МАСТОРАВА.Кевейкееце ёвтамо. КИЛЯВА. Пленение Килявы.

Пурнась-сэрнясь Килява, тусь вирев,

Арсесь-сыргась, мольсь тантей кстый мельга.

Кочки, пурны кстыйть кемень сурнэсэ,

Пешти паргине кавто кеднесэ.

Кунсолы — виев варма кепететсь,

Мари — вирь ланга давол пувазевсь,

Кона модас эчке чувтнэнь менди.

Варштась менелев — вере менелесь

Пельсэ копачазь, теевсь потмура.

Зэрни пурьгине, кивчкаи ендол.

Равжо кренчт ливтить чилисемасто,

Варакат ютыть чивалгомасто.

— Те, нать, Идемевсь таго азаргадсь!—

Тандадозь серьгедекшнесь Килява.—

Те, нать, апарось Масторонть алдо

Одс сы нарьгамо эрзянь ломантнень!..

Чии, оргоди вирьстэнть Килява,

А соды, козонь кекшемс зыяндонть.

Зярдо пачкодсь сон чачи велентень,

Эсензэ кудос арсесь совамо,—

Ваны — велеванть кирвитол яки,

Кода толбандят кудотне палыть,

Масторксось ацазь кулозь ломаньсэ.

Ушова чийнить азаргадозь ятт.

Се батыйть-печказт нарьгить эрзятнень,

Панить куломас торосо, толсо.

Киляванень мезть тейнемс, ков туемс?

Козонь оргодемс ней, козонь кекшемс?

Арсесь сон латко потмакссо кекшемс —

Латко потмакссо ломань верь чудесь.

Арсесь сон мекев вирев велявтомс —

Овтнэ, верьгизтнэ вирьсэ азаргадсть.

Арсесь сон вишка гулькакс теевемс

Ды ливтямс, куземс менель ежонтень —

Раужо кренчсэ менелесь пештязь,

Менелесь кренчень коволсо вельтязь.

Арсесь сон Сура леентень совамс —

Суравась Сура лейсэнть кундасы

Ды тейсы сонзэ эстензэ урекс.

Кассь Сура леенть вакссо пой чувто.

Пой чувтонть алов Килява озась,

Сонзэ тарадтнэнь, лопатнень потс кекшсь.

Толстояк батыйть-печказт муекшнизь,

Тостояк благой душмант кундакшнызь.

— Эрзяванть илинк чаво! — мерсь прявтост.—

Илинк нарьга те мазый тейтеренть.

Нардев пикссэ тынь чевтестэ сюлминк,

Крандазонтень од тикше лангс путынк.

Вадря казнекс сон ханонтень ули,

А стувтсы минек паронть прявтонок!..

Мурдасть сынь Сура леенть томбалев,

Мекев сыргакшность чиньстямо енов.

Кувать а кувать мольсть паксятнень трокс,

Васов а васов ардсть идем лемга —

Чополгадомсто вастызь се ханонть,

Конанень алтызь максомс Килявань.

«Кенярдан: пароль пек каявомась!

Уцяскаван мон: ускан покш казне!

Паро мельсэ ней ханось вастсамам,

Тейтеренть несы — прянзо емавтсы...» —

Эськанзо арсесь ежов од мурзась,

Кона каявкшнось Пензай веленть лангс.

Ханонтень эно сон мизолдозь мерсь:

—    Ускинь истямо, ине хан, казне,
Кодамо онстот, кеман, эзить, нейть!

—    Эрьга невтика, кодамо казнесь.
Ванноса, мезем монь те шкас арась.

—    Вант! — кепедизе сон эчке кенденть,
Невтизе пикссэ сюлмазь тейтеренть.
Кода неизе ханось Килявань —
Абунгадсь, кецязь мольсь малазонзо.

—    Сонсь мазычись те крандазсонть ускозь!
Сонсь мазычись те улавсонть сюлмсезь!
Сисем полат монь гаремсэнь улить,
Масторлангонь сынь сех мазый ават.
Ансяк сынст мазысь вана тень вакссо —
Ковонть валдозо чинть валдосонзо.

Кода кавто тештть цитнить сельмензэ,

Кода якстере зоря чамазо,

Рунгозо кода ашо килейне...

—  Те паро,— ханось пшкадсь,— кортамс а мезть.
Пек мелезэнь тусь, мурза, тонь казнесь.

Тень кисэ теян ине сабантуй,

Колмо чить мерян тенк симемс-ярсамс.

Зяро сэвеви — саеде сывель,

Зяро симеви — саеде кумыз.

Тыц пештинк, печказт, эсь вачо пекенк.

Морадо морот, кисэнь ознодо,

Пингень эрямо монень арседе.