МАРКОВНА
Очерк
I
Мезде идемкаргтнэ кулдордыть лембе масторов ливтямсто? Ойме сэредькстэст – сёксень кельметнеде сынь кадыть чачома масторост, пизэст-нежест. Кадыть сень, мезенть марто сюлмазельть тиринь ёнкссо.
«Курлы, курлы, курлы...»
II
Кирьгазон теке сэпей сэря кеверсь, кодаяк а нилеви. Аштян вирь чиресэ, ванан нармунтнень мельга, ды апак учо ледстявсь тень Серафима Марковна Люлякинань морозо. Тосо ёвтневи седе, кода ве авась кевкстнесь ливтиця письмартнэнь ды цянавтнэнь войнас ёмазь цёрадонзо. А кулят сонзэ пельде, а сёрмат-сёрминеть. Кевкстни авась нармунтнень, козонь какшозо калмазь, козонь ловажанзо валязь.
Виев сёлмсост чавозь, нармунтне капшасть тов, косто эйстэст ламотне а велявтыть. А цидярдсызь кинть эли душманонь пулядо сяворить, кода моросо аванть ёмазь цёразо...
Нармунь морокс кадовсь эрзянь поэзияс сонсь Серафима Марковнаяк. Ды кодаяк тень а кемеви: зярдояк сон а сови миненек, а озы столенек экшс прякадо ярсамо, миньгак Поля ним марто тензэ а соватано. Натой Саранскоень икелень квартиранзо икельга пелян якамо: чаво, нусманясто ваныця вальмат, подъездстэнть лиснить асодавикс ломанть... Вана тезэнь, лазонь кавто эземтнень лангс, путнизь сонзэ кандолазтнэнь, эйстэст сон вансь телень якшамо менельс пекстазь сельмсэ, лангсонзо ульнесь сэнь, сехте вечкевикс платиязо, конань тензэ казнизь чачома чистэ тейтерензэ...
Арась эрзянь истямо веле, косо а морсевельть Марковнань моронзо. Оренбургсо сынст морсить, Пенза ёнкссо ды Татарстансо, Чувашиясо гайгить моронзо ды Самарасо... Самарадонть уш кортамскак а мезть – тосо Марковна чачсь, тосо васенцеде лиссь клубонь сцена лангс, тосонь чевте модась саизе сонзэ пингеде пингень эрямос. Марковна оймси свалшкань удомасо – моронзо аштемат а содыть. Сынь ломань седейс совасть певтеме кенярксокс ды уцяскань сэпштекс, сынь мештть чевтемгавтнить, сувов мельть сэвтнить. Аварьгадат, зярдо марясак «Од шкам ютась» моронзо:
Нармунть чоледить,
Сиянь лейть чудить,
Пиже лугава
Горниповт цветить.
А монь седейсэнь,
А монь седейсэнь,
А монь седейсэнь
Кирмалавт пупить...
III
Васов гайгстась Серафима Марковнань вайгелезэ, пек васов. Моронзо эрьванень малавикст ды чарькодевицят.
Костонь те простой ды теке шкасто Пазонь чансть марто эрзявась? Самарской областень Похвистневской райононь Ягодное велень. Виде, чачсь 1922-це иень июлень 29-це чистэ шабра Подбельск станциясо, а вана мерть весе эсь пингензэ Ягоднойсэ печтизе. Тесэ сон важодсь «Садовод» совхозсо, тесэ тринзе-кастынзе сисем эйкакшонзо, сёрмадынзе васенце моронзо ды ёвтамонзо, тесэ... Люлякинань чачома Рав томбальксэсь – эрзянь фольклоронть куншкакурозо. Сон казсь минек литературантень истят содавикс лемть, кода Василий Радаев, Артур Моро, Пётр Кириллов, Алексей Лукьянов, Дмитрий Морской, Артём Весёлый, Михаил Втулкин, Числав Журавлёв...
Морамо ды моронь складямо Серафима Люлякина кармась уш вишкапингстэ. Те тевсэнть васенце сонзэ тонавтыцякс ульнесь сырькаезэ, Анисия Ефимовна, кона эрясь мартост сядо вете иеть ды конань моронзо содылизь Самарань келес. Нуцьканзояк сон тонавтсь моронь ладсеме ды эрзянь келенть мазычинзэ марямо.
