Урознэть

Кизна вейке чистэ

Пангс вирев якинь.

Нать, эзь ульть пиземе:

Вешнемстэ майсинь.

Велькссэнь норовжорчось,

Маряви, лездась.

Гайтев моросонзо

Курот тень евтась...

Пешкедсь монь паргинем.

Шка сыргамс кудов.

Варштавинь пертьпельга

Ды коминь одов.

Тикше, лопа потсто

Лангозон ваныть

Вишкине пангинеть,

Монень энялдыть:

"Тетясто - авасто

Илямизь яво...

Мука тенек тарка.

Вант, элеть чаво?"

Пурнынь мон "урозтнэнь",

Састыне сыргинь.

Пангинетнень марто

Кудос самс кортнинь.