Иля пува, варма

Вай, иля пува, варма, вирь ланга,

Тон иляк чирькавт тумонть рунгонзо.

Тон иляк чирькавт тумонть рунгонзо,

Илить разеде пиже лопанзо.

Се тумонть ало, вай, солдат уды,

Сон умок уды ды а стявтови.

Ки те солдатось – ней а содави,

Апак тешкстаяк сонзэ калмозо,

Апак сёрмадо, кода лемезэ.

Вай, а сакшны тей сонзэ полазо,

А лайшекшнесы тиринь авазо.

Пелеве шкане цёков цёкорды,

Чилисемане куко пря чави.

Ашо килеесь – мазый полазо,

Сёрмав кукинесь – тиринь авазо.

Вакска ютамсто алов сюконяк,

Те солдатонтень пасиба ёвтак.

Ятонть изнямсто прянзо путызе,

Часиянок кис сонзэ максызе.

Вай, апак стувто сынь, неть солдатнэ,

Лемест помнясызь весе ломантне.

Минек масторось сынст ледстнесынзе, –

Пингень тол палы минек седейсэ.