Весть кортазевинек теде Серафима Марковна марто, вана мезе сон ёвтнесь тень коряс:
– Бабам муницянь кондямоль. Орожияль, лиякс ёвтамс. Ноготт-бобкат кайсекшниль, тикшень корёнсто лакавтозь ведьсэ лециль. Ломантне сакшныльть тензэ апак лотксе. Вирев надобиякс тикшень пурнамо ламоксть сайнекшнимим моньгак.
Та-кода сыргинек мартонзо васоло вирев, кона эйстэнек кеменьшка вайгельбеть, молемстэ, а стувтса, ушодсь эйсэнь тонавтомо:
– Морамсто, левкскем, вайгелеть пек иля таргсе. Пижнезь-рангозь, морось ойместэть а чамдови. Минек велень буканть оно кодамо кирьгапарезэ сезнезь сезни эйсэнзэ, – ды лезэсь цёков нерьшка. Цёковокс, левкскем, морак, сонзэ чоледемась седейть калавтни...
Кизэ куншкань општ пси чиденть ды чеерень карькссэ поназь киденть ланганок ливезь чудсь, а тесэ сон апак учо лоткась, прянзо лангс комавтызе илёвонь кептернензэ ды адя морамо.
Марковна марто ялго мон колмоксть ютния те кинть, ды эзинь кирдеве, кевкстия, кона таркантень сынь сестэ лотксесть.
– Кодак лисят Покш Толканонь вирьстэнть лугалангонтень, тосо касы каль. Ки чиресэ, ськамнензэ. Стувтык сонзэ? Се чувтонть ало весть мартот чиньжарамот чулгсинек...
Ледстявсь сёксень се чись, ды а ён тень теевсь... Марковна марто сестэ Покш Толканов якинек «Сятко» журналонть лангс сёрмадстомань ветямо. Васня мартонзо колхозонь правлениясо ульнинек, мейле паксясо. Якстерькаень таргицятнень икеле Марковна морот морсесь, мон квитанцият сёрмалинь. Ягодноев сыргинек ялго. Машинасояк усковлимизь, ды монень сась мель эсь пильгтнесэ онкстамс се моданть чевтечинзэ, конадонть Марковна прянь шназь яла кортниль: «Минек ёнкссо пильгтне а сизекшнить».
Ютынек луганть, лисинек... Вай, те мень тамаша?! Икеленек аштиця паксясь трокс-келес мерят граць полксо вельтязь. Ды неть кенерезь чиньжарамот! Пряст сувтемешкат, раужодо раужот. Совинь потмозост, вейкенть пувордыя-сезия, омбоценть...
– Зняротне мезекс теть?! – абунгадсь Марковна.
– Калгсемс, – кортан, – минек велесэ чиньжарамотнень виднить ансяк силосокс...
– Ды эдь ломань юткова тенек ютама... Тесэ истя а тейнить!
Мейле ледстязь каленть алов лоткинек. Мон капшазь карминь видьметнень мендердямо, Марковна чаво прятнень латкс кандтнесь ды яла чиень ладсо «тонавтсь» эйсэнь:
– Тынк велесэ, мерят, истят паксят арасть? А тон содат, чиньжарамо ой вельде тесэнь колхозось прянзо три?..
Визькс тень ульнесь, ды мезе теят – сельмень сявадоманть кургозо а пекставкшны...
IV
Мон ламоксть эрсинь С.М. Люлякинань семиясо, содасынь весе тейтерензэ. Нилетне – Света, Тамара, Зина ды Лена – эрить Самарасо, Галя – Тюменьской областьсэ. Ламоксть сынь ульнесть минек кедьсэяк, Саранскойсэ. Мезесь васенцекс каяты мартост вастовомсто – сынь, аваст ладсо, панжадо седейть, а маштыть манчеме. Мелест видьстэ ёвтасызь, чирь-ёжов арсемавтомо.
