Ёвтнема

Вастома

Те лембе маней валскестэнть Наташань туртов весемесь ушодовсь мекевланг, лиякс, аволь истя, кода свал. Васняяк, сон аламодо седе куватьс удовсь, мейле стувтынзе машинань панжоманзо, савсь велявтомс мекев кудов. Седе тов седеяк покш тамаша лиссь: пелекилангсо, светофор маласо, апак учне тесьмадизе икеле аштиця машинанть, кода кортыть, «палызе». Тейтерьавась истякак капшась, те эште эзь ульне! Ки куншкасо, машинав таркасо. Наташа гайневтиксэль мирденстэнь, мелезэнзэ ледсь – тона лия ошсо, кучизь важодемань коряс, кодат тосо… Вана икельце машинастонть лиссь азорось ды оштё васолдо ушдось:

– Эй, матедевиде руленть экшс эли ардтнеме яла эзиде тонадо?! – сон сась Наташань ваксс, ды чачозо валовсь кеняркссо:

 – Наташа!

Наташа нусманя вановтозояк чевтемгадсь, сон содызе умонь вечкевиксэнзэ, Сергеень.

– Серёжа! Тон? А содаваткак.

– Мон. Стувтымик, нать? Мезе, ардтнеме тонавтнят?

– Аволь, аволь, мон уш умок ардтнян. Ардан, капшан важодема таркав. Ванан, палозевсь якстересь, мон лоткамо истя ды сеске эзь лисе, тоньзэть тесьмадевинь… Пек тапитинь?

– Варштама, – Сергей мольсь машинатнень юткс, вешкстазевсь, вансь-тейсь ды мери:  – Тевтне берянть, Наташа, эряви пачтямс витнема таркав.

– Ков?

– Автосервисэв. Мон тосо важодян. Тон азё мейсэяк пачкодть важодема таркав, минь оям марто паньсынек машинанть. Иля мелявто истя, витеви. Вана те адресэнть коряс мусамизь мейле, – Сергей венстизе Наташанень визитканзо.

Тейтерьавась сыргась автобусонь лотксема таркантень, молемстэ велявтызе прянзо ды серьгедсь:

– Сюкпря, Серёжа, мон сован важодемадо мейле.

Чинь перть Наташа мелявтсь машинанзо кисэ. Вадря се, Серёжа понгсь, лия марто «палавольгак», ки соды кода весемесь араволь. Кода апак учне лиссь те вастовомась. Малав кавксо иеть эзть нее вейкест-вейкест. А ней тесэ вана, килангсо. Ламо шка ютась явомадост мейле. Мезе ульнесь, весе кадовсь шожда лестнемакс.

Наташа эскелясь автосервисэв ды ледстнесь од шканзо. «Кадык, – арсесь сон, – весесь лиссь вадрясто весе лиссь вадря. Мон ней аволь ськамон, ды свал ули кинень пшкадемс, кинь лавтовс нежедемс стака шкасто – мирдензэ, вечкевикс Сашань».

– Наташа, сыть уш? Совак эно, – мерсь Сергей.

– Сынь. Кода тосо тевтне, Серёжа? – ульнесь Наташань васень кевкстемазо.

– Ардомапелентень алкуксонь витнема эряви.

– Кодамо  витнема? Кортыть, витеви…  Сон аволь пек умок рамазь, – тандадсь Наташа.

– Иля ризнэ, мерькавксось витеви. Тонсь рамик? – кевкстсь Сергей.

– Косто монсь? Пейдят, нать, лангсон. Мирдем казизе.

– Вадря истямо мирдесь – машина казсь.

– Вадря, а мезть пеняцямс лангозонзо.

– Вай, кодамо тон кармить! – Наташань чачосто сельмень апак сае мерсь Сергей.

– Кодамо? Берянь?

– Мекс сеске – берянь? Мекевланг, мазыйдеяк мазыят, седеяк вадрялгадыть, –   седейшкава мерсь Сергей.

– Мон икелеяк истямолинь, – мизолдозевсь Наташа.

– Сестэяк паролить, а мезть кортамс. Эно ёвтнек, кода эрят-аштят, умок эзинек вастовкшно.

