ЭРЗИАНА эрзянский литературный сайт

ПРЯКСЛОПА
Категории раздела
Мои статьи [336]
Стихи [571]
КАВТО ВАЛСО
Статистика
Главная » Статьи » Мои статьи

Александр Данильчев. Шожда зыян

Шожда зыян

(Ёвтнема)

Витя Кафтайкин – университетэнь тонавтниця. Те сэрей, виев ды превей цёра. Школань прядомадо мейле ульнесь мелезэ тонавтнемс университетэнь филологиянь факультетсэ. Кафтайкин вечксь ловнамо эрзянь, рузонь ды омбо масторонь сёрмадыцятнень. Содыль стихотвореният, ёвтнемат, баснят… Секскак арсесь келейгавтомс эсь содамочинзэ университетсэ. Экзаментнень максомадо мейле, ковонь ютазь, цёрась маризе университетэв поступамодо кулянть. Сон пек кенярдсь. Те ульнесь, кода кортыть, сехте уцяскав чизэ сонзэ эрямосонть. Витя арсесь: «Карми стака. А кода эно? Тосо тонавтыть доцент ды профессорт. Те пек превей ломанть. Сынь бажить кастомс студентнэнь содамочист, теемс эйстэст видестэ арсиця ломанть, паро тонавтыцят… Онот, Иринка, верце куростонть, колмоце ие тосо тонавтни. Ветес… Шныть эйсэнзэ… Паряк, монгак истя карман тонавтнеме? Сави а шажда…».

Алкукскак, васенце иесь ютась стакасто. Кедесь лекциятнень сёрмадомсто свал а кенериль, сизиль. «Тезэнь сядо кедтнеяк а сатыть», - арсесь эсь пачканзо цёрась. Теке марто савкшнось кода-бути кенеркшнемс. Аламонь-аламонь кармась тонадомо. Истя теезель васенце эскельксэсь… Телень ды кизэнь экзаментнэнь Кафтайкин максынзе «ветес». Иень перть Витя теевсь содавиксэкс ламо тонавтницятнень марто, конатнень ютксо ульнесь Вовкаяк, конань марто Витя тонавтнесь ве группасо. Иень перть цёратне свал кирдевсть вейсэ. Тонавтнемась сынст эрямосонть аштесь васенце таркасо… Вана истя апак фатя ютась васенце тонавтнемань иесь. Тонавтницятненень теде башка кавто недлянь перть эрявсь ютамс фольклоронь практика: пурнамс морот, ёвкст, легендат, лайшемат… Теде мейле весе пурназенть макомс тонавтыцянтень.

…Сазь кизэсь. Маней пси читне недлянь перть калясть раужо моданть. Ве пель панкскеяк эзь неяво менельсэнть. Ансяк лиясто пувась вармине. Тень пингстэ экшелямо ансяк якамс… Недлянь перть Кафтайкин ульнесь велесэ. Эрявсь ардомс лия велев, косо эрясь университетэнь тонавтыцязо, тов, косо, учось эйсэнзэ Вова ялгазо. Сонзэ кедьсэ Витя карми эрямо.

