Чачинь эрзянь Сабанцелесэ. Тетям-авам эрзят. Весе малавиксэм кортасть эрзякс. Секскак васенце валом ульнесь эрзякс. Весе парось, кона вастовсь эрямонь ким лангсо, ульнесь эрзянь ломантнень пельде.

Зярдо аламодо касынь, карминь ловномо книгат эсень раськеденть. Ней содан, кодамо сюпав ды виев сон ульнесь. Сюпаволь превей, шумбра ломаньсэ, сюпаволь чевте седеень ды паро оймень коряс. Содан, кода сон тюрсь эсензэ моданть кисэ, эсензэ вандынь чинзэ кис. Арсян, бути кезэрень ломанентень меревельть: юты шка, ды эрзятне кармить стувтомо эсест келест, коест-кирдаст, сон а кемевель. Эрзянь ломантне, конат виздить эрзякс улеме, тунь а содасызь раскест историянть. Бути содавлизь, чарькодевельть: тесэ виздемс а мезде. Ды, мекевланк, сынст саевлизе кеняркс эсь раськест кис. Виздицятне а рузт, а эрзят. Сынст кисэ чамам якстерьгали.

Зярдо ломанть эйсэнь кевкстнить,

Кикс те масторсонть касан,

Ёвтан тенст мон апак визде:

«Эрзянь ломанекс улян!»

А чарькодьсынь сеть эрзятнень,

Конат мерить: «Мон рузан!»

Стувтызь эрзянь обуцятнень,

Сынст кисэ визделгалян.

Кода стувтомс тиринь келенть,

Конасонть тетям-авам

Монень, вишка пингстэ саезь,

Тошкить лембестэ: «Цёрам…»?

Кода стувтомс тиринь келенть,

Зярдо онстомгак марян,

Вечка бабам тоначистэ

Пшкали эрзякс тень: «Нуцькам…»?

Эрямонь певтеме вийть максы монень эрзянь келесь ды эрзянь масторось. Содазь, эрьва мезть эрсить эрямосонть. Ансяк зярдояк прям а нолдтнян. Истя тонавтсть тетям-авам, истя эрясь монь раськесь…

Молинь лашмова стамбаро,

Мекшов лейс менелесь вансь.

Вай, кодамо тесэ паро!

Вай, кодамо ведесь ванькс!

Зярдо апаронть вастыя,

Зыянось тень серьгедсь: «Прак!»

Тиринь авинем ледстия,

Сон тошказевсь монень: «Стяк!»

Мон а правтован, а коман,

Эрямосонть муян ки.

Мон а улян берянь ломанькс,

Пазось седейсэнь эри!

Ней тонавтнян ошсо. Ялатеке свал арсян эсень чачома таркадонть. Арсян пертьпельксэнь мазычиденть: лейденть, ков свал чиилинь экшелямо; виртнеде, косо кочкинь пангт, умарть ды оймсилинь; сёлтнэде, конатнес яксилинь калонь кундсеме; пувиця лембе вармадонть. Сынст марто свал кортнилинь, кортнилинь эрзякс…

Ансяк эйкакшпингстэ иетне марявит кувакат. Сыретне свал тешкстыть:

Эрямось ливтязь ливти. Сы кулома… Весенень сави вастовомс Пазонть марто. Кода карми сон мартот кортамо? Арсян, карми кортамо се кельсэнть, конанть максызе сонсь. Эрзянть марто – эрзянь кельсэ!!!

Пазонь эйде, эрзя, эрий,

Нетне валтнэ свал монь мельсэнь:

Тонь раськесь мазый ды превей,

Кортак, морак эрзянь кельсэ!