"Лециця"

Велезэнек сы лециця –

Теде ульнесь яволявкс.

"Весе, кинь ули ормазо,

Панемазо а мелявкс.

Евтазь шкасто састь ломантне,

Кона – ялго, ки – лишмесэ...

Весе велень эрицятне

Ванан-теян, пурнавсть тезэнь...

Курок пачкодсь лецицянок,

Пейдезь, шумбракстнезь совась...

Минек кедтне мельспародонть

Ярмак сюлмонть чевелясть...

Икельдинзе весень Маря,

Пшкадсь покш вайгельсэ, марямга,

Келя, майси сон пек прядо.

"Инеськеть, уш тень лездадо!"

Макссь лецицясь надобия,

Майсемат, келя, стувтык.

"Пек шумбра ломанекс улят,

Сюкпрянть икелев евтык!"

Пильгензээ мельганзо ускозь

Совась Петятя шабрам.

Сэретькстэнть келезэ сусковсь,

Ансяк стакасто укставсь.

Лецицясь тень чарькодизе,

Кескавс кеденть чопавтизе.

Таргась тосто сон паргине.

Сайсь венстязь ярмак сюлмине.

Катя баба сельведь марто

Пачтясь седеень ормадо.

Умок сонзэ "д а в л е н и я".

"Арась тень эрямо лия."

Лецицясь кенярдозь пачтясь:

Тенде ули сонзэ менькс.

"Ярмак лангсо иля аште,

Курок улят тон спортсменкс!"

Нина баба сюлмонь путозь

Евтни, што сэреди тутмась,

Мезде рестазде ярсы,

Мейле мештензэ порксы.

"Ули мелеть тонь пичкамс?"

Кевкстсь лецицясь састо.

Бойка таргась надобия

Столь алдо, кескавсто.

Ки лиси лецицянть кедьстэ,

Курокке кудов капши -

Симемс максозь надобиянть,

Паряк, течи жо пички.

Читне ютыть, чиезь - чиить...

Вана ютась цела ков.

Ансяк велень эрицятнень

Ормаст мартост, эзть кадовт...

"Лецицянок" цела кескавв

Надобия усксесь вейке...

Прядо, каряздо, пильгеде,

Кедте, тутмадо, седейде.

Питнеськак ульнесь паро.

Пеедькшнемадо пек пелезь

А евтасынек зяро...