ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Тимохина Татьяна Дементьевна. ЛИЗАНЬ ТЕШТЕЗЭ (Продолжение 2)
ЛИЗАНЬ ТЕШТЕЗЭ
(Продолжение 2)

см. Начало

Крыльцяпестэ виресь неяви пелюмань човсема кувака брусококс. Лиза шкань апак сатстне сыргась виренть ёнов. Вана сон уш юты Раторонть ланга. Эесь эчке, чопода-сэнь. Таркань-таркань вельтязь ловшушмосо, таркань-таркань ванькс, прок зеркала. Неть таркатнева Лиза моли кирякстнезь. Те шкастонть арси: сон тия юты кизна, Раторонь сэтьме толкунтнэнь ланга. Ашо ведь-лукштне нувсить икелензэ. Берёксо цветиця овтоумарькстнэнь потсто пижни тензэ Колябай: «Лизушка, сака тей, ванта зяро идем галань алт муинь!».

Бойкасто тусть превстэнзэ неть арсематне, зярдо сон маризе перьканзо сэтьменть. Леень берёктне таргозсть ловдонть. Чись валгомалангсо. Тестэ а виресь, а велесь тейтерькантень а неявить. Пелезеват. Лиза ваны ансяк икелев. Сельмтне вешнить, бажить неемс ломань. Пильгтне теке сынсь эскелить икелев. Мештьсэнть прок молоткасо стукить.

Вана ютавсь Раторось, ды сон кузсь пандопряв. Тестэ велесь неяви — кудотне прок ашо простыня лангсо тикше штеметь раужолдыть. Виресь чийсь каршонзо. Ашо шапкасо сэрей кузось эскели сехте икеле. Мельганзо ламо кузнэть — эйкакшкеть...

«Мезе, бути патям тусь лия киява? Паряк, велявтомс мекев?» — арси Лиза, ансяк пильгтне а кунсолыть, бойкасто кандыть тейтерьканть раужо вирентень. Сон оштё весть варштась веленть пелев ды овсе тандадсь: «Вай, кода васов туинь! — кортазевсь сон. — Вана аламнес ютан вирьганть, бути киньгак а вастан — чиезь туян кудов».

Лиза каинзе варьганзо, якшамось эзь пице кедтнень. «Улевельгак кудосо тетям, монень аволь саво якамс тия», — эсь пачканзо мерсь Лиза. Те шкастонть чоподастонть сонзэ пилес каятотсь нурдонь чикордома: вирьстэнть кармась лисеме обоз. Тейтерьканть кутьмерьс прок сёлмот кассть.

Последушки.1997 г.,(флорийская мозаика).Юрков А.Н.

«Паряк, ютксост патямгак?» — кивчкадсь пряванзо. Курок сон уш мезе вий тулкадсь пенге марто нурдонть. Покш ульнесь мельспарозо, зярдо неизе патянзо лавтовсто лавшомозь пиксэнть.

  Састо, састо, истя сизят, — кортась патязо.

  Эзь пеле ведь ськамонзо самс вирев, — дивсесть Лиза лангс пенгень ускицятне.

Икельцетне апак учо мекс-бути лоткасть.

     Таргсинк узеренк! — рангстась ашо сакало Лексей атя. — Несынк, вазошка верьгиз!

Лиза кода-бути весе лавшомсь ды озась пенгтнень лангс.

Верьгизэсь ульнесь овсе маласо. Сон озась пулонзо лангс ды прок кунсолось, мезть кортыть ломантне. Покш сельмсэнзэ палсь вачочи. Мейле стясь ды састыне тусь веёнов. Лексей атя чавсь вейс кавто узереть, аватне пижнесть: «Улю-лю-лю! Улю-лю-лю!».

Кудов самодо мейле авазо штюпизе Лизань начко кутьмерен-зэ ды мерсь:

     Псить пенгтне.

