ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Татьяна Маторкина. Павлик

Павлик

Ёвтнема

Павликнень ульнесть ниле иеть, зярдо кулось авазо. Зярдо цёрынентень топодсть вете, тетязо урьвакстсь омбоцеде. Павликень ней таго ули авазо, ансяк кодамо-бути лия, седе казямо, вановтозояк кежей ды мизолксозояк тунь аволь истямо чевте, кодамоль тиринь аванзо. Кортаськак лиякс, аволь вечкезь. Эрямоськак Павликмезень кудосо ушодовсь лия. Чинь-чоп Павликень тетязо важодиль, сыль талай чокшнэ, ярсыль, варштыль эйкакшонзо лангс ды мадиль. Одавась чоп кудосоль. Аштиль. Кода аштиль: сими чайде, ваны телевизор, пижни цёрыненть лангс, сень туевти, тень муевти. Чийневель-налксевель эйкакшось, авась а мери. Секе тев музгорди. Кундасы яла прянзо:

– Вай, кода мелем мольсь те левкстэнть!

Мади диванс, кувси. Павлик састынькине сови нупалезэнзэ, озы ды ашти, теке чеерне. Лиясто кузи вальмалангс ды ваны, кода ютыть ломантне, ардыть певтеме машинатне. Ваны ды арси, мекс сон киненьгак а эряви. Кодамо-бути апаро ёжо пры седейзэнзэ. Налкси-налкси ськамонзо, аварьгады. Кияк сонзэ а сайсы берёмазонзо, а паласы валдо приненть, а ёвты лембе валт. Одавась тердьсы ярсамо, ярсы. Ды таго сови нупалезэнзэ. Павликень аволь пек ламо налкшкензэ, кода лия эйкакштнэнь. Ней уш умок кияк тензэ мезеяк эзь рамсе. Истя и мольсь эрямозо, мезеяк од арасель. Цёрыненть ульнесь мелезэ кирдемс кискалевкске. Содась: кияк а кенярдозеви те кулянтень, ялатеке учось шка, зярдо тетязо кевкстьсы, мезе тензэ эряви. Вана учовсь теяк. Тетянзо кевкстеманть каршо Павлик варштась нусманя сельмсэнзэ ды мерсь:

  Монень кискалевкске эряволь, тетяй...

  Мезе? Кискалевкске теть?

  Угу, монень эряви кискалевкске, тетяй, монь покш мелем...

  Оно мезе превсэть, Павлик...

  Тетяй, мон карман налксеме мартонзо, карман вечкемензэ, андомонзо...

– Эряви кевкстемс аванть, паряк, сон а мери тенек.

Одавась алкукскак, кода маризе те кулянть, мик лоткавсь тарказонзо.

– Вай! Ды кодамо кискалевкс? Тенень? Сонсь прок   кискалевкс.    Ансяк   шлян-нардан мельганзо, пидян-муськан. Мезе тензэ а саты? Вай, кискалевкс! Арась, а эряви истямо чине кудонтень!  – пижнезевсь одавась,  кундызе прянзо, сеске озась, мерят, кулы нейке.

– Маша, аштек, иля ранго эйкакшонть лангс, – ушодсь оймавтомо нинзэ тетясь.

Павлик арсеськак, истя карми улеме. Нолдызе прянзо, мольсь тетянзо ваксс ды аварьгадсь. Сон валгак а ёвтави, сельведензэ чудить. Кодат сэпейть неть сельведтне! Цёрынесь нардтнесь сынст тетянзо ожас, панарс, кодаяк а оймави.

  Иля аварде,  Павлик,  тон жо цёрынят. Марить? Мои кандовлинь теть, ансяк ават а мери... – кортазевсь тетязо.

Эзть эряво неть валтнэ Павликнень. Сон истя авардсь, мик икнэзевсь, стясь тетянзо кедьстэ ды тусь нупалезэнзэ. Тосо совась вельтявкс потс ды авардезь матедевсь.

Читне мольсть састо-састо. Вана маласо Од Иеськак. Те покшчинть Павлик карми ледстнеме пек кувать: сынест сакшнось Якшаматясь. Сон таргась потстонзо вишка понав тапаркске. Кискалевкске.

  И-и-х!   Ура!     кенярдозевсь  Павлик, кирнявтсь  Якшаматянть  кирьгас,  палызе ды ёвтась покш сюкпря. Цёрынентень кодаяк эзь кемеве: икелензэ ашти аволь рамазь налкшке, алкуксонь кискалевкс. Тюжа-тюжине, раужо бобка сельмине, сон аштесь озадо ды пелезь ваннось  пертьпельга.   Аёвтавикс  кеняркс пештизе Павликень. Сон саизе кедезэнзэ те тапаркскенть, вадяшизе, палызе.

– Кискинем   монь,      мерсь   сон,   ды эйкакшонть сельмстэ лиссть кенярдомань сельведть. Те шкане Якшаматясь тусь, ды тарказонзо совась Андрей лепясь, тетянзо ялаксозо, кона эри велесэ.

– Павлик, косто саик левкскенть? – кевкстизе сон цёрыненть.

