тонь тевесь, олят. Ансяк мейле эйсэнь иля мурне…»
Иень ютазь Надя велев сась. Какшонзо ускомо. Оря кодак панжизе колясканть, косо нуцьказо носксь — тандадомадонть потазевсь. Эйденть чамазо теке дёготьсэ ваднезь, сельмензэ ловдояк ашот.
— Кода лемдик куш? — сатотсть виензэ кевкстемс.
— Ёгакс. Покштянь лементь тензэ путыя, — кургонь келес пейдезевсь Надя.
— Ёгакс-Ёгинекс, — менсь Орянь кельбрясто. Нуцькиненть саизе беремазонзо, кармась нурсемензэ:— Гуль-гуль, гуль-гуль!..
Институтонть прядомадо мейле Надя тусь мирдензэ марто васоло Африкав. «Покш специалистэкс», кода сонсь шнызе прянзо. «Экономикась ды ярмактнэ весементень прявтт, — сёрмадсь сон се масторстонть, косо, марсевсь, ве калязь чувар ды рунго киськень невельстиця пси. — Джон марто (мирдезэ, нать) вишка банктнень вейсэндямост снартнетяно. Покш банксонть чондатнеяк покшт…» Сёрмантень конёв панкске клейсэ педявтозель. Тешкстнэ-букватне букань пулошкат, чирть-кичкереть, теке иредьстэ сёрмадызь: «Курок, авай, эсенек джипсэ теть сатано, конань ве фабрикантонь кедьстэ раминек». Мезе те джипесь, Оря эзь сода, чарькодемс ялатеке чарькодсь: конёв панкскесь содамонть кедьсэ сёрмадозь, конань эзизе некшнеяк.
Кучовксонть Оря ловнызе шабранстэнь, Мазый Оконень, се шошнозевсь:
— Сюпавтне кельме ведь симемс а максыть, аволь ансяк покш машинас озавттадызь. Оно, эсенек «од рузтнэ» весе паро паксятнень цопадизь, миненек ве сёвонь кадсть!..
Оконь мирдесь, Миколай, Надянь «экономикадонзо» лиякс ёвтась:
— Тосо истямо покш банк тензэ невтить — весе прячерензэ раздесызь. Газетасто монсь ловнокшнынь: Африкасо аватнень кискань таркас содныть. Кудонь ванстомо. Ветень-ветень нить эрьва семиясонть. Тонь Надясь, бешом, ветеце…
— Винасо чополгавтыть пряудеметь — мезть понгсь лабордат! — ожадо усксесь мирденть эйсэ Око. — Мон тонь вейкинян — пельдеть ламо сюпавчить таштынь? Улкоть миия сеябаранонть, дык кисэнзэ саезь ярмактнэнь трёшникень пес симить. Марить, Надя шабранок джи-жипсэ сы? Сонзэ, Арбузонь нуцьканть, а манясак… Ёж-ов!
— Око превейстэ кортась: минек велень ломантнень сулей алов а озавтсыть, — шнызь Миколень нинть трактористт-ялганзо, зярдо сон Африкасто сазь сёрмадонть пачтясь. — Ёга атянь нуцькась икелепелень енерал манясь эли банкир…
Ёга кассь-кепететсь — сурот юткова модачка калокс мени. Чинь перть яла ушосо, кудов а тердевияк. Кепе пильгензэ свал лазнотозь. Оря истя вечксь эйсэнзэ, кода тейтерензэяк эзь вечкене. Мик эсь тетялементь тензэ максыксэлизе, ды тень каршо вельсоветэнь секретаресь стясь, Матвей Парамонов.
— Арина Сергеевна, истя а тейнить, — ушодсь сон мурнемензэ. — Закононь колсема те, авантюра. Теке марто, Ёга аволь эрзя раськень, сон мулат.
— Те мень оштё мулат? —апаркстомсь Оря. — Эрзякс истя сон чулги, кода тон а маштат!
— Мулат — те човор нациянь пургондавкс, тень кисэ стяко кеждить лангозон. Сонсь Пушкин ульнесь эфиопонь нуцькакс. А вана рузокс минденек парсте сёрмадсь, чарькодить? Национальностесь мездеяк а корты. Тон Ёгань эйсэ ярмаконь таштамо тонавтт, ярмак мартось а ёми. Оно, эсень пинентькак Мулатокс лемдия. Сонгак, раужо понась, ансяк серьгедян тензэ «Атю, Мулат!», сеске паксяв нумолонь кундсеме ношксты. Мерть, три-анды эйсэнь…
— Весементь ярмаксо онкстнят, конёвонь пацькиця. Ельцинэнь кондякс. Се, сюровтомо бесэсь, Россиянть капитализмав чиртизе, дык тынь, сонзэ пинетне, ансяк сюпавонь мельть топавттадо. Атю, Ельцинэнь киска!..
