Миниатюрат

*  *   *

Велетнева машинасо свал ардтнить ошсто микшницят. Яла микшнить почт, розь, товзюро, сал, лия мезе. Ней жо лиссь аволь кода свал. Эли микшницясь аволь истямо понгсь, эли азорось аволь истямо. А содан.

Весть Зинёр Федянь кудос совась вейке истямо рузава ды капшазь, а чарькодевикс вайгельсэ кевтстсь:

- Просят надо?

Федя кода-бути васня эзь чарькодеяк.

- Просят надо? – таго кевкстсь авась.

Атясь тетькинзе сельмензэ, вансь-вансь микшницянть лангс ды кевкстсь:

- Трусят?!

- Просят.

- Трусят, што ли? Улить монь.

Авась юхадсь кедьсэнзэ ды лиссь кудостонть.

*  *  *

Васенце классо уроконь ютавтомсто тонавтыцясь энялдсь эйкакштнэнень:

- А ней эрьвась сёрмадынк тетрадьс эсь фамилиянк ды леменк.

Динго Алёш кувать эзь арсе, ды сёрмадсь: «Кильдишвили Альши».

Вай, зяро сельведть ульнесть!

*  *  *

Вадря цёрась Дёмань Серьга. Прядызе школанзо, служась армиясо. Ней важоди Саран ошсо. Важодсь сон Московсояк. Весть усксь мартонзо тейтерь – мазый, питней оршамосо, превей валсо кортыця, прянь шныця. Кода эно, одирьва.

Секе чистэнть Серьга кармавтызе тейтеренть важодеме. Совавтызе алашань кардс, макссь тензэ койме, ведрат ды ёвтызе мезе теемс. Сонсь тусь ялганстэнь.

…Омбоце чистэнть тейтересь велявтсь Московов.

*  *  *

Вечки Гараська Алёш лабордомс. Яла корты и корты, корты и корты. А лоткавияк. Школасояк истямоль. Яла ёвтни:

- Вана, минек порядкасо весть вете мостонь КАМАЗ ваясь. Газови-газови, кодаяк лисеви. Газови-газови, кодаяк а лисеви. Весе мостонзояк уш важодемс кармавтынзе. Ялатеке а лисеви… Ну, мейле, чокшне, сась трактор ды таргизе кода-бути.

Алёш яла ёвтни. Кургозояк а човии. Лапшат истя весень пилес вачкси. Кургонь автезь кунсолыть цёранть.