ОСВЕНЦИМЕНЬ   ЦЕЦЯТ

                                                 Тетянень

Ульнесь кизэ, но а пижельть чувттнэ.

Мик нармунтнеяк эзть бажа тезэнь.

Чемениязь пупиця пшти уськтне

Прок кершизь рунгом, пезнасть оймезэм.

Те модась валнозь ломанень верьсэ,

Тей сакшнось куломась покш эскелькссэ.

Секс цецятне якстердить верь байгекс

Чатьмониця калмопрятнень велькссэ...

                         ***

Мольтяно састо келей коридорга,

Каршозонок - кавто пельга - сельмть.

Нусманят сынь ды потмакстомо домкат,

Кевкстнить, учить... Эйсэст сядот мельть!

Наразень прят, панарт, раужо-киксэвть...

Зяро ойметь лепамсть неть стенатнесэ!

Ва, каятотсь: «Цёрынем, вечкевиксэм!»

…Чувтомсь авась... Чувтоминек минь весе.

                        ***

.. .Цёрыненть таго фашисттнэ вешнить.

«Косо те юден левксэсь?!» - маряви.

Но сонзэ бараксто баракс кекшнить:

Седей псись душманнэнь а керяви.

Киксэв сулейть стясть лавтовдо лавтовс:

Кинь тесэ куломась ней лепштясы?

«Юден» валось локшокс кери кавтов,

Но кияк цёрыненть а ёвтасы.

…Ютасть иеть. Кассь цёрынесь покшсто.

Но фашизмась эзь стувтовт кодамо.

Итальянонь сех кезэрень ошсто

Освенцимев сась сон сюконямо.

Сонзэ вакссо эйдезэ Джованни

А чарькоди, мекс чувтомсь тетязо,

Мекс истя нусманя сельмсэ ванны,

Ды мештес яла новоли прязо?