КЕЛЕЙ КОНЯ
Банянь полоклангсо Иван Петрович Урюпкин талайс эждясь карязт. «Шка парямс, секень вант сутяман», — ютась пряванзо. Валгсь кияксос, чувтонь парькинестэ амольдясь кече сусла, кожовт потс выжновтызе. Таргась лакиведьс лопавтезь тумо тенсть, рунгованзо кувать киштевтсь. Сонсь ледстнесь Саранскойстэ сазь тейтердензэ. Тунда, Инечистэ, Зинанень ниленьгемень вете топодить. А од уш, ды прянзо одирьвань кондямокс лови. Турват-кенжеть артни, ловшушмова кизэнь котасо яксекшни. Лиснесь мирденень — содамонть марто колмо иетькак эзь эря, явсь мартонзо. Валера цёразо, Иван Петровичень нуцькась, аспирантурань прядомадо мейле тусь эрямо нинзэ чачома ошов — Краснодаров. Зинаньгак тов саиксэлизь, ды тона мартост эзь моле. Обуцянь коряс Зина теке Матря авазо: кувака кель, ёвтат тензэ вал-валнэ, сон каршот кементь ёрты.
Иван Петрович весе пингензэ вирьсэ ютавтызе. Васня лесничеекс ульнесь, зярдо покш обходонзо заповедникекс теизь, егерекс кадовтызь. Эрямо пизэнзэ кордонокс а ловсакак — пакся чиресэ ашти. Кавтошка вайгельбеть Вертелим веленть видьс, косто Матря полазо. Сонсь Урюпкин чачомань коряс а тестэнь ломанесь — Орданьбуень Канаклейкасто. Техникумонь прядомадо мейле сась тезэнь лесничеекс, од тарканть марто весе пингензэ сюлмизе. Иетнень лангс апак вано, эсь обходонть сон, ловт, чизэнзэ трокс-келес ютнесы, ды мезеяк, а сизекшни. Меельце кавто иетнестэ, виде, карязонзо кармасть сэрелеме, теке тозонь кияк салт почодсь. Кода иля корта, сыречись а максни вийть, ды виреськак, мода ладсо, менчи рунготнень…
Иван Петрович пезызе прянзо, сапонев левштапосо ушодсь кутьмерензэ ёзамо. Ды тесэ пилезэнзэ ружиянь бахадема эшкевсь. «Налксить, прах саевлинзе! — апаркстомсь егересь. — Вертелимсэ малав весе кирдить леднемкатнень…» Капшазь ёрвалдсь-тейсь ды ве алгапонкссо-панарсо ношкстась ушов. Кордононть икельга — венстик кедеть, стаянть эйс токадеват — апак капша эскелясть вете верьгизт. Сех покшось, Келей Коня (те лементь Урюпкин тензэ путызе), сявдикс лангсо кандсь реве. Сонсь паро лоншакшка, судостонзо тусто пар мольсь. Эскелямсто удалце вить пильгенть лангс чиремкшнесь. «Эх, идемевсь-басурман, визьксэть тунь ёмавтык: меельце реветнень велестэнек таргсят», — машнетезевсь егересь.
Совась кудос, стенасто ноцковтызе кавто стволс ружиянзо ды апак орша, шапкавтомо ушов кирнявтыксэль. Тесэ кинть Матря низэ пиризе, акирдевиксэсь:
— Ков, анамаз, кепе-штапо? А мерят, мекев козкс стардтанзат? Лоткак, кортан! — каршонзо сыре вадовокс каявсь.
— Алкукс, тетяй, шумбрачить тунь а ванстат, — икельце нупальстэнть лиссь Зинаяк. Лангсонзо понав халат, апак судря прязо теке варакань пизэ. — Инжекс тенк сынь, тон вирьга лытамо туиксэлить. Са-ты!
— Вертелиментень верьгизт педясть, тынь тесэ кирдемат ушодыде, — эзь пота Иван Петрович. — Саранскойстэ охотникть снартнить кучомо, виренек сэрьс якстере лентасо пирсесызь.
