Пачалгонь рамсиця

Ашолгадсь. Велесэ панизь стаданть, ды эрямось ушодовсь-лаказевсь.

Олда марто Марёяк седе курок прялизь тевест – течи сынь арсесть молеме Ратор ошонь базаров, минень-сюнонь рамсеме.

Базарганть яксесть-яксесть, совасть вейке лавкас.

«Тесэ, паряк, пачалготкак микшнить, – арсезевсь Олда, – аштек кевкстян». Ваксозонзо сась микшниця авась. Оршазь парсте – цитни, – турванзо артозь якстересэ, сельмензэ пижеть, прок псакань.

– Чего надо? – кевкстизе.

– Монень оно, теня, тыжны-пыжны пачалги давайте!

– Чего-чего?

– Ды тыжны-пыжны пачалги!

– Я не понимаю, о чем вы просите. Что вы хотите купить? – таго

кевкстсь абунгадозь микшницясь.

– Монень тыжны-пыжны пачалги! – Олда кодаяк эзь пота, вешсь

пачалго.

Рузокс кортамо а машты, пачалго ды паро.

Те шкане малазост сась Марё ялгазо.

– Да сковорода, сковорода ей. Она не понимает по-русски. А машты

говорить, – мерсь каштансто.

Микшницясь раказевсь. Истя пейдсь, мик чамазояк якстерькаень кондямо теевсь. Ды аволь ансяк сон, лавкасонть ульнесть ламо лия ломанть, эрзяткак, сыньгак цяхасть.

– Вай, Марё, мекс истя раксимик? – пшкадсь лисемстэ Олда.

– Кода а раказеват: рузокс кортамо а маштат, – мерсь Марё.

– Паро, эно, тон маштат, рузавась муевсь!

– Лездынь теть, Олда! Ськамот допрок ёмавлить, пачалгонь таркас максовольть теть песчувто. Усковлик кудов – мирдесь эйсэнзэ варсоевлинзеть кутьмере ланга, мекс школасо варакат кундсить…

– Видеть валот, Марякай, сави куцькатнень марто рузонь келентень кундамс. Пинге эряк – пинге тонавтнек. Ансяк ней чарькодия.

Полонс понгома

Вана уш таргодо ламо Гриня эрьва чистэ лоподезь сакшны кудов. Сими апак лотксе. Кудосо нинть кедьстэ весе чапаманть салсизе, кона кекшезель. Нина сонзэ анокстакшнызе паро тевс: тикшень ледема шкантень, зярдо сыть лездамо васолдо инжеть.

Течияк валске ланга мирдть-нить таго сёвнозевсть. Нина капши, пурны райцентрав, базаров, Гриня жо – веши пельдензэ ёжонть витемка.

–       Муйть! – пижакадсь Гриня.

–       Арась! – каршонзо ранги Нина, – тонсь весе симик, на, вана! –

лоштизе мирденть коня ланга пенчсэ.

–       Тон мезть, Нина, азаргадыть? – абунгадсь Гриня.

–       Тонь марто превсэяк лисят!

–       Ме-е-езе? – стясь таркастонзо мирдесь.

Нина ношкстазь ношкстась кудостонть. Симицясь арсесь, нись совась баняв, секс сонгак тов капшазевсь. Ансяк нись седе ёжоволь, кекшекшнесь. Неизе – Гриня совась баняв, сон юр-юр таргизе покш панжоманть ды пекстызе мирденть баняс. Кадык кудосо арась симемапель, Гриня ялатеке муи толведь, туи велеванть чийнеме прок азарсь киска.

–       Азё, витик тосо ёжот, кельме банясонть! – серьгедсь Нина ды тусь.

Шожда ойме марто.

Аволь кувать кеняркшнось Нина. Пелекилангсо ледсь мелезэнзэ: баня ужинесэ, нула-вала потсо кекшезель пуре марто вишка флягинезэ. «Паряк, а мусазо», – оймавтсь эсь прянзо Нина. Кодат тосо! Те кискась ды а мусы. Аволь истямо таркасто мукшнось.

Пекстамодо мейле Гриня озась баня кияксонтень, кундызе стака прянзо. Сельме вановтозо лоткась ужинентень, косто сеске неинзе флягань пилинетнень. Сельмензэ пешкедсть кенярксов сяткинеде. Сон ёртозь ёртовсь ужинентень. Сельгензэяк чудезевсть кода муизе пуренть. Баня кудыкельде мусь олгине ды ушодызе вечкевикс тевензэ.

–       Ва-а-а-дря, – пекензэ ёзазь мерсь Гриня.. мольсь мекев ды тулодизе

кенкшенть потмо ёндо.

Ошсто самсто Нина прянь-полдань синдезь чийсь банянтень. Ёртызе панжоманть.

–       Лиссть тосто, шайтян левкс! – каявсь Нина кенкшентень, ансяк тона

тарскак эзь тее, – вай, ды сон пекстызе, панжик, идемевсень пона! – пижнесь седе тов Нина.

–       Арест – есть арест! – кенярдозь, паро мельсэ мерсь каршонзо Гриня.

–       Лиссть, меринь!

–       Кавто чить дык кавто чить! Тонсь пекстымик, ней мон а лисян. Нина,

тон сырнень покольнем! – Гринянь келезэяк эль-эль велявтневсь.

Нина чийнезевсь банянть перька, варштась вальмаванть: Гринязо киякс

куншкасо, фляганть вакссо кутмордазь ашти, чамазо кенярксов-кенярксов.

–       Лисят? – таго кевкстсь Нина.

Гринянь эзть сато виензэ ве валгак ёвтамс, нинть каршо сон ансяк бабань пеште невтсь.

Кавто чинь ютазь Гриня, окойники, лиссь банястонть. Прязо – баягакс

гайни, чамазо – якстере сувтемешка. Чийсь кудов ярсамо. Бути нинть кежтне ютасть – мездеяк андсы Гринянь.