Ильведькс

Ёвтнема

Даша аштесь озадо вальмалангсо. Сон кувать вансь пертьпельга, алов, менелев, се кинть лангс, кона туиль сынст ошсто ды ветиль ков-бути паксяв, васов, лия ошов. Те кияванть чинек-венек певтеме арднесть машинат. Ков? Мезекс? Даша вечкиль ваномо вальмава. Нама, вельть вере, косо сон эри  этажось кеменце, ялатеке сонзэ икеле неяви пель ош. Косо-бути ало якасть ломанть. Оно, юты Веруш шабрасткак. Кода свал, канды зярыя юдмат. «Эряви кирнявтомс. А мезть таргсемс шканть. Меельцеде варштан мазычинть лангс ды – икелев», – ладизе сон эсь пачканзо.

– Тейтернем! Чивалдынем! Ойминем! Тон мекс тозонь кузить? – совась тейтерензэ нупальс Света, авазо. Сон чувтомсь тарказонзо, зярдо неизе тейтерензэ ушо ёнов пильгень нолдазь. Вейке-кавто секунда ды сон кирнявты алов… Кеменце этаж… Эйстэнзэ мезеяк а кадови… Авась сеске чарькодсь: тейтерезэ анок кирнявтомс алов. Теде кортась весе вановтозо. Сон ульнесь прок аволь ломаненьгак. Авась содылизе тувталонтькак, мекс истя.

– Аштека, кунсолока, – авась теиксэль ёнонзо эскелькс.

– Иля юта тей! Мон кирнявтан!

– Чипайнем, мон эрян тонь кисэ! Тон – монь шожда варминем пси шкасто, тон – коштом, конасонть лексян, тон – весе эрямом. Валгт, кунсоломак. Адя, варштак чамаварчамос. Варштак, кодамо одат, мазыят! Чова рунгине, варштак, кодат тонь лёмзёр тюссо сельминеть, свал валдосто палыцят, инзей турвинеть, а судынеть… Сон тунь лия ёнов а молиця, вишкинькине, мазый, мон сеске, чачтома кудосо редия… Варштака, кодат тонь череть, чевтеть-чевтеть, шождынеть, цитниця-раужот, вишка шкастот кода вечкилинь кодсеме теть черьбулынеть! Ансяк кемгавксово иеть! Весемесь тонь икелепеле… Эрямс ды эрямс теть!..

– Авай, мон аволь…

– Пазось кучинзеть монень казнекс. Сон кучинзеть тей э-ря-мо, валдо тевень тееме, вечкеме…

– Иля корта монень вечкемадо! – пижакадсь Даша.

– Вечкемась эрямосо саи пек покш тарка, – поладсь седе тов авась. – Вечкемасто тон чачитькак. Сяткинем, те цёрась аволь тонь. Кода ульнесть ламо тейтерензэ, истя кадовияк, истя карми свал. Сон чачсь истямокс, мезеяк а теят ды тон сонзэ а полавтсак. Сы шка ды тон вастсак сонзэ, алкуксонь вечкеманть. Весемесь икеле. Содат, зяро паро учи эйсэть?

– Мон а кеман парос…

– Мекс тон лоткить сонзэ лангс? Варштака пштистэ эсеть перька, кода ванныть лангозот, кодат мизолкст теть казнить, кода кортыть мартот, арсить теть ансяк вадря. Кемгавксово иеть – эрямонь ушодкс. Тон вастсак ине вечкеманть. А вана зярдо… зярдо чачи эйдинеть, тонськак прок одс чачат, кармат улеме лия ломанекс. Пазонь мизолкс кучови теть. Седе уцяскав ава а муят, кона кирди кедьсэнзэ тякинензэ, кона анды сонзэ мештесэнзэ… Ледстяса, зярдо тон чачить, мон ливтнезь ливтнинь. Тетядот а кортангак… Тон казить тенек истямо кеняркс! Ней те кенярксонть чалгсевлик… Дашинем, те цёранть кондят масторсонть – певтеме, тонь кондят – арасть.