Лиза юксинзе патянзо пильгстэ эензазь карензэ-пракстанзо ды путынзе костямо. Зярдо тейтерькась ёвтнесь верьгиздэнть, Аркаша апак лотксе кевкстнесь:

Лиза, а Лиза, зяро верьгизэнть иензэ? Кодашкат кенжензэ?

Мои сонзэ, нать, штюпия? — налкстась патязо.

     Ней верьгизэсь содатанзат, Лиза, мутанзат ды сэвтянзат.
...Лиза тонавтнесь вадрясто. Эрьва чистэ школасто самодо мейле тейсынзе уроконзо ды лиси ушов. Истя тейсь течияк. Оршнесь ды лиссь кудыкелев, панжизе кенкшенть ды стясь крыльцянть лангс. Менельсэнть тешттне прок кончтнесть тензэ. Тей­терькась састо кортазевсь:

     Тетяй, тон уш лиснить монь марто кортнеме, да? Мон тонь лангс ванан видьстэ клубонть велькска. Менельсэнть ламо тештть: покшт, вишкинеть. Мон а содан, кона тештенть лангс тон вана ней ванат. Тетяй, эрь карматано ваномо пиже тештень кеченть лангс. Полянь тетянзо ладсо тон иля чавово, седе курок сак мекев кудов. Тетяй, эзик стувто? Зярдо сат кудов, колмоксть вачкодть кенкшентень ды циндернесэнть кальдердевть. Мои сеске содатан ды апак кевкстне панжса кенкшенть. Эх! Кода весе кеняргадыть! Тон вешат монь черьклокке. Курок мон Аркашкань прястояк наран, эсень прястояк — ды кучсынь теть сёрмасо. Тон кевкстнят, зяро сантиметрас те шкас Аркашка марто касынек? Авам уш онкстнимизь, ды курок сёрмасо пачтян теть. Аркашка столь алов стядо уш а кельги. Курок мои частушкат Гитлердэ кучан. Ней молян варштасынь тонь пильгекиксэть.

Лиза кепедизе ловлангс комавтозь чувтонь очкиненть ды кувать ваннось тетянзо кемкиксэнть лангс, конань сон вельтизе се чистэнть, зярдо тетязо тусь фронтов.

«Кадык телесь седе кувать карми молеме, а то сы тундось ды солавтсы тетянь меельце пильгекиксэнзэ», — арсесь эсь пачкан-зо Лиза. Мейле састыне вельтизе следэнть секе жо очкинесэнть ды таго кармась тетянзо марто кортнеме:

— Тетяй! Оно шабранок, Нина патянть, умок уш арасть пицьканзо. Зярдо эряви тензэ кирвазтемс тол эли уштомс голландка, сон минек кедьстэ чугункинесэ жарт кандтни. Лавкасояк пицькат арасть. Зярдо кармат само, тетяй, кудов, совак Московов ды рамак цела мешок пицькат...

Чатьмони ловось, чатьмони ушось, чатьмонить весе кудотне. Ансяк тешттне кончтнить, прок лездыть Лизанень кортнеме тетянзо марто. Мейле Лиза аволдась кедьсэ тештень кечентень, ды мельганзо чикордозь пекставсь стака кенкшесь.

Истя эрьва субутасто тейтерькась лисни тетянзо марто корт­неме крыльцяпес. Сон кемсь: ялатеке зярдо а зярдо пачкодить валонзо тетянстэнь. Ансяк сынь эзть пачкоде а тельня, а тунда...

Сонзэ маштовомадо кулясь велев сась сестэ, зярдо Лиза кандсь луга лангсто цела берема тюжа цецят. Кедензэ тейтерьканть новольсть, цецятне прасть крыльцяпес. Документтнэнь ютксо ульнесь тетянзо фотокарточка. Сехте кувать Лиза ваннось тетянзо сельмтнень лангс, конатнень марто сон а весть кортнекшнесь тешттнень вельде.


Категория: Мои статьи | Добавил: tati (07.01.2011)
Просмотров: 309 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz