Партизанонь калмо

Пижине кужосо,

Кудряв килей ало,

Цецянь кумбо вакссо

Партизанонь калмо.

Калмонть велькссэ ашти

Калмазенть авазо,

Аварди, сон лайши,

Ризнэзь корты тензэ:

"Вечкевикс цёрынем,

Седей тарадкинем,

Эзинь арсе теде–

Лайшеме тонь велькссэ…

Зярдо, тякам, чачить,

Ульнесть кавто иеть,

Тонь тетят сюпавтнэ

Вирь чиресэ чавизь.

Ульнесь пек стака тень,

Арсинь, пингем прядовсь,

Колмо цёра-эйдень

Кедь лангозон кадовсть.

Ванстытинь мон сестэ

Вачо куломадонть.

Эзить тень ванстово

Раужо войнадонть.

Виде пиче рунгот

Давол сявордызе,

Раужо куломась

Эрямот сезизе.

Содавлить бу, цёрам,

Кода монень стака…

Ансяк седей ладсян:

Путык прят а стяко.

Ошт а палыть толсо,

Оймась войнань чадось.

Ине изнямосо

Стака войнась прядовсь.

Сэнь менелесь валдомсь,

Гайгить мазый морот,

Пижелгалить паксят,

Чачсть лията цёрат.

Кудряв килей ало,

Цеця потсо калмот:

Кирви войнань тешксэсь,

Стака пингень сталмось”.