Кие тосо учи эйсэть? Тов, ков пурныть? Пазось а вечксынзе сетнень, кить тукшныть эрямосто эсь олясо. Сон ёрттанзат раужо ойметнень юткс, адс…, косо ансяк ломанень чавныцят ды тонь кондяттнэ, эрямосто туезтне.  Кияк а карми мартот кортамо, ансяк сялдомо, сёвномо, згилямо, нарьгамо. Путыть кутьмерезэть кандтнемс стака кевть ды чинзэ перть кармат кузнеме пандо пряв, конань арась пезэ, ды лездыця теть а ули. Моньгак лезксэсь а пачкоди. Тонь леметь а мереви кундамс, поминамс. Велявтт ёном, сяткинем, арсек валом лангсо. Пазось сонсь соды, зярдо саемсат эстензэ менелев. Сонензэ кочкама, аволь тонеть.

Даша ваннось ушов, налксесь пильгесэнзэ, конат венстязельть вальмань тона ёнов, тей-тов яхоесь эйсэст. Кодаяк эзь пота-ёма сэредьксэсь, сон прок  пезнась ойментень. Вечкевикс ломанезэ миизе, манизе, кадызе, пейдизе. Сондензэ башка, секе шкастонть вастневсь лия марто. Даша, паряк, кувать теде а содаволь, бути а вастовлинзе ошонь куншкакуросо. Аштесть кутмордазь, вечкенесть вейкест-вейкест. Тейтересь таймазкадсь ды кодаяк эзь кеме неезентень. Сон мольсь кутморицятнень малас ды састо-састо шумбракстнесь. Вадим эзь тандадо, эзь талакадо, прок истя эрявськак. Сон шумбракстнесь стяконь, нулгодькс мизолкссо, шумбрат, келя, Даша, теевть содавиксэкс монь тейтерем марто, сонзэ лемезэ… Даша эрязасто велявтсь кавто мизолдыцятнень эйстэ ды тусь, сонськак а соды ков, весе ошканть…

– Даша марто ве классо тонавтнинек, – ёжовсто манчесь цёрась, – а чарькодян, мекс тусь, кортамояк эзь карма, сонсь жо васенцекс пшкадсь тенек…

Чокшнень перть эйсэнзэ оймавтсь авазо. Зярыя шка ютась теде мейле, марявсь, весемесь удало, стувтови. Ды… вана, кузсь вальма лангс, арси кирнявтомс кеменце этажсто…

– Даша, тейтернем, мезе мон карман тееме ськамон, тонстеметь? Зярдо чавовсь тетят, тон ульнить монень идемакс, валдокс, чипаекс. Ней кадат эйсэнь, арсят ансяк эсь прядот, а кода монень улемс? Кинень панжса оймем, сэредьксэм? Кинень? Шабратненень, кинь зярдояк а прядовить эрямост лангс пеняцямост? – аванть чамава чудезевсть пси ды ризксэв сельведть, сонзэ валонзо маштсть. – Тон теят покш ильведькс. Монь арась мелем кемемс: стяко чачить. Пазось казнекс тень кучинзеть, эрямонь поладыцякс. Лисни, монь чумось – тон кузить вальма лангс ды анокат кирнявтомс, лисни, стяко кортангак…

Даша варштась аванзо лангс ды эсензэ сельмензэяк пешкедсть сельведте.

– Авай, авинем, нолдык чумом, те ильведькс ды… – сон таргинзе ушосто пильгензэ.

Света ёртовсь вальмантень, каподизе тейтерензэ, кутмордызе, ушодсь псистэ палсемензэ.

– Авай, нолдык чумом, мон а видестэ теиксэлинь, мон а кадтан тонь, свал улян вакссот, мартот, – ильцесь Даша.

Сынь кавтонест, ават-тейтерть, лекшкадозь аштесть киякссо озадо ды авардсть. Сельведтне неть эзть сэпшкавто, сынь макссть од эрямонтень кемема.