– Умок, Серёжа, кавксошка иеть. Сестэ студентэлинек. Кода эрян? …Кода ламот. Мирденень лисинь, цёра чачтынь, важодян вечкевикс таркасо. Тонсь кода?

– Прядыя университетэнть, саимизь армияв. Служинь ие.

– Куш вестешкадо сёрмине кучовлить…

– Тонсь содат, Наташа, а вечкса бизаксомонь тевенть, кудовгак чуродо весть сёрмалинь. Самодо мейле вастыя сонзэ… Урьвакстынь. Ней вана тейтернем школав моли. Важодян тесэ, ардомапельть витнян. Пандомс пандыть, ансяк ялатеке ярмактне а сатныть ковгак. Наташа, мон нейгак ванстан тонь фотографиянть, сёрманть.

– Нейгак? – дивазевсь Наташа, – Вай, Серёжа, мон арсинь, умок пултыть-ёртыть.

– Эзинь. Истямо сырнень поколь ков толс ёртомс?! Сехте валдо ледстнемакс кадовить.

– Седе валдот эзть кадово? – пейдезевсь Наташа.

– Эзть. Кемемак…

– Сергей, туемс тень эряви. Саик номерэм, кода витневи машинам, гайневть. Карман учомо.

– Гайневтян, кода эно, – мерсь Сергей. Моликсэль аванть ильтеме, тердизь мезень-бути кандомо.

Таргонь перть Сергей эзь муе эстензэ тарка-эзем. Аволь якась, ливтнезь ливтнесь, мизолдсь весень каршо, седеезэнзэ, мерят, тундокай совась. Натой кудосояк полавтовсь, ней эзь педсе эрьва чинь эсензэ «инегуентень»: тень аволь истя теик, тонань… Нись зярдояк а чатьмониль мирдень каршо, истя сюворды, седе тов арсезеват, пшкадемс эли пекстамс покш кургонть. Стака мартонзо эрямс, ды а ков молемс, вейсэнь тейтерь кастыть.

Чинек-венек Сергей арсесь Наташадо. Од шкасто зяро эзь арсе, кода ней. Ансяк конясынзе сельмензэ, икелензэ лисить ашназа-сэнь сельминетне, чевте мизолксось, пилесэнзэ гайгезеви седейс токиця вайгелесь. А мако турвинетне… «Вай, мезе мартон?! – кундасы прянзо цёрась. – Сон мирдень кедьсэ, мон урьвакстозян. Мезе учан?» Кенярдовтсь Сергеень вейкесь: курок витневи машинась ды Наташа сы мельганзо. Сон ёвты тензэ одс гувкадиця вечкемадонзо, корты мартонзо ды таго карми вайсеме мазый сельминетнес.

Эль учовсь цёрантень шкась. Ды вана Наташа сась машинанзо мельга.

– Шумбрат, Серёжа. Важодят?

– Наташа! Шумбрат, важодян, – кенярдозевсь цёрась. – Ули шкат, кортавлинек бу аламос?

– Шкам?.. Зярс мирдем эзь са мельган, ули, – мизолкссо казизе Сергеень Наташа.

– А содан, кода ушодомс кортамонтькак…

– Серёжа, – пейдезевсь тейтерьавась, – мезе тень истямо ёвтавлинть, натой визделгадыть прок од цёрынька.

– Да, виздемачись ули эйсэнь, а мезть сёпомс. Наташа, мон пек ламо арсян тондеть, ледстнян эйсэть.

– Мондень мезть арсемс?

– Содазь, шкась ламо ютась, ансяк вана ней чарькодия: теинь ильведькс. Явовинек кода-бути апак учо ды… ней уш а велявтсак се шканть. Кода вастытинь ютазь таргостонть, седеем толокс кирвазсь …

– Мезе, ёвтавлить, кода куловтнестэ толбандине сыремсь оймесэть?

