ТЕЛЕНЬ КЕНЯРКСТ

Тупор-тапор ашо овтокс

Ёнксозонок телесь сась.

Ламо валонь апак ёвта,

Сон тевезэнзэ кундась.

Ашо вельтявкскесэ моданть

Вельтизе пестэ келес.

Мазый шаршавт вальмас кодась,

Ванськадсь-мазылгадсь велесь.

Ранги весенень: «Лиседе!

Эйстэнь а мезде пелемс.

Ансяк лембестэ оршнеде —

Кельмесь а суски пилес!»

Кадык тундос оймси модась

Сась оймень таргамо шка.

Кенярксось кекшемс а кода,

Сон валдо ды истяшка!

Теле, теле, ашо панар,

Тон мазый тундонь мирде.

А пувтнят эйсэнек рана,

Седейсэ кувать кирдевть!