***

Вешнинь… якинь васолдо васолга –

Вармань пачк ютынь, пициця толга,

Пшти кев ланга ды домка ведь алга, -

Эзить муеве, малавикс ялга.

Араселить, кува эзинь вешне.

Лия вакссо варматнеде эжнинь,

Лия марто уш стявтокшнынь кудо.

Содан, капшинь, тон илямак сюдо.

Чочконь-чочко те кудонть калавтынь,

Мезем ульнесь, явшинь ды салавтынь.

Пиже веть таго вешнеметь туинь,

Чарькодинь: чаво паксясо нуинь.

Ульнесь модам, ды ведем эзь сато,

Ве тикшине эзь кастово натой.

Коськсь седеем потмаксос тонтеметь.

Ламоксть лиянтень тошксия леметь.

Туинь… Вешнинь… ды муитинь, эрьга.

Толонь пси валовсь сорныця сэрьган!

…Ризксэнь нал ютась комавтозь пряван:

Вакссот лия, мон теть а эряван.

…Моданть ланга те шкас яла якан,

Вармань коволсо вальмазот чакан,

Ламарь ашокс пильгалот певерян…

Сельведь байгекс чамават кеверян…

Эстеньгак мик а кемеви – эрян.