СЕДЕЕНЬ ЭЖДЕМА ОЗКС

Мон кезэрень авакс прям мария,

Мерят, алкукс – ёвксонь орожиян.

Ине вийть тердян эстень лездамо –

Кадык кармавтадызь монень само.

Виряватнень, ведяватнень тердьсынь,

Весе энялдомам сынест мерьсынь.

Нороваванть икелев сюконян,

Мастораванть пильгезэнзэ коман.

Чачи ковонь вестэ вирев туян,

А неявикс Теште-тикше муян,

Чинь лисемстэ сонзэ ведьс каяса

Ды вечкемам марто човоряса.

Кстыень тансть тозонь каи Вирявась,

Лисьмань ваньксэнть макссы тень Ведявась.

Норовавась шумбрачинть а стувтсы,

Масторавась валдо виенть путсы.

Ойме коштсом кельме веденть эждьса,

Пелевестэ кеченть тонеть венстьса

Ды эськам ёвтасынь озксонь валом,

Конат потсом чинек-венек палыть:

Мон улезан тонь седейсэ ськамом,

Тон учозат эрьва чистэ самом.

Кенярдозат монень, теке Чинтень,

Ды илязт явово минек китне…

                                               1986