Нама, теньс тонавтынзе аваст. Ломань марто Серафима Марковна сонськак кортниль чевтестэ, валонзо ульнесть истят, кодат марят ансяк фольклорсто: «тиринем», «меште пенчкем», «какшом», «ялакскем»... Зярдо васенцеде пшкадсь тень истя – абунгадынь. Кудосо натой «цёрам» валось пилезэнь эзь пачколе, а тесэ, Ягоднойсэ, теке тиринь авань марто вастовинь, кона кулось, зярдо тень ульнесть кавто иеть... Ды аволь ансяк Ягоднойсэ, Саранскойсэяк, кода а вастовилинек, неть валтнэсэ свал лемдсь эйсэнь. А стяко сынст мон совавтынь «Кочкодыкесь – пакся нармунь» васенце эсь романозон. А сёпса, эрзянь ламо стувтозь валт тень казсь Марковна. Сыль миненек, мон, кода свал, тензэ ушодылинь сёрмадовксом ловномо. Кунсолы, кунсолы эйсэнь вечкевикс инжесь ды апак учо лоткавтсамам: «А тезэнь, какшом, эсенек лемть путт». Ды карми ёвтнеме, кода сынст велесэ мерить щукантень (нучко), карпонтень (курда), линентень (сэней) ды истя седе тов. Ламо тикшень лемтькак тень ёвтнесь, конатнеде икеле эзинь марсеяк. А эдь сынст – народонь певтеме сюпавчинть – ламо томсо нолдазь минек фольклористтнэнь «трудстосткак» а мусыть. Вана мекс сказительницанть творчествасо а вастат рузонь валвелявкст, вана мекс сон сёрмадськак лембестэ-шождасто – эрзянь келенть пек парсте содылизе!
Марковнань вечкилизь Самара ёнкссо, пек вечкилизь. Свал учость эйсэнзэ Саранскойстэ, косо сон эринзе меельце кемень иензэ. Весть та-кодамо тевень коряс ардынек мартонзо Похвистневав, ков а соватано – однэк-сыренек палсить эйсэнзэ. Пачкодинек Клявлинской районов – таго истямо жо вастома тензэ тейсть. Ёгa велесэ, а стувтса, Марковна покш концерт невтсь, велявтынек Ягодноев – тесэ уш эйсэнзэ таго автобус учось. Ардсть васолдо – Оренбургской областьстэ, – энялдсть киштемс-морамс сынст велень клубсонть. Тосто сазь тердицянть, библиотекаренть, Марковна содылизе ды, сень лангс апак вано – ушосонть поцердсь пиземе, – сыргинек. Мартонок ульнесть Тамара ды Лена тейтерензэ ды нуцькинезэ. Пачкодинек веленть пес (стувтыя лемензэ) – асфальтось прядовсь, седе тов автобусось рудазганть эзь ютаво. Кавто вайгельбетнень савсь шешкемс ялго. Нуцькиненть (тензэ колмо-шка иеть ульнесть) мон кандынь велькс потсо беремасон. Пачкодинек Культурань кудонтень – оршамканок куш пурдыть. Уштозь голландка икеле костинек сынст, симинек ловсо марто пси чайде – ды сцена лангс. А уш зяро ломантнеде кунсоломонок пурнавкшность – мекшвелекс залось бизнэсь: «Сима патясь сась! Марковна инжекс кедьсэнек!» Мон ёвтнинь эрзянь литературадонть, ловнынь эсень стихень. Ды вана тарказон арась Марковна. Лангсонзо эрзянь викшнезь паля, кирьгасонзо якстере покш кирьгашат, эсензэ чамась цитнезь цитни.
– Кодамо моросто ушодтано, седейбельксэнь? – пшкадсь сон залсо учицянстэнь.
– «Эрзянь картнестэ»! «Эрзянь картнестэ»! – залось тундонь чадыведекс шалнозевсь.
Марковна ушодызе се моронть, конань вечксызь весе эрзятне. Эйсэнзэ ули, нать, истямо нилькс-зэме, кона чарькодеви ансяк седейсэ.
Истямо концерт сестэ Марковна тейсь – ломантне веле пев ильтимизь, автобусонь учома таркантень. Пиземень пачк.
Ягодноев мекев ардомсто, течис тень а стувтови, Марковнань кевкстия, кода сон моротнень ладси.
– Монськак а содан, тиринем. Прязон валтнэ ды гайттне ве шкасто пракшныть, кода-бути апак учо. Те ней моротнень столь экшсэ сёрмадан, совхозонь паксясо важодемстэ комат модамарень бороздантень – турватне чевелить, пря удемесь эсензэнть мезенть-бути теи...