Кудов велявтозь, Оря кавонест зеркалатнень цюланов ливтинзе. Икельць кудонсенть ды сень, конась трюмонть потсоль. Нуцьканть ванстомга. Ковтанзо понгавтыксэлизе, панжизе шкапонь кенкшенть — а сень потсо таго чавачамо. Оря чийнесь Окомезнень, кавонест цёранзо тердинзе, конат Кемлянь техникум прядыть. Трюмонть кудыкелев кандовтызе. Зярдо сеть тусть, сайсь молотка ды зеркаланть тямакакс теизе.
Ды ялатеке велень пакшатнень марто сёлт чирева чийнемстэ ванькс ведьстэнть Ёга неизе чачонзо— кудов авардезь напустясь.
—Авай! — пижакадсь сон уш поровт икельде, эсензэ сельме ашотне ёндолонь сятксо верськаесть. — Мейс монь Раужкаекс лемдимизь?!.
— Раужкаекс? — кирнявтсь Оря эземстэнть, косо пси модарькат томбась. — Раужкаесь, цёрам, Миколай покштят, шабранок. Тон чистэ некшнят эйсэнзэ — прясто пильгс сон мазев-рудазов. Трактористэкс важоди. Раужкайтне товзюро кастнить, конастонть прякат теть пансекшнян. Тантейть прякатне?
— Пек тянтейть! — лоткась Ёга урномодо. — Тлактористэкс туян тонавтнеме. Тлакторсо карман модат соксеме…
«Раужкай» травамканть кисэ цёрынесь эзь кеждя, натой тонадсь эйзэнзэ. Пакшатне кизэнь перть пси чинть ало экшелясть, яксесть мастумарьс-кстыйс. Рунгс-чачос раужкадсть, Ёгадо а явовильтькак.
Вана нейгак цёрынесь сизезь совась ушосто ды койканть лангс чиремсь. Оймсеме. Ловсосо качадыця кедензэ Оря нежединзе сонзэ штапо рунгонтень, тошказевсь:
— Минек Ёга касы покшокс-покшокс. Касы ды туи Ташто Мурзасто, ськамон кадсамам. Сёрмань кучномодояк лотки, кода Надянок…
Ёга панжинзе превей сельмензэ, истя жо чевтестэ мурнозевсь:
— А мон, авай, ковгак эйстэть а тюян. Калман пенчсэ андомот. Сюронь кастомо калман…
Тракторонь парксо Ёгань эйсэ чистэ учильть. Тов сон рана валскене чийнекшниль. «Полавтыцянок сась!» — механизатортнэ кеняркшность течияк. Ёга весе машинань лемтнень содылинзе, кинень кодамо уштомапель эряви. Сень неезь — Миколай покштясь заводясь тракторонзо, тензэ мерсь:
— Зярдо калбюлатолонть полявтсак?
Цёратне пейдезевсть, Миколайгак мизолдсь.
— Запчатнень а кенеляткак усксемест. Чистэ мелькавкшныть, теке эйсэст чувтосто тоцить, — пеняцясь Ёга.
— Цёрам, инженерэнть кедьстэ од пускатель тень вешть, — икелензэ энялгадсь ве трактористэсь.
— Монсентень од радиатор путома, кисэнь а пшкадят? — мерсь омбоцесь…
Чинь куншкане Ташто Мурзаванть асодавикс машина ношкстась. Лоткась Арбузовтнэнь кудост вальмалов. Оря луга лангсо скалт потявтсь. Мазый Оконь Зоя псилгадозь чийсь тердемензэ. Сон уш васолдо пижакадсь:
— Оря патяй, тонеть кодат-бути дипломатт састь!
— Эка, прах саевлинзе, мусть кона порава токамс, — ведра ловсонть флягас нуртямсто моткодезевсь Оря.
Кудонзо икеле, алкукскак, паро баржашка ашо машина аштесь ды пукшов боярава. «Корьмайнем! — авась каявсь Орянь кирьгас, кармась палсемензэ. — Кисэть куломс тошнакадынь!» Надянь прясо ульнесь коклаць шляпа, лангсонзо ашо костюм. Оря ансяк ней фатясь: перькаст народ пуромсь.