— Сестэ сынст марто лисят, ней оно пси ямдо коршак, — Матря невтсь стуворонть пелев.
Иван Петрович понгавтызе ружиянзо секе тулонтень, озась ужинамо. Чатьмонсь-чатьмонсь ды эзь кирдеве:
— Полай, аламнешка нуртявлить. Парямодо мейле, чей, весень каванякшныть.
— Нуртян, нуртян, апештявикс пеке, кургозон иля вано, — чевтелгадсь Матря. — Лоподемазот глохтяк, — каштыкельде ливтсь ашо вина сулика, мирденть икелев путызе. — Куш ченьксэнь панеме тонадт — пельпенсия нолдтнят кирьгават! Эно ськамот кадтадызь, парямо тутано! — ават-тейтерть ушодсть шлямкудов пурнамо.
Урюпкин нуртясь пельстопка, весть копордазь симизе. Сянгинесэ цопадсь салтонь куярнэ, цяторсо кармась поремензэ. Мейле ямонтень педясь. Ярсась-коршась, эсензэ сельме икельга верьгиз стаянь ветиесь яксесь…
Келей Коня повиль реве эли ваз-вазнэ, васня верензэ потилизе, мейле каилизе сявдиксэнь трокс ды — Уркат латков, косоль пизэзэ. Весть чиньзельть, Вертелимень эрийтнень пингстэ, «килькштизе» кооперативень айгоронть, конань племакс кирдсть, адя пила пейтнесэ киськензэ ваткамо. Ваткизе-ванськавтызе тушанть, мейле кавтов явизе. Ве пельксэнть сонсь кутьмере лангсо кандсь, омбоценть лия верьгизтнэ усксть. Неезденть абунгалесть ломантне, ды мезть теить сынь, сырькай-сырькайтне, бути одтнэ ошка-посёлкава сралесть, кадызь тиринь веленть, арази айгорось идеви тенст.
Сорность Келей Конядо, эйстэнзэ кудокенкшть пекстнесть, натой кардотнень кирдсть панжома экшсэ. Ютазь тельня сазь охотникть снартнесть куродомонзо — дула алов паниксэлизь, якстере флажоксо Уркат латконть пирякшнызь, ды кодат тосо кундамот — верьгизэсь лия кива эйстэст оргодсь. Мельганзо сонгак, Урюпкин, умок панси, ансяк весть кенерсь пильгес ледемензэ. Келей Коня каявсь лангозонзо, пукшостонзо сывель пал лутась. Паро, Иван Петрович сестэ одоль-виевель, кордонов сонсь пачкодсь. Матря ускизе Ташкинань лецямо кудов, тосо ковонь перть кирдсть эйсэнзэ, пильге лангс яла стявтсть. Стявтызь, окойники!
Банясто велявтозь, Матря кедтнесэ ахолязевсь:
— Вай, авакай-тирякай, тунь стувтынь ёвтамодо: ванды райцентрав эйсэть тердить. Кодамо-бути промксов…
— Кие ёвтась теть? — стуворонть экшстэ стясь Урюпкин.
— Кие ёвтась теть… Тень кисэ сотовой кирдтяно, конань Зина ускизе. Гайгстыцясь лемензэяк ёвтызе: Сучеренко.
— А-а, Украинасто оргодезесь… Кучеренко фамилиязо, чапик судозот. Прявт егерь сон, хохолось. Лисни, начальникем. Веенст кармавтомат тенек максни, сонсь тевезэнек торлаяк а чарькоди. Икелень шахтёр, мезть саемс пельдензэ, — машнетезевсь Урюпкин. — Промксов ялатеке сави молемс, а молян — чумондсамизь.
— Ванан, винанть петнявксонь пес потик. Ков симат зняро, сыре карго? Азё мадть, секень вант ванды а стявтоват, — эзь кадо эйсэнзэ Матря.