Ды тесэ студентэнть марто лиссь апокш зяын. Весе ушодовкшнось а беряньстэ. Валске марто Витя ардсь автовокзалс. Оршазель цёрась весе ашосо: ашо панар ды ашо понкст. Кизэнь картнеяк (сандалятне) – сетькак ашот. Ве кедьсэнзэ ульнесь раужо пакет, ков цёрась пурнынзе–вачкинзе кизэнь оршамотнень. Кафтайкин ютась кассантень, шумбракстнесь тосо аштиця аванть марто, рамась билет ды тусь автобусонь туема таркантень. «Комсеце озамо таркам», - мерсь эсь пачканзо цёрась. – Паро. Паряк удангак». Эрявсь ардомс малав ведьгемень вайгельбеть. Велесь ульнесь вишкине, секскак автобусонь ардтнесь ансяк шлямочистэ (субутасто) ды таргочистэ. Нейгак автобусонь пешксель, кода те эрси свал. Ломантне ардсть эсь велев: кие-бути  тетянстэнь-аванстэнь, кие-бути ялганстэнь, кие-бути мекев васов… Витя ардсь практикав. Эсь комсеце таркасонзо. Лиясто штюжилинзе зепензэ, косо ульнесть телефонозо ды студенческой билетэзэ. Цёрась эзь удово. Яла автнесь кургонзо эйсэ ды ёзась сельмензэ. Нежедьсы прянзо вальмантень ды арси мезде-бути. Арзевкшнесь ней сон тонавтнеманзо ланга: да-а, иесь ютась бойкасто. Тесэ ледсь Воваяк, конань марто иень перть сынь теевсть прок кавто ялакст. Ледсь велесэ меельце ютавтозь недляськак, экшелямо таркав якамотне… Матедеви Кафтайкин ветешка минутас, ды автобусонть кодамояк лоткамсто стяви. Варшты стядо ардыцятнень лангс, конат теке шкастонть ваныть лангозонзо, варшты куя кондукторонть лангс, кона лови ярмакт. Варшты вальмава, косо неяви мазый пертьпельксэсь. Варшты пакетэнзэ лангс. Штюпасынзе зепензэ. Таго матедеви. Кись марявсь Витянень кувакакс. «Зяро жо кадовсь ардомс?» - арсесь Кафтайкин. Аламо таркань ардозь асфальтонь кинть лангсто автобусось велявть веленть пелев, ардсь малав кеменьшка вайгельбеть, валгсь пандонть алов, сыргась виде киява. Веле пе. Вальмань пачк неяви, кудотне мельга-мельцек чинть вейкесь омбоценть мельга. Тесэ вана чувтонь кудо. Теяк чувтонь, ансяк ташто. А вана те якстере векень. Вана микшнемань кудо… Автобусонь пачкодсь велень куншкас. Ардыцятне кармасть лисеме. Витя тагояк матедевкшнесь, ансяк неень лоткамонть марто кода-бути стясь пелемань пачк, мик скокадезевсь, абунгадсь, мекс лоткась автобусонь. Варштась вальмаванть. Ушосонть эйсэнзэ учось Вова. Кафтайкин лиссь меельцекс. Апаро варштавкссо лангозонзо варштась эчке кондукторось. Кафтайкин шумбракстнесь оянзо марто. Цёратне аламос кортасть ды састыне сыргасть Вовань кудо ёнов. Мольсть комсешка минутат. Вана Вовань кудось – как. Покш, мазый, ашо кевень, вальматнеяк цитнить чинть кармо. А уш ванькс пиресэнть кодат ансяк эмежть арасть: чурькат, якстерькайть, куярт… Сельгетькак туить лангозост ванозь… Тия–тува якстере цецят.

Совасть. Валентина Николаевна – Вовань авазо, лембестэ вастынзэ цёратнень. Вова невтизе ялганстэнь кудопотмонзо ды невтизе удомань тарканть. Паро. Витя путызе раужо пакетэнзэ. Таргизе зепстэнзэ телефононзо… Ды мень тамаша. Студенческой билетэсь ёмась. «Ужо, ужо», - арсесь Витя. – Паряк, пакетс прась. Арась. Пакетсэяк арась. Мезе ней теема?» Оштё весть штюпинзе зепензэ, ваннызе пакетэнзэ. Арась. Цёрантень кармась апаро. Истямось мартонзо зярдояк эзь вастневе эрямосонть. Кафтайкин лецтнесь школасо тонавтнеманзо: бути стувтнесь кудосо ручка эли жо книга, эли жо оштё мезеяк, теевкшнесь кода-бути апаро. Кода истя лиссь? Ды нейгак тонавтницянтень кармась кода-бути аволь эсензэ ладсо.

- Ужо, ужо, билетэсь зепсэнь эдь ульнесь. Автобуссо. – лецтнесь цёрась. – Паряк, салызь зярдо удынь? Мезякс? Мезекс?! А чарькодян. Вай! – Кафтайкин мик рангстазевсь.

- Мезе, мезе теевсь? – чийсть Валентина Николаевна ды Вова. – Мезе мартот?

Студенческоем ёмась, - тарнозь вайгельсэ мерсь Витя. – Вана, зепстэм таргизь, автобусо.

- Витя, парсте ваннык? – кевкстизе Валентина Николаевна.

- Да.

- Паряк, прась зепстэть…

- Паряк, а содан. Матедевинь. Стинь аламо шкань ютазь. Весе лиссть, монгак лисинь. Седе мейле тыненк сынь. Варштыя зепстэм, арась.

- Иля пеле. Нейке жо гайгстан вокзалов. Ёвтан ёмамодонть. Паряк муеви.

- Да кода а пелемс, Валя патяй. Те билетэнть потсо ульнесть ардтнемань (проездной) конёв, карточка, ков эрьва ковсто сыть стипендиянь ярмактне, флюрографиянь коряс справкась, СИСЕМСЯДТ ЦЕЛКОВОЙТЬ… Вай! Вай Нишкепаз, - Кафтайкин кавто кедьсэ кундызе прянзо. – Деканатсо тень кисэ яжасамизь! Паньсамизь! А бути кармить содамо…

- Витя, Витя. Весе карми вадря.

