Кудов Роман Акимыч велявтсь секе вестэнть. Талайс эзь матедеве, тагояк арсесь, кинь эйс прянть нежедемс. Ды ледстявсь тензэ Лида Башкирцева, конань марто ульнесь Есентуки ошонь санаториясо. Таргизе сёрманзо, кармась ловномонзо.

«Палатан, Ромочка! Кода пароль, зярдо вакссон ульнить! Лакинскойстэ теть сёрмадан, чачома ошкестэнь. Арсян тондеть ды авардян, кода тирань ававтомо ранаяк кадовитъ, кодамо стакалъ эйкакшпингеть! Мекс уцясканок эзтъ сюлмаво, мекс икеле эзитинь васто?!

Зярдояк а стувтсынь чевте кутморямот, сень а стувтса, кода минь кавонек, кедте кедьс кундазь, пандо прява яксинек. Ревень стаданть а стувтса, конань вансть колмо цёрынеть. Зярдо удомась тень а педякшны, сеть реветнень ловомост ушолян. Пачкодян кавтосядос — ансяк сестэ матедеван...

Учан пельдеть сёрма. Вечктян, вечктян, вечктян!..»

Люда Башкирцева мирдевтемель, эрясь аванзо марто Влади­мирской областьсэ. Саранскойстэ озат Нижней Новгородонь поездэнтень, тосто Лакинскоев ардтни электричка.

«А мейс тень Людань а чиявтомс, бути вечксамам?» — ютась Роман Акимычень прява. Ды таго авадонть арсезевсь. Сэрьс сон аволь сэреель, тень таркас карксамозо кемень сур юткс кельгиль. Потепрянзо пштить. Люда якавтнесь сынст Роман Акимычень чамава, сонсь кургонь келес пейдсь.

...Лакинск ошов электричкась пачкодсь пелеветь. Люда учось эйсэнзэ вокзалсо. Озавтызе «Мерседесэс» ды ускизе гостиницав. Номерэсь кавто нупальс, вейкесь — удсема тарка, омбоцесь — гостиноень кондямо. Роман Акимыч снартыксэль аванть паламо, се валсо керизе:

—      Кенертяно! Ванды чокшне вастовтано. Самодон икеле теть гайневтян. Ды чевте кедьлапушкасонзо ютась Кукушкинэнь   чамаза. — О,   кей!

Люда пек эзь полавтово, куш вастомадост мейле ютасть вейксэ иеть. Ну, паряк, пукшонзо седе эчкелгадсть ды черензэ лиякс артозельть. А вана норовозо...

Валске марто Роман Акимыч совась гостиницань администраторонтень, кевкстизе, зяро саить номерэнть кисэ.

—      Ярмактне колмо чис икелев уш пандозь, теде илядо  мелявто, — яволявтсь артозь турва авинесь, сонсь чавачамо икеле  пилексэнзэ ваннось. Пилекстнэ сырнень, кирьга видьс новольсть.  

«Люда-Людочка пандынзе... Маряви, бояравакс эри... — чарькодсь Роман Акимыч. — «Мерседессэ» ардтни, питней номер тень анокстась».

— Башкирцева    косо    важоди? — васолдо   кевкстсь   Роман Акимыч.

— Людмила  Ивановна?  Дык  сон,  чей,   ошсонок  сех  сюпав азорава. Коцтонь кодамонь покш фабрика кирди, икелензэ весе сюконить. — Авась аламос лоткась, мейле кевкстизе: — Тыньгак коммерсант?

Кукушкин тень каршо пейдезевсь:

—      Стяко   васолдо   а   кармавлинь   ардомо. — Ды   кода   исяк
мерсь тензэ Люда, истя жо меельцьпелев ёртсь: «О, кей!»

Роман Акимыч супермаркетстэ рамась шампанской, питней вина, эрьва кодат каванямкат, столь пурнась. Сонсь озась телефононть ваксе, кармась талнозь учомо.

Люда сась талай чокшне. Лангсонзо нурька джинсат, конат кувалгавтсть пильгтнень ды мазыйстэ невтсть рунгонзо. Валдо оршамонть пачк неявсть чова карксамозо ды сэрей мештезэ. Ашосто артозь черензэ лавтов ланга нурьгсть. Сельмтне, теке кавто домка эрькеть, нолдтнесть Кукушкинэнь лангс иредстевтиця сэняжа.

Роман Акимыч палызе аванть кедензэ ды венстясь тензэ розань пусмо.