* * *
Валскестэнть ранаяк, пиже зорят, Иван Петрович кильдизе Аташке айгорнэнть шожда нурдынес ды ардозь — Ташкинав. Кинь перть секе Келей Конядо арсесь. А верьгиз — идемевсь! Уркат латков кандтни повазь реветнень, эно ков? Латкось келей-кувака, потмозонзо кементь стадат кельгить, паряк, седеяк ламо. Пизэтнень Келей Коня пиче ундоксос чувовтни, ков якшамот а токшить. Вармаяк эйзэст а совси, кельметь-якшамоткак. Се берянесь — чадыведне латкось лодомонь кондямокс велявтни. Те шкастонтькак пизэзэст ведесь а кузнекшни — сон латконть чиресэ седе вере ашти. Лия стаятне, чаволкайтне, лепиякшныть истямоне, Келей Коня верев лисеманть кисэ прят пувордасы. Кежевде кежев сон!
Урюпкин эзь фатяяк, кода Ташкинав пачкодсь. Теке покш веле сон, аволь райцентра. Кудотне чувтонь, кирьпецьстэ вачказть чуродо весть вастат. Куротне теинеть, ловшушмо потсот.
Егерень промксось, кода икелеяк, ветявсь Культурань кудосонть. Кортамотне мольсть заповедниктенть, кона, ловт, виртемель, — икелень делянкатнес озавтозь пичетне ансяк-ансяк тусть касомо. Тосо идем ракшатнень верьгизтнэ покш виень апак путо шождасто кундсесть. Саранскойстэ сазь Лазарев министрась а стяко мерсь:
— Курок весе сярдотнень сэвевтьсынк. Ёмить сынь — пертьпельксэськак ёми. Тень коряс, егерть, кодамо лезкс пельденк учомс? Арази а тынк те безарьксэсь — ванстомс виртнесэ весе эриенть?..
Урюпкин кунсолось-кунсолось ды эзь кирдеве, мерсь:
— Тимофей Евгеньич, курок мон пенсияв туян, а сат полавтомон?
Министрась чамас якстерьгадсь. Каинзе сельмукшонзо, кармась нардтнемест. Окойники видькстась:
— Профессиянь коряс мон аволь зоолог. Васня «Стройтрестсэ» важодинь, мейле райадминистрациянь прявтокс ладякшнымизь. Ды вана министерствав сынь, козонь эзинь бажаяк понгомо…
— Пандыть тенек аламо, кие од ломантнестэ, ёвтака, карми пертьпельксэнть ванстомо? «Эждьсамизь» ярмаксо — эйстэнек верьгизтнэ сынсь оргодить, — ёвтызе кекшезь мелензэ нилеце участкань егересь Вадим Никитонкин. Сурсо нерькстась министранть ёнов, керязь керясь:
— Вана тонськак, Тимофей Евгеньич, кортыть: верьгизтнэяк пертьпельксэнтень кадновить, сынсткак ванстома. Содак, ве кудосо кавто азорт а эрсить. А уш бути верьгизэсь азор, сестэ заповедникенть сави пекстамс!
Министрась алтась охотникть кучомс. Сынь, марят, идем кискатнень пест сеске мусызь.
Кордонов ардомсто Урюпкин седе чевелясь превензэ, кода стаянть ванстомс. Келей Коня лангс куш кеж сон кирдсь, ялатеке ловсь: верьгизтнэ — пертьпельксэнь ванстыцят: лавшо сярдот повсить, сэредиця ривезькайть.
