ДОВА БАБАТ

Сынь нейгак кандтнить раужо пацят,

Кадык сельмест а начтыть сельведть.

Киньгак эйстэст а эряви ладсемс, —

Седей лембест умок эйкс кельмесь.

Ютыть ульцява — сэтьместэ кортыть,

Мазый пораст ношкстась, ней а нить...

Мельгаст ваныть свал панжадо ортаст,

Яла учить: ва азорост сыть.

Тюжалгадозь сёрматнень сынь ванстыть,

Ловномстост свал седеест чамдыть.

Ськамоньчинть сынь теке стака канстокс

Чивалгомав чатьмонезь кандыть.

Мезть кортамс, эрси — сельмест сявадыть,

Зярдо ваныть лиянь нуцька лангс.

Стака ризнэмась эйсэст а кадны,

Чинек-венек кундси мештес, санс.

Вельть сэпей явсь уцяска эрямось —

Одсто кадовомс пайстомокс тенст.

Бронзас валозь солдатт сюконямо

Пингень перть кармить модас сыненст.