В начало Александр Доронин. УРЬВАКСТОМАНЬ ЯКАВТНЕМАТ. Продолжение
— О-о, тон алкуксонь Дон-Жуан! — Люда никстинзе цецятнень ды озась сэрей креслас.
— Тонь имиджесь, кода ней кортнить, ванса, лията. «Мерседессэ» ардтнят, — ушодсь Роман Акимыч.
Копордасть-сусксть, ледстнесть, кода курортонь чист ютавтызь.
— Тезэнь тонь, Рома, кодат вармат пувидизь? — апак учонь кевкстемасо нерьгстызе Башкирцева.
— Эрьга, эрьга, тон уш сеске тевстэ ушодыть, — пейдезевсь Роман Акимыч. Тей самонь тувталонть арсесь кутморямодо мейле пачтямс. Зярдо ломанесь лавшомкшны, кортамось седе «лезэв».
Люда вейсэндинзе суртнэнь кирьга лангс — мештезэ пштилгадозь пштилгадсь. Эзь кирдеве, мерсь:
— Эзить маняво. Ней монь покш тевть. Васенце таркасо монь туртов — эрямонь зэмесь, — сонсь кургонь чиртязь мизол гадсь, сельмеванзо кивчкадсь панар потс эциця кельме.
Роман Акимыч чарькодсь: лисьмань пиксэнть сеске таргама, лиякс нолдазь ведранть ваявтсак.
— Варштамот, Людочка, ардынь. Ды мелемгак сэрей пандошка... — Роман Акимыч талнозевсь, пурнынзе ойме виензэ, шикадезь шикадсь: — Седей лембем теть уския. Арсян лангозот урьвакстомс!
— Поздаить, Ромочка, — цяхсо пейдезевсь Башкирцева. —
Ютазенть мекев а велявтсак!..
— Эзинь поздая. Мои карман ванстомот! — Роман Акимыч пульзясь аванть икелев, кармась кумажанзо палсеме.
— А эряви, энялдан, — Люда пильгсэ тулкадизе. Кукушкинэнь иредемазо пуштсо ливтясь. Ней сон столенть экшсэ аштесь кирьмицявозь, теке мейсэяк стакасо вачкодизь.
— Те кода истяня, эдь тон вечкилимик! Кодат сёрмат кучнить! — пине левксэкс цийнезевсь Роман Акимыч.
— Зярдо сёрмат кучнынь, сестэ теть ардомаль!
— Ды мои урьвакстозилинь, семиям ков теевлия?
— Лисни, парсте эрить? Кода мон майсинь, теде куш весть кевкстимик? Меельцьпелев натой сёрмалемеде лоткить. Алтыть самс варштамон — манимик. А мон чинек-венек эйсэть учинь...
— Тон, Люда, пек уш кежевстэ...
— Кежевстэ? Косо ульнить, ёвтака, зярдо сизьгемень целковой лангс ковозонзо эринь? Мон эдь ательесэ стыцякс важодинь,шпулькакс, кода раксесть монь кондятнэнь лангсо. Сестэ косоль вечкемат? «Волгасо» ардтнить, статуправлениянь прявт, нить экономистэкс кедеть маласо. Аволь кода мон — ательень шпулька!.. — Людань чамазо ашолгадсь, сельмензэ кежсэ верськаесть. — Кисэнь сестэ тошнакадыть, зярдо ськамот кадовить?
— Те уш бредямо... — Кукушкин стясь столенть экшстэ.
- Кодамо бредямо? Ванькс видечи! Весе тынь, понкс мартотне, нолго потс ваиде. Симинк минек Россиянть! Варштака, кие масторонок эйсэ коморо потсо кирди? Кить азортнэ? Рынкатнесэ, коммерциясонть — веенст грузин? ды чеченецт, Стаянь-стаянь яксить, верьгизэкс. Ков рузтнэ ёмасть, масторонь сех покш нациянок? Нист юбка ало нолгт нильнить! Эли каськасо ченькстэ глохтить! Россиянь идицят леменк! Идеса-мизь... Минь, аватне, лангозонк муськтяно-човатано, плитань пар потс ваинек! — Люда натой авалемсэ кроязевсь ды сизезь нолдынзе лавтовонзо.
Кувать чатьмонсть. Каштмолеманть колызе Роман Акимыч:
— Весементь, Люда, ве улавс а карматано вачкамо. Минек ояксчись тунь лията...
— Бути лията, сестэ кунсолок. — Башкирцевань сельмензэ гувкадсть пожар ладсо. Улема, оймезэ покш тардемасо пештязель, сась шка весе апаронть лангс ливтемс. — Тон эдь, Рома, арсят ансяк эсь прядот! Кодамо тарка тень явовлить, бути тонь экшс лисевлинь? Мельгат яксицякс? Стувтык, монень ансяк ниленьгемень вете, ютксонок кемсиземге иеть. Мои таго кстыень кондяман ды покш мелем нармунекс ливтнемс. Икеле стакаль тень теемс, ней ярмак потсан. Улкоть ульнесь свадьбам, мирдем кавксть мондень од. Сэрей, мазый, виев. А тон кие? Пен-си-онер! Ташто шубантень од ожа а педявтат!..
Теньсэ кортамост прядозель. Кавонест марясть пряст чумокс. Роман Акимыч — сень кисэ, мекс икеле кодамояк мель авантень эзь явкшно, Люда — мекс кортась казямосто. Явсть паро оякс, кода эрявияк явномс.
Кукушкин эзь кеме — Люда сы ильтемензэ. Эськанзо ялатеке учось. Сон аштесь перрононть лангсо ды секе тев варштнесь вокзалонть пелев. Яволявтсть уш озамодо, электричкась вант-вант сырги. Люда эзь неяво. Роман Акимыч меельцеде варштась удалов — вокзалонь кенкшенть икеле аштесь сон, салавань вечкемазо. Вакссонзоль сэрей од цёра. Раужо костюмсо, ашо панарозо циньск мерсь. Люда мезе-бути ёвтась цёрантень, тона совась вокзалов. Ды вана авась уш аштесь Кукушкинэнь вакссо. Кедьсэнзэ раужо сумкине, сонськак весе раужо.
— Мирдеть? — пшкадсь Роман Акимыч.
— Мирдем.
Люда нежедсь Кукушкинэнь лавтовс ды тошказевсь: «Простямак!». Стясь пильге сур лангс, чамаумарьс палызе. Ве ёндо ванындерямс — тейтересь тетянзо эйсэ ильти. Роман Акимыч кутмордызе аванть, турванзо токавтынзе пушазь тусто чертнес. Превензэ велязькадсть, ды сон чатазь сыргась вагононтень.
|