* * *
Пельтнень пачк новолезь коввалдось моданть ланга сравтнесь ожо цивтёркайть. Ловось эйгажакс кевензась, виев якшамодонть цят-ят тейнесь. Келей Коня лиссь пизэстэнзэ, кажварч сельметнесэ онкстызе пертьпельксэнть, кежевстэ урнозевсь: вачочись чаво сюлот пувордтни, меельце вийть сайни. Пизэстэнть кирнявтсь Лый-Лай, Келей Конянь од нись, кона савсь тензэ веженсь тейтерекс, судонзо тонгизе мирденть кирьганзо алов, кармась эждемензэ. Куцтямодонть ды пси рунгодонть стаянь прявтонтень мельспаро теевсь. Ды тесэ Келей Коня ривезень цийнема марясь. Вай-вай, курок ривезькесь сонсь прянзо невтизе: озась пондакшов пулонзо лангс, се чиньжарамокс кужонть якстерьгавтызе! Чаво-чаволкай, оргодть тестэ, поватадызь! Верьгизтнэ пиризь кужонть, кундызь ривезькаенть, понапакшт ансяк эйстэнзэ кадсть.
Келей Коня нулгодсь сывельдензэ, ды течи сондензэяк ёжозо вадрялгадсь. Тесэ Лый-Лай таго ушодсь нолсемензэ. Наждак кельсэ валакавтсь шержей понанзо, сонсь мурнемензэ ушодсь: «А мирде тень понгсь ды а тетяяк — инегуй! Ловажань кис митянзат!..» — верьгизэсь эзь кенере арсеманзо прядомо, тесэ Келей Коня — тоцк! — мукорь прясонзо пешксе пеке аваканть эшкизе, ды истя пек — Лый-Лай натой кеверезь кеверсь, стямс кодаяк эзь стяво. Окойники икельце пильгетнень пезнавтынзе калгодо ловонтень, удалцетнень лангс чалгась. Тарказо! Вечкеманть а мейс невтнемс, сявадыця сельметь улить.
Быр-р-р! — нилезь ловажадонть апаркстомсь Келей Коня. Икеле сон сярдонь ванькс сывельде памшакшныль, ней… Весть натой ломаненсентькак варчнизе. Маныть, дюм якшамоне, кордононь атинесь ледсь лангозонзо, ве пильгензэ тямакакс теизе. Псинь пачк Келей Коня велявтсь сонзэ ёнов, пукшостонзо сывель пал лутась. Ней сон кромождозь якси, покш сэредьксэнь марязь, прок тосо кияк пенгеть лазнокшны.
Лиядояк ризнэсь верьгизэсь: тарказонзо стаянь ветиекс эцесь покш цёразо, Кичкере Пильге. Улкоть сон, превтемесь, сярдо лангс стаянть сайнизе. Ды мезе лиссь — ниле верьгизтэме кадовсть. Зярс мелявтсь теде Келей Коня, Кичкере Пильге таго Уркат латконтень кекшсь. Ды аволь ськамонзо — колмо ялаксонзо марто. Келей Коня эзь сода: самай те шкастонть, зярдо эйсэнзэ мазый од нись нолсесь, сынь, туезь верьгизтнэ, каявсть сярдобука лангс, а се сайсь ды пшти сюросо лазнынзе. Ков а эряви парынестэ апак арсе авольть эцне!..
Келей Конянь а манясак — ёжовдо ёжов сон. Исякак вирень ванстыенть вастнизе, эйстэнзэ чувто алга кекшнезь оргодсь. Атяськак ружиявтомоль, ве узерне тарнось карксамосонзо. Се делянкантень сон капшась, козо ютазь тунда од чувтынеть озавтнезельть. Сонзэ неезь, кирвазтсь левштапо ды адя улю-люнь сеереме. Азё муик Келей Конянь домка латкостонть — эстензэ пизэзэ эль мукшновсь. Лембеде лембе се ды коськеяк. Вакссонзо Лый-Лай сисем онт некшни, лиясто кутморямот веши, ды мезе саят Келей Конясто — одксчизэ ютась, гуляямотнень стувтынзе. Бувала весе авака верьгизтнэ ульнесть сонзэ никс, кармавтоманзо каршо конаськак эзь стякшно, аволь кода ней.
Копорьстэнзэ Келей Коня чукадизе канзёра ловонть, кона нузялдозь певерсь, састынька сыргась Карго лисьмапрянтень. Тов идемтувот валгонить ды сярдот. Лисьмапрясь телень перть а кельмси, ванькс ведензэ Кшна леентень пани. Малазонзо пачкодезь, Келей Коня лотказь лотказевсь: илевколкастонть тарадонь каштордома кайсететсь.