V
Марковна истямо седеймарицяль, кодат вастнинь пек аламо. Покордамонь валт сон аздыль, весенень пшкалиль ансяк ойме валсо. Мезе, уцясказо валаняль, эрямосонть нужат-ризкст эзь некшне? Вай-вай-вай... Од тейтернель, зярдо Отечественной Ине войнась ушодовсь. Солдатокс, нама, эзизь сае, а вана Сталинград ало траншеят чувнось – тень ковгак а кекшсак. Ломонь ды коймень кепсемадонть карязонзо куломанзо самс чулксететсть. Кодат вачочить-майсемат тосо кирдсь, теде эзь вечке ледстнеме. Ансяк весть инжекс кедьсэнек улемстэ видькстакшнось:
– Эринек модань кувака кудосо. Землянкань кондямоль сон. Масторов каязь кельме лаз лангсо удсинек. Виде, мейле олгт косто-бути тенек усксть, прянть вельтясак нуласо-валасо – ды истя валскенть самс. Стявтнильть эйсэнек ранаяк: латконть эрявсь чувомс седе бойкасто – немецтне уш Сталинградсольть, снартнесть Саратованть ды Самаранть пачк ютамо. Паро, минек солдаттнэ муизь инегуйтнень пест, чувозь траншеятнеяк эзть эряво...
Видьстэ ёвтамс, мирде экшсэяк Марковнань часиязо а покшоль. Аксуноль мирдезэ, пек аксуноль. Важодсь сон шабра колхозсо бухгалтерэкс, эрясь ве довинень кедьсэ, кудов чуросто сакшныль.
А тесэ Толя цёразо... Тусь Казахстанонь целинав, комбайнасо сюронь пивсэмстэ паксязо кирвазсь... Валгсь мадстемензэ ды сонськак палсь. А стяко Марковнань весе лайшеманзо алтазь вейкине цёранстэнь...
Кото иеть важодсь Подбельск станциянь лавкасо. Тевензэ парсте мольсть, ды тесэ... Теде киненьгак эзь ёвтнекшне, ансяк монь нинтень, Полянень.
–Весть капшан колмо тыщат пурназь ярмактнэнь марто сбербанков, – видькстась тензэ Марковна, – тесэ каршон вастовсь тосонь важодицясь, минек велень вейке цёра. Кенярдозевинь вастомантень ды мерян тензэ: «Вай, кода паро, вастовить тень. Монень аютко, Лена тейтерем ормалгадсь. Саить ярмакон ды путыть сынст монь пельде...»
Тона алтась лездамс. Теде мейле чи юты, омбоце – квитанциянть се ломанесь кодаяк а канды. Истя стувтовсть ярмактнэ. Ледстявсть ансяк ревизиянь теемстэ (эзть сато). Мольсь Марковна тензэ кудос, сон теке цётмарсо пря ланга лоштизе:
– Кодаткак ярмакт тень эзить максне!
– Сестэ колмо тыщатне покш ярмакт ульнесть, аволь кода ней – лангозост пондо сывельгак а рамават. Тюрьмас озавтовлимизь, ды Верепазось, нать, превть тень макссь. Саинь ды сёрмадынь Ворошиловнэнь, сестэнь ЦИК-ень прявтонтень. Те ломанденть ней эрьва кода сёрмадыть: апароль, келя, сон, инегуель... А вана монень, тензэ тунь асодавикс эрзявантень, лездась: весе ярмактнэнь простявтынзе. Меельце лекстямозон карман парсте эйстэнзэ арсеме! – чамдсь потмонзо Марковна.
VI
Саранскойсэ Серафима Марковна эрясь кемень иеть. Те шканть перть сон нолдась кото книгат. Теде башка, стихензэ, сказонзо-ёвтамонзо ды пьесанзо лиснесть газетасо ды журналсо. Моронзо сеедьстэ гайгсть радионь пачк. Телевидениясо невтнесть эйстэнзэ фильмат. Школасо, вузсо сонзэ произведениятнень коряс ютавтневсть семинарт. Лиякс меремс, С.М. Люлякина эрзянь культурасонть теевсь истямо тештекс, конань эйстэ свал срадсь валдо. Сон казнесь те валдонть весенень. Поэтессась-сказительницась сцена лангсо ды эрямосо эзь снартнеяк налксеме кунсолыцятнень-ловныцятнень марто, ломантне истякак несть: оймезэ мазый. Покшкавтнеме эзь машто, прянзо невтсь истямокс, кодамокс ульнеськак: велень авакс, конанень мезе ансяк эзь савкшно печтямс. Текень кувалма оймезэ свал аноколь лездамо.
