Эйкакшпингем

Эйкакшпингем, эйкакшпорам

Тунь монь мельстэ а тукшны...

Седе уцяскав эрямо

Пингем перть уш а ули.

Эрзянь вишкине  велине!

Тосо шачинь ды касынь!

Чевте тикшине потмова

Пильгстэ прамс кепе чийнинь.

Вишка лейнесь, косо "селтонть"

Минсь, эйкакштне, пиринек,

Иневедькс "Раужо" марявсь,

Кедьсэ калнэть кундсинек.

Мельсэнь ашти, кода тельня

Ловонь кудот уштынек.

Ансяк се "лембеденть" мельга

Каштом лангс пек капшинек.

Понань кемень,начко варьган

Зярдо коськить, пек учинь.

Монсь жо книга марто вейсэ

Каштланг уголсо носкинь...

Тунда ловось  ансяк штаты,

Васень пижесь появи,

Паксянь чурькат вешнетян.

Зепеванок розень кши...

Тетят-ават чоп паксясо,

Пидицят-паницят минсь...

Ушодтано мастумарьстэ,

Сахар ведьс каясынык сынст.

Мацсто ловсо, кши сускомне,

Пандясто пиже чурькат...

Седе  ярсамопель тантей

Иля вешне, а муят...

Недлячива капшазь авам

Каштомсто прякат таргсиль,

Чапамо ловсо ваканось

Икеленек вельть чарыль...

Кизэнь пек кувака читне

Налксезь, важодезь ютыльть.

Чинь прядома ланга пакшат

Скалонь вастомо сыргильть...

Велень ульця пешкедсь шалтто –

Пакшат вастовсть аваст марто.

Тонат важодемстэ састь

Нумол пельде "казне" кандсть...

Чокшне авам потявтомсто

Тенстьке кедезэнь максыль,

Ве карвояк, ве промояк

Скалонть лангос а озыль...

Кружкиненек кустем песэ

Лембе ловсыне учить...

Курок менельсэ тештетне

Паро он тенек арсить...

Ламо эрямостон стувтовсь,

Эйкакшпорам – зярдояк...

Лецтнемстэнзэяк а сизян,

Евтневлинь бу теде свал.

Эйкакшпингем, эйкакшпорам

Тунь монь мельстэ а тукшны...

Седе уцяскав эрямо

Пингем перть уш а ули.

http://www.photodom.com/photo/1852750