Улема, сярдонь стада валгсь симеме. Верьгизэнть поназо дубушки стясь. Пекелангсо ёзмолдозь сыргась куракштнень пелев. А тосо уш лия стая стакасто лексесь. Ветиезэ, конань Келей Коня ансяк весть некшнизе, — од, кеме рунго, пеензэ тарвазонь кувалмосо. Виев верьгизэсь, ды тунь превтеме. Аволь буканть лангс тенст каявомаль, кундавольть авака сярдо эли вазнэ — таргонь перть сывелест сатоволь. А сынь сайсть ды паро айгоршка атякантень педясть. Арази сявордсак истямонть — сонсь чалгсетянзат!..
Келей Коня аштесь аламнес ды кальтнень потмова чиень чалгавксканзо пизэзэнзэ сыргась. Прев марто а ёмат!
* * *
Ды вана сынь састь, Саранскоень «инжетне». Покш автобус эйстэдест! Ружият-флажокт усксть, соргавкст-пачалгот — улема, сывелень пидемс-рестамс. Сынст прявтсо — сонсь Тимофей Лазарев, пертьпельксэнь ванстомань коряс министрась. Парька пеке, палыця чамастонзо куш пицька верьгедть. Урюпкин марто кедте-кедьс шумбракстась, шназь-васькавтозь:
— Тон, Иван Петрович, тесэнь мазычинть сехте паро оязо, кода улкоть чарькодитинь. Сестэ невтить сынст, тесэнь паро таркатнень. Верьгизэнь стаятнес ветямизь, секень вант тонтеметь тенек а муевить.
Пси ямдо ярсасть, симсть карвотикшень чайде. Удомо мадсть кие козонь: министрась каштлангс эцесь — тосо седе лембе, ялганзо саизь кониктнень-эземтнень. Венть ютавтызь сэтьместэ — килангонь перть куломс, нать, сизесть, Саран ошось аволь маласо.
Стясть ранаяк. Ванькс менелесь алтнесь маней чи: сэняжа ловось циньк мерсь, пичетне Инечинь штатолокс палсть, коштось зэхельтемель.
«Инжетне» пурнызь курмост-кармост, лиссть ушов Урюпкинэнь учомо. Иван Петрович пирестэ кандсь ниле берёмат тикше, кардос совавтынзе.
— Кувать кирдьсамизь? — кевкстизе министрась.
— Мон нейке, кадовсь ансяк нолдамс кисканть, — марязденть апаркстомсь сыре егересь.
— А сайсак мартонок? — эзь кадо министрась.
— Пелян, верьгизтнэнь тандавтсынзе, — згилязевсь Урюпкин.
— Эрь, эрь, сестэ эно прядыть теветь. — Ды сеске тунь лиядо ушодсь Лазарев: — Матря патясь косо, мекс а неяви?
— Вертелимев тусь удомо, курок велявты, — а мельсэ мерсь егересь.
«Инжетнень» а тов саинзе, косольть верьгизэнь пизэтне, — Сиверька лашмов. Лашмось вандора, виртеме, перьканзо сравтнезь паксятне сёвоневть, сюронь покш норовт эзть максне. Текень кувалма эрьва тунда Вертелимень кооперативесь тозонь коромокс видниль пинеме марто кснав.
Лашмонть пиризь эрьва ёндо, ловс нерькстнесть якстере лента марто палкинеть, улю-улю марто, ружиясто леднезь, кармасть стаянь пансеме. Кавто сярдос эшкевкшнесть ды ниле ривезес — ве верьгизлевкскак эзть васто.
— Тон ков сынст, пейсэ клавцкаицятнень, кекшить? — Урюпкинс педясь министрась.
— Верьгизтэме эрятано, сынь тенек а мезекс, — эсензэнтень кемевтсь егересь. — Эрявиндеряй тенк сывель, ве букине сявордовтан. Оно то-ов мольтяно! — кедьсэнзэ невтсь ков-бути васов.