Мезть сёпомс, неень литератортнэстэ кой-кить поэтессакс сонзэ эзть лово. Вейкенть пельде натой истямояк марякшнынь: «Ниле класс марто – ды поэзияс!» – «Максим Горький, – кортынь тензэ, – школасо ве чияк эзь тонавтне, сестэ сон аволь писатель?» – «Хе-хе, – таго згилязевсь «покш» поэтэсь, – муить кинь каршонзо аравтомс. Леонид Леоновгак сисем класст прядсь, ды сон академик!»
Арази Мордовиясо аламо поэтт ды прозаикть, кить «эсь творчестваст» вельде вешезь вешсть почётонь лемть-казнеть, а вана ловныцяст-вечкицяст арасть. Косот ней сынст романтнэ ды поэматне, косот «кочказь произведенияст»? Паро, аволь истятнэ теить алкуксонь литературанть.
Эрзянь поэзияс С.М. Люлякина сась 1982-це иестэ, зярдо лиссь «Моронь гайть» стихень васенце книгазо. Те сборникенть мельга чачсь омбоцесь, мейле оштё ниле книгат. Эрьванть марто кассь поэтессанть-сказительницанть ёрокчизэяк. Тиринь валтнэ эрьге керьксэкс кодавсть-полалевсть моронь каштазозонзо.
С.М. Люлякинань творчестванзо питнеекс ловизь республикань эрицятне ды правительствась. Тензэ максозь Мордовия Республикань Государственной премиянь лауреатонь ды Культурань заслуженной роботник лемтне. Сон ульнесь художественной самодеятельностень Всесоюзной ды Всероссийской смотрань лауреатокс.
Ды ялатеке сави видькстамс: Марковнань творчестванзо кепедемасо покш таликазо Иван Корнилович Инжеватовонь. Те сон, эрзянь содавикс учёноесь, ульнесь сказительницанть туртов аволь ансяк омбоце мирдекс (васенцесь умок кулокшнось) – секретарекс, витницякс, издательствава-кува чийнемаськак аштесь сонзэ лангсо.
Иван Корнилович анокстынзе печатьс весе сеть произведениятнень, конатнень Люлякина сёрмадынзе меельце кемень иетнень перть. Сядот стихть, морот, пьесат, балладат... Пурнынзе сеть статьятнень ды ледстнематнень, конатнень алтызь Серафима Марковнанень эрзянь учёнойтне ды журналисттнэ. Кодамо покш робота! Минек издательствась нолдась башка книга. Сон кадови сказительницадонть а стувтовиця ледстнемакс.
Марковнаяк ламо иес одкстомтызе Иван Корниловичень уцясканзо. Сынь вечксть вейкест-вейкест, те вечкемась валдомгавтсь сёрмадома тевест, кепедсь од мелест-арсемаст.
VII
Марковна маштыль раксемеяк, лиясто кежензэяк лангозот пансилинзе. А вана се анекдотонь кондямось, кона 1986-це иестэ лиссь Зубова Полянасо, пеедсти.
Мольсь сёксь. Празь лопатне пильгало каштордсть коське тарадокс. Те зярдо сынь эскелясть асфальт ланга. Сынь – стихень ловномо Саранскойстэ сазь инжетне: Марковна, Михаил Петайкин, Иван Осьмухин ды Виталий Юшкин. Капшасть кодамо-бути заводов. Валскень шкава, ранаяк. Кода мерсть тенст райкомсо, ловныцятнень марто вастовомась ушодови кавксо чассто.
Прядовсь асфальтось – тусь рудазов ки. Ланганзо стака молемс, ды мезеяк а теят. Ветясь Михаил Петайкин. Мельганзо мольсь Марковна, сонзэ чалгавкстнэс путнесь такшардыця пильгензэ Иван Григорьевич, сех меельцекс эскелясь Юшкин. Истя, арсян, лиснить охотав ансяк верьгизт: одтнэ ды виевтне куншкасотнень ванстасть.
– Хе-хе, – секе тев коморо потс козкстнесь Осьмухин.
Кедьпесэнзэ лыйнесь портфель. Улема, тосо стихензэ-мезензэ кандсь, пей алов путомапелензэ. Чоп апак ярса врадат. Ды зяро эряви сонензэ, куконька атинентень, – сэрезэ эйкакшкень, коське рунгине. Озязонь ярсамкаськак сатоволь!