Витя юхадсь прясонзо. Ялатеке ве таркасо эзь аштеве.

- Паряк, велявтсы кияк… Ярмактне… Кадык эно… Сынь а эрявитькак. А вана лиясь…

Валентина Николаевна гайгстась вокзалов. Тосо мерсть, автобусось оштё эзь са.

- Адядо ярсамо, - тердинзе сон цёратнень.

Витя ярсаськак аламо. Коршнесь чайде ды сыргась тарка лангс. А кемеви вана цёрантень, што истя лиссь… Эзь фатяяк, кода матедевсь. Стясь аламо шкань ютазь. Кармась лездамо Вованень: кандтнесь ведь шлямо кудов, вачксесь пенгть.

- Адя омбоце рейсэнть вастсынек, - пшкадсь Кафтайкин оянстэнь.

- Адя. Ансяк шказо аламнеде позда, - макссь кармо вал Вова. – Бути чийтяно, паряк, кенертяно. Вансынек, куляткак меньгак кармить.

Вете  минутас цёратне чиезь ношкстасть велень куншкав. Автобусось пешксель ломанде. Туекшнось уш. Тесэ ки-бути неинзе цёратнень чиемаст ды энялдсь ветицянть лоткамодо. Витят – Воват стакасто лексить. Панжовсть кенкштне. Тагояк Витянь лангс варштась эчке кондукторось. Цёрась ёвтнизе зыянонть. Билетэнь микшницясь вансь-вансь лангозонзо. Неявсь, мезде-бути арсесь. Те а стяко.

- Вана те штоли? – кевкстинзе сон цёратнень.

- Те! Те! Сюкпря покш тыненк! – бажась саемс аванть кедьстэ билетэнзэ Кафтайкин.

- Ков?! Од ломанть. Азёдо… Кандодо тень литра ашо, сестэ оштё арсян… Максан тенк вете минутат, ванодо тынсь…

Автобусось раказевсь.

Цёратне тагояк бажасть вешемс билетэнть, но те мезеяк эзь максо. Сесте Витят–Воват ношкстасть малавикс микшнема кудонтень, косо важодсь Вовань патязо. Сон макссь цёратненень литра ашо, конань питнезэ кавтосядт целковойть. Цёратне эристэ чийсть автобусонть малас.

- Максынк уш, инескеть, миненек ве суликадо, - энялдсь Вова эчкентень.

- Мезе?!

Тагояк автобусось раказевсь. Весе ваныть, мезе карми улеме седе тов, мейсэ прядови тевесь.

- Саинк, кирдеде эсь винанк, - мерсь Витя ды венстинзе сумкатнень.

Эчке авась ёртызе ней аламодо сезнезь билетэнть цёранть пелев. Мерсь, келя, теде башка, автобусось ардтни ошова эсь маршрутонь коряс. Те билетэнть муизе озамо таркасто мень-бути цёра ды максызеяк кондукторонтень. Мерсь, меньгак ярмакт потсонзо арасельть… Кенштне пекставсть, автобусось сыргась таркастонзо.

Кафтайкин варштызе билетэнть. Карточкась тосо, ардтнемань конёвось тосо. Весе тосо. Ансяк ярмактне арасть. Вадря хоть истя прядовсь тевесь.  Кавто ашо суликатненьгак максомс тень кисэ а жаль. Седейсэнть паро. Паро. А кемевияк, што весе те прядовсь истя вадрясто. Витя ёвтась сюкпря ялганть туртов. Ярмактнень велявтынзе секе чистэ.

Практиканть цёратне ютызь парсте. Пурнасть ламо морот, ёвкст, нурька морот, лайшемат, пеедькшнемат… Шкась ливтясь бойкасто.

…Ней Витят–Воват тонавтнить меельце ветеце курссо. Ветес. Шныть эйсэст. Паро тонавтыцякс кармить. Ялатеке ютазь иетнень перть свал леди киньгак мельс билетэнь ёмамодо тевесь. Лиясто путы кияк эйстэст студенческоенть потс ярмак, ансяк сядошка целковойде аволь ламо. Пелить ёмамодонть. Вана истяяк эрси эрямосонть.




Категория: Мои статьи | Добавил: tati (14.12.2009)
Просмотров: 1160 | Рейтинг: 5.0/2 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[19.01.2010][Стихи]
Александр Арапов. С... (1)
[21.10.2010][Стихи]
Исланкин Юрий Иванов... (0)
[24.01.2010][Мои статьи]
Регина БУДАРИНА. Пут... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2024
    Сделать бесплатный сайт с uCoz