Садсто лиссь сэрей цёра, сонгак ушодсь палсемензэ. Чамазо чопода, пильгензэ теке страусонь — кувакат ды човат. Оря чеерекс ношкстась пирявкс кенкшентень.
Пурнасть столь. «Косо Ёга?» — салатокс пиже куяронь керсемстэ кевкстсь Надя. — «Ушова чийни, курок велявты, — мельде-валдо мерсь Оря ды прясонзо икельць кудонть пелев невтсь: — Мезде куш андат эйсэнзэ?» — «Мезде весе ярснить», — цяхсо раказевсь Надя.
Састь шабратне. Столенть экшс виздезь озасть, теке аршинт нильсть. Миколай эфиопонтень пшкадиксэль ды ёвтазь лемензэ стувтызе. Африканкакс Надяяк велявтсь — чамазо чипалысэ киртазь, прязо тейнезь кудря потсо.
— Тейтереть ашодо ашоль, ней прок содов ведьсэ пезызь, — васенце рюмкадонть мейле столенть трокс ёртсь Мазый Око.
— Ней сон оно кинь тейтересь, аволь Орянь, — сянгиненть пангос пезнавтомсто Миколай невтсь алпачалгонь чамдыцянть лангс. — Страус Африканычень.
Оря стядо каванясь. Эзь фатяяк, кода рестазь саразтнэ ёмасть, столесь брагань човсо валнозель.
— А-а, мон оно мезде ёвтыксэлинь, — пей ютксто суре сывелень таргамсто мерсь Миколай. Аволь зяро цямкицятненень, кода эстензэ: — Кой-кона раське-народтнэ кезэрень кой кирдить: ярсамсто аватне мирдест удало аштекшнить.
— Никодимыч, тон раксят лангсонок? — педясь Миколайнень Орянь роднязо, Кирилл Петрович. Сон кооперативень завхоз, кидеяк эзь пеле: — Косто истямо кой муят? Сонзэ калминек, кода бишь… од капитализманть пингстэ.
— Дык сон, неень педлей строенек, зярдояк а яжави, — кежейгадсь Миколай. — Петнявксонь пес веренек потясы!
Кортамось весень токадинзе, мельтне кавтов явовсть: веенстнэ капитализманть сялдсть, омбонстнэ эйстэнзэ несть вандынь чинь идема.
— Мерть кевкстеметь, кода тосо… Боярат тон эли ялга? — кирнявтсь таркастонзо Миколай. Вете рюмкат уш симсь, келезэ понгонесь. — Тонь масторсо империализма строить эли кода минек Рассиясо — ломанень ледниця мастор?
Эфиопось васня Надянь лангс варштась, мейле кепедизе покш суронзо:
— Республика.
— Неить-цётыть, ош-кинь хошь? — Миколай кеперепакарьсэ эшкизе Кендял Санёнь. — Вана теть кендялт-мендялт. Сыньгак, начит, сёвонень республика вачкить. — Ды ней уш Надянь мирдентень пшкадсь: — Ёвтака тенек, кода тосо, а, Иван леметь? Вечкевикс Иван Африканыч, тон видькстака, кодамо банк кирдтядо — вейсэнь эли кооперативень?
— Трактор-ферма, — инжесь видемтизе копорензэ. — Ферма-трактор…
— Фермер сон, минек кондямо… А кода республиканк ваны тень лангс, тюрьмас а понгат? Оно Миколайгак снартни ташто техникань рамамо, — лапнозевсь Кендял Санё.
— Учодо, трактор рами пияницясь, — совась кортамонтень Мазый Око. — Стувтынк, кода дизельсэ сэдь алов сяворкшнесь? Сиензэ лангс тракторонть рамасы?..
«Африканычесь» кургонь келес пейдсь. Суронь невтнемасо толковась, лиясто Надяяк тензэ лездыль: кодамо ферма кирдить, зяро тракторост.
— Ош кинь хошь, дык фермазо минек кооперативдентькак покш. Цела «Вельхозтехника»…
Поровт лангсо аштесь Ёга. Оря кедень рукштядезь серьгедевсь:
— Цёрынем, варштакая, кить састь тенек!
Надяяк кенярдозь пижакадсь:
— Ёгине, тиринь пакшинем!..