Пачкодсть заводонь ортатнень икелев. Робочейтне пуромсть, ды начальствась эзь са. Юшкин ве ёно таргась, Осьмухин Марковна марто эзем лангсо оймсесть.
Петайкин мольсь Юшкин ваксс, корты тензэ:
– Григоричень портфельсэ мезе-бути калдорды... Улема, суликине кандтни, идемевсесь. Поездсэяк чатьмонсь, тесэяк.
– Гостиницасо манясынек, – алтась Юшкин. – Ансяк кода – те тонь тевесь. Арсек, брат, – тантейстэ нолштынзе турванзо.
Се чистэнть колмо коллективсэ сынь ульнесть, столовоевгак кенерекшнесть, пектне эзть каравкшно. Мезде тосо яксемань перть тошксесть Марковна марто Петайкин – сынсь содасть.
Чопоньбелев састь гостиницав. Цёратнень ве номерс тонгизь, Марковнанень макссть башка комнатыне.
Цёратне кайсесть, шлясть-нардасть, Петайкин ушодсь видьстэ тевстэ:
– Течис яла дивсян, Григорич, кода ськамот эрят, нивтеме?
– Бе-ряньстэ, пек бе-ряньстэ! – авардиця вайгельсэ ушодсь пеняцямо поэтэсь. – Лиясто тошначиденть куш врадт. Ве бабине ветякшнынь – нузяксто нузяксоль, лавкавгак эзь кучневе. Монень – сизьгемень кавто, сонензэ – кодгементнень малава. Тонадсь кукокс эрямо. Пания...
– Кода арсят сень коряс: Марковнань теть чиявтсынек? Кавоненк оля азорт, кудоват письмаркс ливтневлиде. Марковна истят ямт-кашат теть пиди – келетькак нильсак. Пенсият покш?
– Покш, покш, кавонек туртов вана истя са-ты!
– Иван Григорьевич ахолдась кедьсэнзэ кирьгапарензэ трокс, теке пеельсэ.
– Сестэ адя чиявтомань тевтнень якавтсынек. Васня минь соватано, мейле уш тон, – налксезь ладсо поладсь Петайкин.
Юшкин цють эзь сяворе ракамодонть, ды, нать, винань тансть икелепелев марясь, кургонть пекстызе.
Марковна кунст мадезь аштесь таркасо. Сизесь чинь-чоп, нейке сутямоволь.
– У-у, ормаза кискат! – каявсь сон алюхатнень лангс. – Сыре ломань манчетядо. Теде Корнилыч мариндеряй, сельмезэнк сельги.
Осьмухин чуросто эрсесь поэт ялгатнень ютксо, седе – Люлякина эри Инжеватов марто – эзь сода, а тесэ сыре превсэ сыргась васоло районов ломань лангс, паряк, меельцеде варштамо, ды вана тензэ од кеняркс: урьвакстомань тев тензэ ладясть...
Иван Григорьевич совась Марковнань комнатынес ды – клавцк! – столенть лангс стявтсь сулика ашо вина. – Те мезень кувалма? – ёжовсто кивчкадсть Марковнань сельмензэ. – Те мень Инечи ушодыде?
– Нуртнек, Григорич, тон ютксонок сехте покшось, – эзь кирдеве Петайкин, сонсь судонзо эйсэ човсесь, мерят тона киневтсь.
Копордасть-сусксть, тесэ Осьмухин эрязкалезь-талнозь ушодсь:
– Марковна, тон ськамот эрят? Ськамот. Монгак ськамочиденть налкставинь. Кудом бояронь, перьканзо инзейть кенерькшнить... Куш кудосо оймсек, куш ушосо. Таштазь ярмашкеньгак улить, – чиявтомань тевесь атянть оймензэ, неявсь, допрок калавтызе.
Ух, Марковнань чамаумарензэ вина цяркавтомо мако цецякс кирвазсть!
Мазыель сон, ламо цёрань седейть, улема, пултась.
Таго копордасть. Суликась прядовома лангсоль, тесэ Марковнаяк эзь кирдеве, ёжовсто ёртсь:
– Ламо ярмакт, мерят, таштыть? А сон... тонсесь... маштови?!