– Монень Якшаматясь казизе, сон инжекс совсесь, – кармась ёвтнеме Павлик.

  Кода лемезэ? Арась? Сонензэ лем эряви путомс, – кортась Андрей лелязо.

  Лем?  Мои   путовлинь...   А!   Дружок! Дружок путан тензэ.

– Вадря лемесь, – мерсь Павликень тетязо. Одавась   каизе   амазы   варштавксонзо цёратнень ланга.

Истя Павликень кармась улеме вечкевикс ялгазо – Дружок. Васенце читнестэ сон аштесь, пельсь, мейле чийнезевсь, кармась налксеме вишка азоронзо марто. Чинзэ-чоп налксильть вейсэ. «Дружок, сак тей!» – рангсты Павлик. Кискинесь чип. Ков цёрынесь, тов сонгак. Павлик кенярдсь: ули истямо ялгазо ды налкшкезэ! Цёрынесь эзь нее, кода амазыйстэ вансь тень лангс одавась. Раужо оймесь эзь чарькоде, кодамо паро ульнесь эйкакшонтень. Сон эзь нее, кодамо валдосо цитнесть сельминензэ, зярдо кирдиль тюжа тапаркскенть кедьсэнзэ. Эзь вечкеве тензэ эйкакшонть кенярксов вайгелезэ, кона чинзэ перть гайгсь кудованть.

Шкань ютазь Павлик редизе: Дружок полавтовсь. Сон кодамо-бути нусманя, ашти свал мадезь, прязо путозь лапинензэ лангс. Раужо сельминетне эзть цитне икеле ладсо, лоткась налксемеде азоронзо марто. Цёрынесь и принензэ вадяшасы, и паласы, кискинесь тарскак а теи. Ашти сэтьместэ ды ваны. Павлик налксевель мартонзо, сон а налкси.

– Дружок,  мезе мартот? Адя налксеме, Дружок,     пшкадсь  сон  ялганстэнь,  ансяк тонась нусманясто чатьмонсь.

Валске марто одавась андызе кискалевксэнть ды састо лекстясь. «Славбох, паряк, врады, а карман марямо те чиненть», – арсесь эсь пачканзо. Те чистэнть Дружок седеяк нусмакадсь, сон стакасто лекси ды кувси. Павлик мелявтсь, чарькодсь: ялгазо ормалгадсь, но эзь сода, мезе мартонзо теемс, кода тензэ лездамс. Чевтестэ вадяшась Дружоконь ды вансь лангозонзо.

  Дружок, Дружок, мезе мартот, мезеть сэреди? – тапась кисканть вакска цёрынесь. Чокшнэ Дружок истя жо аштесь мадезь ды эзь кепсе прянзояк.  Павлик учось тетянзо, арсесь, лезды тензэ.

– Тетяй, сака тей! Дружоком сэреди, адя варштык, – ушодсь ёвтнеме цёрынесь, зярдо тетязо ансяк совась кудос, – сон а ярсы, а налкси, эряви лецямс.

  Аштек оно, тетят васняяк ярсы кадык, – мерсь одавась.

– Цёрынем, аштек, ванса кинонть ды сан,– аволдась  тетязо.   Павлик  учось-учось ды матедевсь. Вестэнть ней он: юты сон Дружок марто паксява, чийнить ды налксить сынь вейсэ, каршост юты ава. Дружок онгозевсь аванть лангс ды тусь мельганзо.

– Дружок, сак, сак тей! – рангсь ялганзо мельга Павлик, ансяк тонась чийнесь аванть перька ды эзь кунсоло азоронзо.

Павлик сыргозсь, ёртызе вельксэнзэ, стясь ды кепе пильгсэ чийсь Дружоконть ваксс. Кискалевксэсь тосо арасель. «Дружок! – тердсь Павлик, – Дружок!» Кияк эзь чие тердеманть каршо. Цёрынесь кармась вешнеме. Ков ансяк эзь варшта, кискалевксэсь косояк арасель. Совась одавась.

  Стить? Азе ярсак, – мерсь сон.

  Косо Дружок? – кевкстсь Павлик.

– Дружок? Сон кулось. Тон эзик нее? Оно кенкшенть удало, ёртомс эряви, – мерсь апак мелявто авась.

– Кода истя кулось? – таймазкадсь Павлик. Сеске  чийсь  кенкшенть  ёнов  ды  неизе ялганзо. Тона аштесь празь, прязо каязь ве ёнов. Дружок эзь лексе. Поцерьсэ тусть Павликень сельведензэ. Сон кодаяк эзь кемть ялганзо куломантень. Вадяшась тюжа тапаркскенть ды авардсь, сельведтне прасть левксэнть лангс, начтасть эйсэнзэ.

– Саты теть стяконь кис ниреждемс! Азе ярсак,  ямось  кельми.  Мусь  мезень   кис лажномс, чиней кискань кис! – ёртсь одавась.

