Вейке атянть поп сиведизе важокс.

          Попось эрьва кода лангсонзо нарьги. А покшчить, а мезть кочкси,  яла кармавты эйсэнзэ важодеме.

           Весть Инечистэ попось кармавтызе сонзэ тевень тееме.

Важось чоп яла тевть топавтсь ды чокшне корты:

           - Валске мон, бачка,важодеме а молян. Попось мери:

           - Мекс а молят?

           - Вана мекс а молян:валске Инечинь омбоце чи.

           - Мейле мезе, иля пеле: важодемась аволь пежетькс.

Яла теке важось тевс эзь кунда. Пек састь попонть кежензэ. Саизе ды колмоце чистэ панизе сокамо кото бука лангсо, макссь тензэ коське кши. Важонть кежензэ састь. Арси, кода попонть манямс. Сон саинзе букатнень ды котонест миинзе цыганнэнь: ве буканть керизе пулонзо ды вализе пелевидьга мода потс. Се шкане ардсь попось кудосто тарантассо.

           Фатясь важось ды сеери попонтень:

           - Бачка, седе курок сак!

Попось ардсь ды мери:

           - Мезе теевсь тоньмарто? Важось мери:

           - Ванат мезе теевсь. Меринь, Покшчистэ а эряви тевть тейнемс: ванат, букатне мастор алов тусть. Вана котоценть эйсэ пулодо кирдян. Кундак седе курок, куш тень таргасынек.

           Попось кундась. Кодак  ноцковтсь, пулось таргавсь, попось кунст ёртовсь, шляпазояк прась.

           Попось мери:

           - Видеть валот, Покшчистэ важодемась – пежетькс: котоцеськак эзь таргаво, ансяк пулозо сезевсь, сонсь  тусь мастор алов.

           Истя важось манизе  попонть.

                                                         «Ёвксонь кужо»Ёвкст Саранск, 1993