Ледсть ве иень букине, ватказь тушанть кепедизь нурдос, конаньс кильдезель Аташке айгорнэсь, — ды мекев кордонов.
«Оймсеме тей састь, эно мезекс ящик ашо вина усксть, конань автобуссто эзизь ливтеяк, — эськанзо арсесь Иван Петрович. — Ды мень неть «охотникть» — сярдобукиненть вачо верьгизэкс сявордызь… Истя душман ойметнеяк а тейнить… Моньгак визьксчамас ваявтымизь… Саты, тестэ саемат!..»
Кордонось вина чинеде пешкедсь. Азаргадомас киштсть-морасть «инжетне», теке сюпавонь свадьбасо. Зярдо тусть Саранскоев, Матря понгавтовсь мирденть шуба сивес, кижнэзевсь:
— Мень алюхат тей сакшность, вармазей? Апак терде ардсть? Сестэ оно мезе теть ёвтан, назола егерь: вандыке пенсияс туят, марить? Панезь ломанекс теидизь, пертьпельксэнь яжицякс.
— Кордондонть монсь вана кува налкставинь! — Урюпкин кирьга икельга ютавтызе кедензэ.
Лиссь кузтемпес, варштась менелев — тосто модакирьксэнтень валгиця чипалысь вансь лангозонзо верьгиз сельмекс.
— Шка!
Шка-шка, шка-шка! — маласо кальтнестэ шошнозь кепететсь озязонь полк, прок шнась егеренть бажамонзо.
* * *
Лый-Лаень маштомадонть (се сонсь чумоль: атяка сярдо лангс кайсевсь) Келей Коня седеяк пек тармазкадсь. Стаязонзо ансяк вете верьгизнэть кадовсть, сыньгак лавшот-берякшкеть, мартост охотав а сыргат. Верьгизэсь чинь-чоп корнось пизэсэнзэ. Вачочиденть гурность сюлонзо, тошначидентькак куш врадт. Весть се левксэсь, кона ульнесь Лый-Лаень пельде, икелензэ путсь кулозь варака — Келей Коня апак поре нилизе. Мельспаросо кадовозь, левкскенть натой судынес палызе, мезесь мартонзо пек чуросто эрсекшниль. Бути ансяк Лый-Лаень нолсемстэ…
Окойники Келей Коня Уркатонь крута чирентень кузсь. Кузсь, ды прязо веляськадсь. Чевте вармадонть ды ванькс кошттонть. Ушованть тундо эскелясь, пертьпельксэсь тунь одкстомсь. Косо-бути маласо чакасть шекшатат, цирнесть идем тувот. Эх, зяро сывель…
«Читнень стяко ёмавтынь! — пачань кельсэ урнозевсь верьгизэсь. — Яла Лый-Лайде ризнынь, тесэ мазыйка тейтернезэ монь вакссо касы-кепети, мекс а ни тень?..»
Окойники Келей Коня стаинензэ домка латконтень валгстызе. Певтеме олячинть марязь, сетне вейкест-вейкест тулкаезь налксезевсть, лисезь пейсэ вешксезь. «Саты, какшт-эйкакшт, истя моньгак правтсамизь», — састь Келей Конянь кежензэ ды лапасонзо истянь зняро «макссь» эрьвантень, тонат мик цийнезевсть.
Пачкодсть се пиченть алов, ков бувала атяка верьгизэсь оймень таргсеме лотксиль, ды тесэ повазь кавто вазнэс эшкевсь. «Те кие сынст, мень азорт совасть вирезэнь?» — неезденть апаркстомсь.
Таргоютко ярсасть анок сывельденть, таргонь перть ойкстнезь-вайкстнезь валгонесть пизэзэст. Вачо эрямс — сэпей майсема, седеяк апаро, зярдо сывельде налкстават. Ды сывелеськак кольсь-чиниясь. Секень вант эйстэнзэ пильгеть венстьсыть.
