ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Татьяна Маторкина. Мизолкст 1

Мизолкст

Радиоманька

Эзь марявояк, кода сась сёксесь, ожолгадсть чувтотне, ды прасть лопатне. Мон сынь тонавтнеме ошов. Эрямо карминь Шунеева Лена марто вейке бабинень кедьсэ. Эрямось, видьстэ меремс, ульнесь аволь тантейтнеде. Азоравась чинь-чоп кунсолось радио. Ды аволь вейкеяк, мик кавто. Васенцесь гайгсь икельце кудосо, омбоцесь – каштыкеле. Радиось рангсь читькак, ветькак. Кодат тосо лоткавтомат, чидензэ чис, марявсь, гайгсь седеяк виевстэ. Мон яла салавинька вишкалгавтнинь вайгелензэ. Ансяк бабиненть пилензэ – локаторт. Марясы – гайтесь матрась, сеске чии ды нолдасы зярос мелезэ. Сонсь туи. Миненек жо Лена марто тонавтнемс, ловномс, сёрмадомс!

Весть кевкстия бабанть, мекс сон кунсолы кавто. Се тень:

– Бажан ламонь содамо, паряк, тосо ёвтыть мезеяк эрявикс, мон жо а карман содамо. Мерьсынек, моры Верка Сердючка, кода тень менстямс? Арась!

– Аволь уш покш зыянось, – таго пшкадинь мон.

– Тон мезть?! Те сехте покш зыян! Эли Сергей Петрович шабрам карми мездеяк содамо, мон жо эзинь маря. Арази те тев?

Весть марясынек, кортазевсть шабратне.

– Сергей Петрович, марят, валске марто радиосо пачтясть, келя, Маша Распутина лиси мирденень, – кортазевсь бабась.

– Кинень? – абунгадсь шабрась.

– Кинень, кинень, Киркоровнэнь!

– Кода истя? – седеяк абунгадсь Сергей Петрович, – ков Филя кадсы Пугачёвань?

– А содан, шабра, ков сон тейсы тюжа-ожо покш прянть, ансяк карми улеме Распутинань марто! – эзь пота бабанок.

– Распутинань ули эсензэ мирдезэ, содат, кодамо сюпав? Пиже ярмаконзо а ловновитькак, эйкакшосткак вейсэнь ули…

– Кинь марто пелькстат? – пижнезевсь бабась.

– Ва, баба, ванса, преветькак аламодо чаракадсть, – мерсь Сергей Петрович.

– Мезе, мезе?! – ацирьгадсь бабась, – чийть тестэ, превтеме атя! Тунь а чарькодят культурасо!

Истя прядовсь кортамост.

– Те-е-вть, – кувакасто меринь Ленанень, – бабанок латопрязо пек чиремезь. Тесэ кувать а цидярдтано. Эряви од бабине тенек вешнемс, паряк, седе сэтьме понги.

Ды сыргинек кудодо кудос якамо, од эрямо таркань кочкамо.

 «Ашо орма»

Шказо малав пелеве. Удыть малавиксэнь, уды велесь. Мон тей велявтан, тов, кодаяк а матедеван. Ков ёмась удомам? Кува якси? Ковоськак, вансь-вансь лангозом, кекшсь кудонть удалов, сон, паряк, кадымим удомо. Сэтьме. Маряви ансяк, кода молить стенасо понгавтозь частнэ ды токны седеем. Истя ульнесь а кувать. Марян кашторкст (вальмам апак пекста), кие-бути чии ды стакасто лекси, мерят, коштось тензэ а саты. Гайневтсть кенкшентень.

– Кинь кандтнить те шкане? – марявсь тетянь вайгелезэ. Алкукскак, кодамо паро ломань те шкане сы? Седе тов марян:

– Володя, Володя, адя, тосо, тосо, палмань прясто уськетнень салызь! –

пижни Васька шабранок, – мон нейке кундасынь, а тон…

– Кодат уськеть-палманть, мезть кортат?

– Уськетнень салызь, мерян теть, ниленест чийсть, цёрань кондят, гайневтть милицияв куроксто, мон кундасынь! – кепедизе мода лангсто сянгонть ды тусь чиезь лей ёнов.

– Вай, ормаза, тунь превстэ лисеме кармась симеманть марто. Колмоце тарго симкшни апак лотксе, – корты тетям.

Омбоце чистэнть саизь Васькань пичкамо. Зяроцеде уш «ашо ормась» стардсы цёранть, сонензэ ялатеке.

      Се вестэнть, кода карминек содамо мейле, инжекс Васька сакшнось аволь ансяк миненек, шабрань лия кудотнескак. Сянгонзояк ки куншкас ёмавтызе, ледстнезтано эйсэнзэ, зярс а нолдасызь пичксема кудосто. 

 Баня кевть

Минек шабра Кеченьбие велень эрицятне важодемань вечкицят. Кизна паксясо-пиресэ, васоло велева, тельня – кудосо. Кемть кевердить. Кемтнень кевердемадо мейле аватне пештьсызь сынст покшс кескавс ды сыргить микшнеме. Васоло велетнева яксить-арднить.

   Весть микшнемстэ кавто ават пачкодсть вейке кудос. Паряк, арсить, нолдасызь эжнеме телень якшамо чистэнть, секень вант, кельмат чаво ульцясонть. Кенкшенть панжомо лиссь азорось.