Павлик эзь кунсоло сонзэ валтнэнь, стака апаро пештизе эйкакшонть. Вансь-вансь Дружок лангс ды тусь мекев нупалезэнзэ. Прась таркас ды таго аварьгадсь. Сон лиядсь ялгавтомо, вечкевикс оявтомо. Чинзэ чоп эзь лисне Павлик нупальстэнзэ, ярсамояк. Зярдо важодемстэ сась тетязо ды совась Павликень варштамо, эйкакшось аштесь мадезь.

– Павлик, адя ярсак. Саты мелявтомс. Нать, сэредсь ракшинесь, ней а велявтсак, – мерсь тетязо. Сон вансь цёрыненть начко сельмтнес, конатне пешксельть мелявксто. Содавольтькак тетят-цёрат, кинь кувалма лиссь истямо тевесь!

  А молян, арась мелем ярсамс.

  Те мекс истя?

– Мон а стявангак, тетяй, мекс-бути. Тетязо   мольсь   малазонзо  ды   штюпизе эйкакшонть конянзо. Пси. «Нать, ормалгадсь, эряви Машанень ёвтамс», – арсезевсь тетясь. Алкукскак, Павлик апародонть ормалгадсь. Кавто таргонь перть беряньстэ марясь прянзо. Одавась якась мельганзо, ансяк мезе парось те кежбарго ломанденть? Тундо малав Павлик пичкась, нусманячись ялатеке неявсь сельмстэнзэ.

Сась пси кизэсь, Павликень ускизь велев, косо эрясь Андрей лелязо. Сынсь тетятне-аватне тусть оймсеме моря чирев. Ды тесэ, велесэ, ушодовсь Павликень алкуксонь эрямозо. Эйкакшось чинь чоп чийнесь ушова Андрей лелянть цёрынензэ Ванька марто. Вадря, сынь ульнесть ве иень. Кудов совильть чоподава, рудазовт, но истят кенярксовт! Шлямодо мейле ярсыть ды прыть удомо. Матедевить сиземадонть, мейсэяк а стявтовить. Лена патясь вечксы Павликень, кода эсензэ Ванькань. Сон бажась максомс ававтомо эйкакшонтень седе ламо седейлембе, чевтечи. Андрей лелясь лиясто саилинзе машинасо ардтнеме. Павликнень пек вечкевсь велесэ эрямось. Сон эзь ледстне ошонь кудонзо, одаванзо, кисканзо.

Истя и мольсь Павликень эрямозо, зярс эзь пачкоде велес апаро кулясь: кудов ардомсто чавовсть тетязо ды одавась. Павлик лиядсь урозокс. Лена ды Андрей эзть сода, кода ёвтамс теде цёрынентень. Сынь арсесть, кода а калавтомс эйкакшонь седеенть. Те шкастонть косто-бути кардаз удалдо чийсть Павлик марто Ванькат.

– Авай, авай, Лайка левксыясь! – кенярдозь ушодсь Ваня.

– Левксыясь, мик ниле вакссонзо чийнить! – поладсь  Павлик.  Сон  истя  кенярдсь,  истя мизолдсь,  лелязо-патязо  аздыльть,   мезе меремс.

– Тетяй, минь а явносынек сынст, а? Кадсынек эстенек?  Сынь  истят  мазыйть!  – энялдозь мерсь Ванька.

  Павлик, – ушодсь Андрей, – ули мелеть кадовомс эрямо мартонок, велесэ? – Сон апак кавтолдо кевкстизе цёрыненть.

  Эрямо тесэ, тынк марто?

  Тесэ.

– Кискалевкстнэяк мартонок? Кадован! Ура!

– Ура! – поладсь Ванюта. Ды тусть кавонест мекев кудо удалов.

– Лена,  кадык  кедьсэнек  эри  цёрынесь. Арази  макссынек эйкакшонь кудос? Жаль, аволь киньгак, малавикс, – мерсь Андрей.

– Монгак истя арсян, кадык эри. Ковгак а макссынек. Ней кавто цёранок.

– Ды ниле кискалевксэнек, – мерсь Андрей, – кастасынек.

Нама, кастасызь: ансяк виев семиясто, покш вечкемасто лисить алкуксонь паро ломанть.


                                     

Категория: Мои статьи | Добавил: tati (15.11.2009)
Просмотров: 1066 | Комментарии: 3 | Рейтинг: 5.0/2 |
Всего комментариев: 3
3  
Мельс пек тусь сермадксось +10

2  
Очаровательные рассказы Татьяны Маторкиной тронули моё сердце своей человечностью, душевным богатством, добротой. На глаза наворачивались слёзы, когда дочитывала рассказ "Павлик":
"– Лена, кадык кедьсэнек эри цёрынесь. Арази макссынек эйкакшонь кудос? Жаль, аволь киньгак, малавикс, – мерсь Андрей.

– Монгак истя арсян, кадык эри. Ковгак а макссынек. Ней кавто цёранок.

– Ды ниле кискалевксэнек, – мерсь Андрей, – кастасынек.

Нама, кастасызь: ансяк виев семиясто, покш вечкемасто лисить алкуксонь паро ломанть".

Татьяна, дальнейших успехов тебе на творческом поприще!


1  
Пек вадря!

Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2018
    Сделать бесплатный сайт с uCoz