– Мезесь а-рась, се арась... Тень теть а алтаса... – Осьмухин комнатаванть синдезь пильге варакакс кирнявтнезевсь. –
И-ить, оймень таргийть! – окойники паро ёжос сазь, чирьстэ варштась сон цёратнень пелев ды раказевсь.
Тонаткак пейдсть. Мейс тенст а пейдемс – урьвакстомань тевесь пожарт эзь кирвазте, вина градустнэяк рунговаст верь пансесть. Пазонь уцяска!
Уш эсест номерсэ таркань калавтнемстэ Осьмухин моткодсь судо алов: –
Винанть мон пильгень ваднемс сайния. Ды мезеяк, од одирьвань неемстэ пильге санонь чулксетемась потась...
– Те вадря погодас, Григорич. Иля мелявто, ванды эсетькак каванятадызь, парот пандсынек, – ладсесь атянть Юшкин.
Осьмухин пелевес эзь матедеве – таркасонзо яла велявтнесь.
Кшнинь койкань чикордоманть пачк цёратне арсесть сыречикс велявтыця нусманячиденть ды сынськак эзть фатя, кода матедевсть.
VIII
Ды весенень тунь апак учо Марковна ормалгадсь. Путызь больницяс. Эрявсь теемс тензэ операция. Хирургтнэ алтнесть стявтомонзо пильге лангс. Сехте пек теньс кемевтимизь Ивочкин. Мезеяк, келя, сюло пензэ керясынек – кувака пинге эри. Седеезэ кеме, чамаскак сон шумбра...
Сеедьстэ совсинь тензэ Светотехстроень больницяв. Ладсинь эйсэнзэ кода маштынь. Сакшныльть лия малавиксэнзэяк.
Васенце операциясь парсте эзь тееве, мезенть кувалма чова сюлонтень теевсь варя – те саизеяк Марковнань эрямонзо...
Меельцеде кортынек Марковна марто январень 15-це чистэ. Якинек тензэ ниленек: А.М. Шаронов, Валя низэ ды мон ним марто. Васняяк совасть аватне. Полянь Серафима Марковна кевкстизе: «Дочам, те кие мазый авась?» Тона ёвтызе. Марковна кецязевсь, кармась Валянень сюкпрянь ёвтнеме Александр Марковичень сондензэ статьянть кисэ, кона меельце читнестэ лисекшнесь «Советская Мордовия» газетасо.
Мейле минь совинек. Яла ладсинек эйсэнзэ, кортынек пичкамодонзо. Марковнань чамазо тюжаль-тюжаль, лексесь сон стакасто. Нилеце операцияськак лезэ эзь кандо.
Омбоце чистэ обедтэ икеле мон сынь больницяв нинь ялаксонзо марто, кона хирурголь. Кортнинек врачтнэнь марто, мейле совинек сэредицянтень палатас. Сон удось. Вакссонзо, кода свал, аштесть тейтерензэ. Сынь уш омбоце недля, вейке-вейкень полавтнезь, ардтнесть Самарасто, яксесть мельганзо. Марковнань ёжозо седеяк берянель, ды минь уш содылинек: те вастовомась ули меельце.
Омбоце чинь рана валскестэ Зина тейтерезэ звонясь тенек ды...
IX
«Курлы, курлы, курлы...»
Аштян вирь чиресэ, идем каргтнень мельга ванан. Нусманя мородост кирьгазон теке сэпей сэря кеверсь, кодаяк а нилеви. Ливтясть нармунтне, тиринь масторост марто явсть...
Превей нармунть, совадо Ягодное велес, сюконядо Марковнань калмонтень. Ёвтадо-пачтядо: минь сондензэ свал ледстнетяно, свал!
Ветицяст мерят маринзе-чарькодинзе валон: явовсь лиятнеде, кепететсь седе верев, яходсь келей сёлмосонзо ды мекев стясь полконзо икелев.
Верьга-менельга
Каргонь полк ливтясь,
Каргонь полк ливтясь
– Таго тундось сась...
Пачкодить-арась сынь Ягодноев? «Пач-ко-дить, пач-ко-дить», – чавсь-кемевтсь седеем. Ды таго Марковнань морозо мештьсэнь гайгезевсь:
Вай, монь седейзэнь,
Вай, монь седейзэнь,
Вай, монь седейзэнь
Телень ловось прась...
| 
