Мелявкс велем кис

Тиринь велем кувалт

Арсезь эскелян…

Кудотнень лангс ванан –

Прясон чаравтан…

Мазый од одирьвакс

Ве шкасто стякшность…

Ульнесть сельмень сявадкст,

Мезть теде сепомс…

Вейкетьстэ уцяскавт

Се шкане ульнесть…

Трясть сынь покш семият

Ды тенень кецнесть…

 Шкатне ней полавтовсть

 Пакшат кассть ды срадсть…

 Тетят-ават сыредсть.

 Ламот уш арасть.

Ней чаво кудотне

Нусманят аштить..

Сялгизь сельмест модас,

Эсь прядост арсить.

 Сэрей пиципалакст

 Яннэнть тенст ацасть,

 Пупиця кирмалавт

 Сындест сэрейть кассть.

А уштневить пецькаст,

Кенкш а чикорды…

Кши панема чине

Судо а куцти…

Латало атякшкеть

Вайгель а нолдтнить,

Вальмало лисьмастонть

Ведне а кандтнить.

Кадозь кудынетне

Маряви, кортнесть…

Истямо пингеде

Сынь, каня. арсесть...

Шкат, паряк, истямот

Велезэнек сыть…

«Урознэ» кудотне

Чаво а улить!