Ёга кекшизе прянзо Орянь кедьлапушка потс, сельмсэнзэ тосто кивчкаесь. Столенть экшстэ стясь тетязо, венстизе кувака кедензэ ды мезде-бути кортась, кортась эсензэ кельсэ. Надя авардезь икельць кудонтень совась. Оря а содыльгак, кода тейтерензэ оймавтомс.
Ськамост цёратне удалць кудосонть пелькстасть.
— Мон кортан теть, тумось содасы эсь тюсонзо, — столентень пенчсэ вачкоесь Кендял Санё. — Кендялт-мендялт, тень мейле тонсь несак, — тонавтсь сон Кирилл Петровичень.
— А мон мерян, Ёга минек породань, — эзь пота Орянь патянзо мирдесь. — Тень мон нурькинестэ тенк ёвтаса: эйстэнзэ паро тракторист лиси, сюронь кастыця.
— Саты тенк, дипломатт, —кардамост лиссь Оря. — Келенк сюлмсинк, а то монсь кшувавттадызь. А нетядо, эйкакшось аванзо содамо а бажияк…
Цёратне симсть цяркань-цяркань, кудова уш сраликсэльть, тесэ поровтонть икельде Миколай мекев велявтсь. Васолдонь инжентень кедень венстемстэ мерсь:
— Ульть шумбра, Иван Африканыч. Бути империализмась ськамонк а изняви, лездамо Мурзань аватнень тенк кучсынек.
Икельць кудосонть, тодов потс прянь тонгозь, лажсо авардсь Надя. Оря ве пеле кирьмицявозь аштесь, прок чумоль мейсэяк.
— Весе одксчим калавтык, — тейтерезэ ёртнесь кевть-валт. — Лишной ярмакт платиянь рамас пелилить максомо. Оян крепдешинсэ яксесть ды атлассо, мон — човине ситцасо. Оно, Лена Пархаева наряжамкасо Коля алужон нельгизе, конань нейгак веч-кса-а!
— Сускик келеть! — эзь кирдеве Оря. — Мон тетять эйсэ течимс учан, а сон сайсь ды манимизь. Пек уш, ванса, бойкат!..
— Саты теть, бойкан, — стясь таркастонзо Надя, ды прок сельведть эзь правтнеяк, ёртсь казямосто: — Оштё тонавтомон кармат, кода эрямс тень!
— Ды мезть уш, тон ней превеят, — стакасто лекстязевсь Оря. — Ёга тонадсь эйзэнь, сонзэ весе седейсэнь вечкса, простямак…
Удомо тусь тикшеде эцезь латалов. Курок Ёгаяк тосто муизе. Эцесь ватоланть алов, весе рунгинесэ педясь ёжозонзо. Орянь мельтне ней чийсть икелев, сыця шкантень. Арась, пакшанть сон тенст а макссы, сынь лията чачтыть. А, паряк, омбоце цёрынест ули, теде Оря стувтсь кевкстемеде. Ёгань эйсэ сон лавсьсэ нурсекшнесь, пильге лангс стявтызе, мейлеяк карми кепедемензэ, зярс а сыреди.
«Ванды котомост пештясынь тувонь куясо ды кадык туить…» — ютась пряванзо.
Пувазевсь пиземев варма, латалксонть кенериця сюронь танстьсэ пештизе. Судоварянь тетьксезь Ёга никсесь, стылясь тавадксонть ало. «Сонгак сюронь чиненть мари, — мельспаро саизе Орянь. — Покштязояк истямоль, Ёга атя…»
Пиземесь лосьсэ тусь. Панжозь кенкшенть икеле шольнесь чудикерькс. Орянь арсеманзо ве кирес тапарявсть — эрямодонть, тейтердензэ, Африкань мастордонть. Тосо Надянень стака эрямс, секс нерванзо каладсть. Сонзэ таркас прянзо Оря путыксэлизе — истямо ризкссэ пештявсь седеезэ, куш врадт. «Тосо розень олгос пиземе байгть а эшксевить, антоновкаткак а касыть. Хрущевонь вейкине кукурузазо, бешом, чачокшны, — пекстань сельмть чевелясь арсеманзо. — Рана валскестэ од брага чаван, кадык содамось ледстни Ташто Мурзадонть…»
— Удок, гулькинем, — пуворьксэв кедтнесэ авась вадяшась Ёгань калгодо кудрятнень, эсензэ мештева валовсь вандынь чинтень певтеме кемема.
| 
