Каштом ланго

Велень кудо каштлангтомо

Тунь превезэнь а сови…

Велесэ сон эрицянтень 

Авань ежокс маряви.

Кода ульнинек вишкинекс

Лембесэнзэ сон кастась.

Касынек минь, кепетинек,

Орма-сэретькстэ ванстась.

Яла тельня кирякстнемстэ

Сэрьс лововт, начкот, кельмезь

Носкозь кузтяно каштом лангс,

Ансяк сон ней а кежей…

Сон эждьсамизь, костясамизь,

Кеняркс, вий максы тенек.

Пандо прясто кирякстнеме
Таго пек покш меленек.

Эйкакшпингесь потась васов,

Каштлангось кадовсь ялгакс –

Кельмезь рунгонть сон эждясы,

Пани прястонть покш мелявкст.

Ансяк  сонзэ лангсо мадезь

Кеместэ матедеват,

Валскень стязь свалке маряви

Авать потсо веть печтнят.