– Мон бу меревлинь пандошка толбандя. Паряк, пейдезеват, ансяк мон тонь вечктян, Наташа…

– А пейдян, Серёжа, кеман теть. Мон сеске неия, кода ванат лангозон ды таргонь перть секе тев гайневтнить тень. Чарькодтян, ансяк превс а саеви, мезекс те весе зяро шкань ютазь? Косолить икеле, зярдо мон арсинь тондеть, зярдо учинь эйсэть чить ды веть. Паряк, ледстясак, максния теть од адресэм, тон алтнить самс. Эзить са. Марявсь седеемгак лазови. Ванынь вальмава ды учинь, ознынь – савлить. Сестэ чаволь потмот, арасель вечкемань байгинеяк. Улема, каштанчись эзь нолда эйсэть. Эно уш кода ялга савлить!

– Мон васняяк эзинь сыргаво, мейле ёмавтыя адресэть …

– Ней мезть пиштемс! Пек стакаль стувтомс тонь. Чить бажинь а ледстнемс тондеть, ветнестэ жо… Эрьва вене неилитинь онстон, косо свал ульнинек вейсэ. Мезеяк, ютась шкась, эзинь синдеве, эрян. Вешнинь эсь уцяскам ды муия. Тонгак  иля тално, весемесь юты.

– Монень маряви, те ёжось а юты…

– Серёжа, мон вечкса мирдень ды кияк тень а эряви. Тонь ёжось кирвазсь ламо шкань ютазь, ней мезеяк а теят, мезеяк а полавтат.

– Кодамо превтемелинь, Наташа, мон а содылинь: вечкилимик. Велявтомс бу мекев се шканть!

– Мезесь ютась, се зярдояк а сы одов. Оно мирдемгак, окойники, сы. Кеж иля сае, Серёжа. Эрямось истямо: мезе ансяк а неят, а марят, ков ансяк а понгат, – чевтестэ мерсь Наташа.

– А саян, сюкпря вастоманок кисэ. Тон сехте, сехте вадряят, – ёвтась Сергей ды нолдызе прянзо.

Мирдесь уш васолдо редизе, кодамо вановтсо а содавикс цёраломанесь вансь нинзэ лангс. Визькс улезэ истят вановтт кайсемс лиянь ни ланга. Те ки истямось? Паряк, сон бажи манямс вечкевиксэнзэ?! Те оштё арасель. Вансы, цёрась кедензэ путызе Наташань кедьс. Мезть тейни, идемевсесь? Наташа ноцковтызе эсь кедензэ. Саша киньгак лангс апак вано, ёртозь ёртовсь нинстэнь педсиця цёранть лангс, кундызе сиведе, кепедизе, сорновтни эйсэнзэ! Тона а чарькоди, мейсэ тевесь. Сашань кежензэ лаказь лакасть.

– Мекс токшат ним эйсэ?! Тон кият тензэ?! Те монь полам, чарькодят?.. Монь!

Сергей кодаяк а мени Сашань виев кедтнестэ.

– Мезе мон теинь? Мейсэ чумом? Нолдамак!

– Мейсэ чумот, кевкстнят?

 Саша, паряк, тюрезевельгак мартонзо, бути Наташа шкастонзо аволизе  оймавто:

– Саша, Саша, те ломанесь машинам витнизе, инескеть, лоткак! Ломанть ваныть, оймавт, мезеяк берянь эзь тееве…

Мирдесь теке ансяк неизе нинзэ, варштась ёнонзо, аламодо энгамсь. Ёжос сазь, мерсь:

– Адя тестэ, те амазый понась салатанзат оштё.

– Мезть кортат? Сергей витнизе машинанть, а тон мокшнасот яхоят. Мезе мартот теевсь?

– А содан. Кода неинь вакссот асодавикс цера, весе рунгом соракадсь. Монськак а чарькодян, мезе теевсь мартон…

– Вана истя, иля яксе командировкава! Машинанть тонсь витнесак, ды кодамояк идемевсь а педи тень, – пейдезевсь мирдензэ каршо Наташа. Вейсэ сыргасть машинанть саеме.

Сергей чувтомозь вансь, кода вечкевиксэсь тусь вечкевиксэнзэ марто. «Те уцяскав цёранть таркасо улемаль монень», ­– арсезевсь сон.

Туицятнень вановтсо ульнесь алкуксонь виев вечкема, кона а стувтови, мейсэяк а явовтови, а куловтови…