– Кие тосо? – кевкстсь кеме вайгельсэцёрась.

– Минь микшницят.

– Мезе микшнетядо?

– Кемть! – кавто вайгельсэ мерсть аватне.

– Микиш, мезе микшнить, эзинь маря? – кевкстсь низэ, сонсь каштлангсо

прянзо венстизе.

– Кевть микшнить. Баня кевть, нать…

– Кодат баня кевть, стакат сынь, – абунгадсь нись.

– Аволь, аволь кевть, кемть!Понань лембе кемть! – пижакадсть

кенкшенть удалдо аватне.

– Оно мезть, миненек марявсь баня кевть, совадо эно. Микиш, нолдыть

ломантнень, кадык эжнить. Ды, паряк, рамавлить тень лембе кемнеть?..


«Самсон» радиось

Вечкан ардтнеме тиринь кудов. Те эрси аволь пек сеедьстэ, ялатеке велесэ свал яксян содавтомо васолбабань-бодянь. Сынь свал учить эйсэнь, кенярдыть монь самонтень, вечксамизь, вейкине нуцькинест.

Нейгак вана аволь пек умок сыргинь Алопев сыретнень содавтомо. Вальмалозост пачкодемстэ маринь шалт. «Телевизор, нать, ваныть», - арсезевинь. Алкукскак, вансть меельце сериалонть. Кинось прядовкшнось, сынь яла кель яжить, кода ды мезе, мезе теевсь героенть марто ды мекс истя прядовсь.Монь совамось сынст аламодо сыргозстинзе. Бабам чаразевсь перькан, кармась каванямо. Бодям кевкстнесь тонавтнемадом, эрямодом.

– Содат, ней минек радиось од станция кунды, – ушодсь бодям.

– Нама, кунды, – поладсь бабам, – чоп ансяк Самсононь кунсолат, пиледеяк а усковат радионть вакссто; мерян, азё туляканть андык, марикскак а теи. Мезтни истя?! – рукштядинзе кедензэ васолбабам.

– Кодамо «Самсононь» радио? – эзинь чарькоде мон.

– Кодамо-кодамо, тон аздат? Ней од станция панжсть, «Самсон» лемезэ, – поладызе ёвтнеманзо бодям.

– «Самсон»??? Те оштё кодамо? Мекс-бути васнцеде марян, – абунгадынь мон.

– Моротне! Моротне кодат! Эх! Кунсолан, кунсолан, вай, малав весе

эрямосто саезь. Аштек, нолдаса теть, – шешкезевсь бодям, ёкстызе уськенть розеткас.

«А белый лебедь на пруду…» – моразевсь цёрась радиостонть.

– Вай, ды те «Шансон», бодяй! – верьга вайгельть раказевинь мон, – «Шансон» лемезэ, аволь «Самсон».

– Кода мерят? «Шансон»? Нать, алкукс. Адя паро, миненек кода Шансон, истя Самсон, ялатеке.

– Пилетнень лиясто шлякшномс эряви, – пейдезевсь бабам.

– Тонсетнень шлямс а эрявить? Тонгак Самсон мерят. Оно кода, сыречись теть аволь од пора! – чаравтызе прянзо бодям.

«Самсононь» кунсолозь, паро ёжо марто, колмонек озынек тантей

сюкородо ярсамо.


АЛТ

Умарьгов. Сюронь урядамо шка. Пси. Лексят – коштось а саты теть, маряви, нейке лепият.

Омбоце тарго Эрькаень Андю важоди паксясо. Шкась – вачо иетне. Ломантненень а мезде ярсамс. Ансяк Андю бодят эрьва чи сы ал марто. Кой-кинь саразосткак арасть.

– Вантака, – тарги юдманзо Андю, – монь бабась тень кавто алт путсь, –

атясь мизолды, сеянь чова сакалнэнзэ тарныть. Цёратне варштасть вейкест-вейкест лангс, сынест Андю маряви сюпавокс. Саразонзо, неяви, ламо, эрьва чи алдо ярсни.

Шкань ютазь вансызь цёратне, тевесь аволь ванькс: Андю чистэ кандтни кавто алт. Паряк, некетнень? Весть, зярдо Андю ков-бути аламос ёматотсь сельме икельдест, таргизь юдмастонзо алтнэнь ды артсть эйзэст вишка тешкставкскеть.

Омбоце чистэнть озасть цёратне-атятне ярсамо, сынсь салава ванкшныть Андю ёнов. Атясь таргинзе содавикс ярсамопелензэ, мизолды, каштангали:

– Монь бабась, мерть, таго тень кавто алт путсь…

– Таго? – кевстизь цёратне.

– Вансынк ва, - кепедизе судонзо верев Андю.

– Андю атя, неть алтнэнь зяроце тарго канднят юдмасот? – кевкстизе сехте ёжов цёрась.

– Кода-кода? – абунгадсь атясь, теизе прянзо амарикс.

– Манчить эйсэнек парсте, ансяк миньгак пулот алга  ведне

жойкавтынек. Вант, тешкстнэнь несыть? Минь путынек. Цяхазевсть цёратне, паксянть келес кайсети ракамост. Андю атянь чамазо теевсь прок пандя лангсо якстерькаень. Кундызь лавгамсто!



Категория: Мои статьи | Добавил: tati (14.09.2010)
Просмотров: 534 | Рейтинг: 5.0/1 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz