ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Мои статьи

Татьяна Ковалева. Курортто мейле. Мизолкс

Курортто мейле

Мизолкс

– Вай, Ольгакай, ялгинем-дугинем, окойники, пачкодить! Верепазось тень кеняркс кандсь. Истя учинь эйсэть! Ютак, ютак икелев, озак! Паро ломанесь яла паро шкане сакшны. Мон вана течи тантей сюкорот панинь – теке седеем марясь, инже сы. Несыть, кельмемеяк эзть кенере, пар эйстэст моли. Лаки ведемгак анок, пси чайде каванятан. Содат, кодамо чаесь? Васолдо уския: коськстэяк чинедензэ пешкедят. А уш чайникстэ нуртязесь судоварят сези…

Паряк, сывель ямдо корчавлить? Нейке каштомсто чугунонть таргаса. Мерят, а эряви? Тон иля визде, монсь уш завторкинь.

Эно симть чайденть ды кунсолок. Тондеть башка, кинь марто седейшкава кортамс? Валтнэ потмозом а кельгить…

Улема, содат уш, ков мон якинь. Ку-рор-тов! Седей ормась сыргавтнимим. Поездэсь данки-дынки кшнинь чаронзо марто ков ансяк а усктанзат. Истя пачкодинь васов-васов: Кавказов. Лембе енксов. Нейгак,  лисян ушов, варштан менелентень –  ве ёно ашо пельтне марявить тень сэрей пандотнень кондямокс, конатнень пряст чинть каршо цивтердыть. Келя, ловось лангсост кизнаяк а солси. А кемевияк: ломантне тосо ушова потпанарсо якить!

А уш кудотне кодат сэрйть! Теке пандот. Лангсек-лангсек зярыя этажт. Мон понгинь нилецес. Виде, васня алсентень совинь курмом-кармом марто. Чевтестэ вастымизь. Конёвон-мезень ванкшнызь, та-мезть сёрмалесть. Ильтимизь верев. Чизэ чопотема малав. Монень апаро: эряви венелев молемс. Каня, ков? А содан. Валгинь алов. Якан ушова – кардаз удалкс вешнян. Санаториянок перька – чувтт-куракшт, мазый цецят. Учия, зярдо овсе чопоти, ды ландинь юткозост…

Тон, Ольгакай, мезть пейдят? Монень сестэ куш авардть… Тевем теия – сюкпря Верепазонтень, кияк эзимим стардо-куродо. Ансяк кирмалав лопинеяк а косто сеземс. Сезинь мень-бути тикшинеть. Ды, прахось саевлизе, суром теке уросо пелевсь: покш мазый цецясь истя пупимим…

Одов кузинь эсень палатантень. Мадинь тарказом, венстия рунгом ашо, чевте ацавкстнэнь лангсо. Вейкеяк он эзинь нее.

Валскень стязь ваннан: шабра авинетне ков-бути пурныть-сэрнить. Сынь мондень икеле састь, тонадсть уш. Кевкстинь, косо шлямс-нардамс? Онот, келя, венелев яккамо таркась. Тосо, туалетсэнть, ведеськак. Коникем песэ – колмонст нардамот. Саия сехте вишкиненть, совинь те туалетэнтень. Тосо ашти блидя, эзганзо ведне чуди. Та-мень покш плаштя. Лепштия ды тандадынь: ведесь увсо тусь. Васоньгоморояк эзинь кенере пештямо. Эно чаманть ёрвалдомс сатотсь…

Тон таго ракат? Ва, чаесь кельми, симть! Куроксто обезьган ладсо весенть редия-чарькодия: ков венелев якамс, косо чама шлямс, косо паникудосост таркам. Ульнинь врачонть кедьсэ. Эрян, теке боярава: а каштомо уштомс, а пидемс-панемс, а ракшат симдемс-андомс. Вейкесь берянь: кузтематне пек сэрейть. Зярс кузян те нилеце этажонтень, оймем мештезэм а кельги. Абунгалян, мекс монь шабра авинетне сакшныть тунь апак сизе? Эзь кирде седеем, кевкстинь. Каня, кортан, тыненк врачось меньгак уш пек паро надобия максни? Ёвтадо, монгак истямо вешан. Ансяк конёв лангс сермадынк, илязан стувто. Вейкесь туемстэ сеске каподсь ручка ды тешкстась конёвненть лангс вейке вал.

Саия те конёвненть ды молинь эсень врачонтень. Кортан, сёрмадстодо тень вана истямо ормаменькс, вием маштсь чинь-чоп зярыяксть верев кузнезь.

Врачось варштась конёвонть лангс, ловнызе ды кода раказеви! Виде-паро тонь ладсо, сельведьс. Сурсо невтни ды натой а сеске тензэ ёвтавсь, мезе тосо сёрмадозь: «ЛИФТ».

Эно, оймак, оймак. Саты ракамс. Кода чаесь? Тосто ускозесь.

Паро тагояк понгомс те Кавказонтень…

Т.Ковалёва

Категория: Мои статьи | Добавил: tati (06.02.2010)
Просмотров: 928 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. З... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
[01.02.2010][Мои статьи]
Александр Маркович Д... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz