Монь Россиям

Сэняждыця менельстэнть, васолдо,

Ашопельтне неявить сиякс.

Иневедень шержей эйтнень ёндо

Ушодксонзо саи Россиясь.

Седеем кенярды мазычиденть.

Вечкевиксэм! Мон тонеть мерян:

- Монь Россиям! Ульть тон олячисэ.

Ансяк те кемемасонть эрян.

Паксятнесэ касы сырнень сюро.

Тусто вирть, лугат ды домка лейть…

Косто вастат сюпавчи тон зняро?

Ансяк кить улест седе келейть.

Тиринь ёнксось монень пек содавикс.

Мельсэнь кирдян ашо килейтнень.

Чиресэнть неявить тейтерь-авакс,

Прясо черест нурьгить леентень.

Чивалгомась палы кирвитолсо.

Лепамтьсы сонзэ чокшнень сувось.

Виренть песэ, велиненть маласо,

Россиядо гайнезевсь морось.

Седеем кенярды мазычиденть.

Вечкевиксэм! Мон тонеть мерян:

- Монь Россиям! Ульть тон олячисэ.

Ансяк те кемемасонть эрян.