см.Начало

Яков Кулдуркаев.

ЭРЬМЕЗЬ

25

Моли киява, риксэ аварди —

Кудов а капши, ковгак а варшты.

Ютызе истя кинть ве пелькс пензэ —

Пелевидьс пачкодсь. Варштась икелев.

Несы: кинть лангсо уды од цёра,

Уды сёторсо, овтонь он неи —

Алонзо каязь варяв керь паця.

Ламо сядт тувот якить ваксканзо:

Нерьсэст сокарить, ярсыть шоржавдо,

Симить бутрадо.

Кундызе Эрьмезь сонзэ карь прядо,

Ноцковтызе весть ды мери тензэ:

— Тувот орголесть паксянь келесэ,

Туляка левкстнэнь верьгиз керьксынзе.

Стяк седе курок, пурныть ве таркас.

Тувонь ваныцясь а марицякс тейсь,

Удоманзо пачк пейди цимбильсэ.

Кундызе Эрьмезь сонзэ каркс педе

Ды ноцковтызе седе кежевстэ:

— Стяк, нузякс пенге! Оргодть ким лангсто,

А стят — яжатан, тямакакс тейтян:

Ардан лангат мон сядо айгорсо!

Сень каршо ансяк тувонь ваныцясь

Кепедсь пильгензэ ды ве пильгсэнзэ

Удоманзо пачк пейдезь аволдась.

Сокардавсть Эрьмезень пиже кежензэ —

Бутранек-мезнек потсто кепететсть.

Кода кундасы сонзэ мештеде,

Кода сорновтсы тувонь ваныцянть:

— Стяк, оргодть тестэ, каназа верьгиз!

Овтонь карязот пурдыть, кепедить!

Варштак — кияванть арды азорот.

Кодазь кшнань локшо гуень кондямо

Вешки кедьсэнзэ…

26

Эзь кенерть Эрьмезь валонзо прядмо —

Сяткокс ёртототсь тувонь ваныцясь,

Кармась чарамо, кундась прязонзо.

Варштась ве ёнов, варштась омбоцев —

Сась ойме тензэ, кармась пейдеме:

— Скирдымик, эрзя, козонь эряви!

Тандадынь, ёвтан — мон а сёпсаяк.

Монь азородон кие а пели?

Сонзэ лемезэ шайтян Пурейша.

Эрьва чи эйсэнь кери локшосо,

Арсян, эйстэнзэ кода оргодемс…

Мелем мольсь ванозь тувонь жабарданть.

Мездеяк андозь сынь а пешкедить:

Вачо ковсто прасть, потсост кевть солыть.

Эйстэст налкстатат, пекетькак пии!..

Оргодинь эйстэст чияк салава,

Мадинь ки чирес, меринь мадемстэ:

«Кадык пильгень трокс кияк пупорди,

Теи пейдемат, озы ваксозон —

Ёвтнеса тензэ берянь эрямом,

Певердьсынь весе таштазь сельведень».

27

А кеми Эрьмезь. Поты эйстэнзэ.

Озась ве ёнов, ваны ве сельмсэ.

Сон талайс ваннось цёранть сельмева.

Кармась кемеме — седе малав айгсь.

Ды сонськак мейле ёвтнизе тензэ,

Седеень кирдезь, берянь тевензэ.

— Вай, а парт теветь, — мери ваныцясь, —

Манинзить, цёра, ёжов Пурейша:

Оршазь-карязь сон совсесь кургозот,

Пулот алга ведь салавинька валсь.

Ней сон тонь лангсо талай пеели,

Раки, кеверькшни киякс куншкасо.

Опкан кургонзо латякарькс тетькси.

Пек иля янксе: теветь витевикст,

Ансяк маштт сень кис питнень максомо.

Мезе алтат тень? Ярьга, ёвтыка.

— Кудосо ули, сисем кенкш экшсэ,

Паро айгором — виде чувтс кузи…

Сень тонеть максса.

— Кадык эстеть сень, ардтнек лангсонзо:

Пелян айгордот… Эйстэнь тандады —

Туи ардомо, нулан певерить.

Мезеяк лия монень алтака.

— Каськасо улить колмо чакшт сырнень.

Весе сявордсынь каргоць элезэть.

Ловныть, урядыть ды эряк — морак.

— Мезекс сырнетне монень маштовить?

Ловомосткак мон парсте а маштан,

Косояк китькак мартост чавсамизь.

Алтака монень мезеяк лия…

28

Чаракадсь Эрьмезь: алтамс а мезе…

Кары прясонзо, вешни зепканзо —

Мезеяк эзь муй ды мери тензэ:

— Тетянь кудосо ули сазором:

Тевень теймеде цёлак мотолока,

Касы вейкинекс, машты кольнеме,

Яки чоледезь, моры ськамонзо.

Карминдеряй сон моронь морамо —

Вирень цёковтнэнь сельмест конявить,

Кундатыть келест цёк-цёк меремстэ.

Саиндерясы кияк никс сонзэ —

Ойми седейзэ куломазонзо,

Карми рангомо тевень теемстэ.

Улиндеряй тонь мелеть се ланга,

Нулат ёртовтсынь, эрзякс оршатан —

Невтьса сазором. Тук мелезэнзэ.

Сайтян тетянень, невттян аванень —

Авардть икелест… Сайсак сазором.

Валдомсть сельмензэ тувонь ваныцянть,

Содов чамазо кирвазсь чилисьмакс.

Ландясь масторов, кавто карь прянзо

Карькссэ онкстинзе, рикстедсь пильгсэнзэ —

Чувтонь сэрь кирнявтсь, кармась киштеме.

Кишти ськамонзо чаво паксясо —

Чаракадсь вармась, чары перьканзо,

Нилесядт даволт якить мельганзо,

Кеверить нулат сонзэ эйстэнзэ.

Истя киштезь сон эсь оршамонзо

Кайсинзе курок Эрьмезь икелев

Ды ноцковтызе сумань ожадо:

— Кайсить весе лангстот оршамот,

Оршитя нулатнень-валатнень.

Максан локшине, максан а покшке,

Раужо чеерень пулошка.

Ва иля удо мекев самозон!

Кармат нувсеме — скирдык вежаськеть,

Кармат сутяммо — сускик покш сурот.

Пельть сех пек кизыря туводонть:

Се аволь туво — ведун кочкаря,

Монень сон патякс сави…

Мазый цёрань кис

Сон эсь мирдензэ веньперть повизе,

Эсь эйкакшонзо валскес сэвизе.

Мон ялаксозан, монь Дыдай лемем.

Сонзэ экшстэ мон локшонть салыя,

Теке локшосонть тувокс теия.

Кадык сокари ведун кочкарясь,

Кадык эстензэ ней калмо чуви!

Ней молян теветь парсте якавтсынь.

Велявтындеряйть теветь а парсте,

Нолдан вейке нал вишка сардошка —

Таргик локшинеть, локштядть эйсэнзэ.

Нолдан омбоце — салмуксонь эчксэ,

Сестэ кавксть локштядть.

Нолдан колмоце — чова эскешка,

Локштяек сестэ кедеть сэредемс.

Озась ваныцясь крандаз потмаксос,

Велявтынзе сон мекев айгортнэнь —

Ды голдорк ансяк сельгень прамс пачкодсь!

К и з ы р я — стядо черь.

Продолжение 8