Келей Коня лоткавтызе латконтень валгонеманть, левкстнэньгак кардынзе: «Курок минсь сярдо поватано, монтемень васов илядо тукшно, апештявикст».
Стаязо виевгалесь, Келей Конянь поназояк валакадсь, сельмензэ ёжов мизолкссо пештявсть. Сывелесь свал сывель!
Весть латконть потмова апак капша эскелямсто Келей Коня се стаянть васолдо неизе, кона вазтнэнь, улема, повинзе. Ветиест сондензэ сэрей, эчке пильгетнень кеместэ путнесь, виень марязь. «А фатяткак, кода машттанзат, — арсезевсь Келей Коня. Ды сеске лиядо ризнэзевсь: — Кордононь азороськак кежензэ пандсынзе. Кавто ёндо пиримизь, ков иля варшта, веенст ятт перькан. Саты, сизевтимизь…»
Стаянзо сон тов сайсы, ков эзь бажаяк понгомо, — Сиверька лашмов.
* * *
Пелеветь, зярдо удомась а педи, Иван Урюпкин кузтемпес лисни. Озы чувтонь креслантень, конань сонсь пурнызе, сельмензэ тов педявтни, косо Кшна леесь човов толкунт пансекшни. Ды эзь содаяк — мельганзо Келей Коня ванны. Нурька пирест томбальде, цветиця акациятнень потсто. Ськамонзо тов кекшниль, стаявтомонзо.
Мельганзо пансеманть Иван Петрович одс ушодызе. Вирьганть ды Уркат латкова ружия марто яксезь, карксамосонзо кандтнесь пшти узерне. Ков эзь совсе-валгоне, стаясь эзь понгоне каршонзо, теке ведьс ваясь. Урюпкин чарькодсь, мекс вачо пеке се эзь кирдтне. Охотав эрьва лисемстэ Келей Коня верьгизэнзэ кармавтнесь вирьракшань назёмсо ваднеме — истя эсест чинеденть явныльть. Таркатненьгак Келей Коня полавтнесь. Неиль сярдонь эли идем тувонь стада, видьстэ каршост лисиль – чинест эзь маряво!
Весть сон егеренть лиясо абунгавтызе. Зярдо Келей Конянь чичавт куродызь, верьгизэсь сайсь ды Кшна леентень чопавтсь. Чичавтне пурнавсть судонзо лангс — истя пряст ванстыксэлизь, тесэ верьгизэсь чопавтсь кельме ведентень, — сетне сельгень прамс ваясть.
Келей Коня истя тонадсь егерентень, натой а пелиця оякс эйсэнзэ ловсь. Кежть, чарькодеви, кирдсь — пильгес ранякшнызе, сэредьксэсь нейгак марявсь, а вана повамс сонзэ — и-и! — теде эзь арсеяк. Виресь покш, потмозонзо весе кельгить, кадык сонгак, атя-атинесь, эри-майси, поланзо вакссо бобкат кайси.
Весть чинь куншкане, зярдо чипалысь калязь пачалгокс тыжнэсь, Келей Коня мадсь Сиверька лашмонтень чулксетиця карязонзо оймавтомо, тесэ косто а косто икелензэ омбоце стаянь ветиесь полонявсь. Поназо сёрмав кикс марто тюжала, прязо теке букань. А уш сельмензэ, сельмензэ… Мекев-васов яксицят, пиже толт нолдтнесть.
Келей Коня васенцекс каявиксэль, ды кодат тесэ «изнямот» — эйстэнзэ сонсь пулонь нолдазь оргодсь.
Пачкодсь пизэнзэ икелев, кона кевев латкос чувозель, тандадомадонть озазь озавсь. Икелензэ усксевсть повазь ниле левксэнзэ. Ськамонзо веженсь тейтернесь, Лый-Лаень седейпельксэзэ, потяка кискинекс цийнесь. Жив, пиштякась…
Пижень-ожонь нолдазь Келей Коня урнозевсь, певтеме ризкссэ пештявсь…
* * *
Вертелимесь гувт-бувт кепедсь: велень стадасонть вете реветь повазельть. Чить, зярдо ломантне тикше ледсть. Ве ревенть верьгизэсь каизе сявдиксэнзэ трокс ды — заповедникев. Кемнилеешка иесэ кавто цёркатне, конат стаданть эйсэ вансть, чийсть правленияв, икнэзь-пикнэзь ушодсть ёвтнеме, кода те лиссь, мекс реветне эзть идеве.
Семён Борискин, кооперативень прявтокс а умок сон кочказель, ушодсь ладсемест:
— Верепазонтень ознодо живстэ кадовоманк кис. Реветнень а велявтсыть, ды сынтеместкак а ёматано, уш кодаяк…
Зыяндонть марязь, Урюпкин пурнынзе курмонзо-кармонзо, ружия марто заповедникев капшазевсь. Верьгизэсь косояк маласо оймси, сывеленть апак сэве а кадсы. «Повицясь аволь Келей Коня, охотав сон а лиси ськамонзо — стаявтомо кадовсь. Улема, велень стаданть лангс се душман верьгизэсь кайсевсь, кона сась тей шабра виртнестэ».
Се стаянть Иван Петрович ансяк весть некшнизе, сестэяк сонзэ вакска тандадозь се оргодсь. Васенцекс ветиезэ кекшсь, кона, неяви, нумолонь седеель. «Пушкасто» Урюпкин эзь бахаде, ансяк улю-лют пижнесь мельганзо.
Ютызе Сиверька лашмонть — понгсь пакся чирес, косо Вертелимень коряс шабраст, Сергей Понетайкин, тикшекс ледсь пинеме марто кснав. Се лоткавтызе «Беларусензэ», лиссь каршонзо.
— Верьгиз эзить некшне? — пшкадсь тензэ Урюпкин.
— Келей Конянь? — пейдезевсь трактористэсь.
— Тон косто содат, сон Келей Коня? — талакадсь егересь.
— Косто, косто… Дык мон тунда, сюронь видемстэ, а весть сонзэ некшния. Левксэнзэ марто пильгень усксезь тия яксесь. Левкскесь берякшке — ирдезэнзэ неявсть. Исяк одс сонзэ вастния, ревень салсицянть. Оно тосто, — Понетайкин ахолдась килейбулонть пелев. — Мезе, ледьсак?
— Те монь безарьксэсь, — апаркстомсь Урюпкин.
Невтезь таркантень пачкодезь, лавтовсто Иван Петрович ноцковтызе ружиянть, пштистэ варштнезь пурдась Вертелимень кинтень. Тесэ кутьмерезэнзэ теке уро нерькстасть. Сон велявтызе прянзо ды эль эзь сяворе неезденть: алкине латкосто лангозонзо вансь се атяка верьгизэсь, кона пукшос сусконизе. Тензэ эль содавсь. Пулозо невелезь, латякарьшка кургозо пейтеме, сельмензэ наволат.
— Те тон, сыре душман?! — пижакадсь Урюпкин.
Весе рунгосо соракадозь, Келей Коня егеренть лангс каявиксэль, ды виензэ, нать, эзть сато, пеке лангс мекев рестедевсь. Сельмеванзо ожо толт кивчкадсть. Стакасто лекстясь сон меельцеде ды канкстомозь канкстомсь.
Урюпкин велявтсь Понетайкин ваксс, кона моторсо озясь, ёвтнесь тензэ апак учонь вастовомадонть.
— Сынсткак, верьгизтнэнь, ломантнень ладсо эрси, — мельтеме мерсь трактористэсь. — Зыянонь кандтницясь эсь зыянтнэде врадокшны.
— Реветнень сон повсесь левксэнзэ трямга, — Урюпкин снартсь пачанть идеме. — Миньгак теке верьгизт!..
Ды паксянть пева сыргась Ташкинав пенсияс туемадо конёвонь максомо. | 
