ЭРЗИАНА эрзянский литературный сайт

ПРЯКСЛОПА
Категории раздела
Мои статьи [331]
Стихи [571]
КАВТО ВАЛСО
Статистика
Главная » Статьи » Стихи

Иван Николаевич Прончатов. Панжадо вальма лангс озадо...

***

                                           Р. П.

Панжадо вальма лангс озадо,

Цють пейдезь лангозон ванат...

Ашо сёлмсо лапиця садокс,

Тон тейтерьксчисэнть сэрьс ёнат.

 

Ванат весёласто лангозон,

Ды те шкастонть, маряви тень,

Прок те а тон —

нармунь те озась

Нуриця тарадонь пентень.

 

Прок сон чилисемань масторсто

Косто-бути те таркав сась,

Мазыйде мазый вайгель соркссо

Монень эсь моронзо морась.

 

Прок сон эсь мельганзо ливтямо

Терди сеть лугатнень куншкас,

Косо зярдо-бути чиньстямокс

Ютась эсень од цёрань шкась.

 

Косо апак мелявто эрязь,

Тештеде тыц пештязь ветнень

Светсэнть сехте вадря тейтеренть

Салава янтнэва ветнинь.

 

Косо сонзэ тейтерьксчинь садсто

Бажинь васень-умарь саламс

Ды тыщат вечкицятнень ладсо

Апак палсе турвас паламс.

 

А сон, кутмордамостон менезь,

Вейсэнь мелявксос шутка тейсь:

Ношкстась килейтнень юткс кекшеме

Ды сонсь велявтокшнось килейкс.

 

Ды стяко мон эрьва килеенть

Лацинь ды энялдынь:

вельмек!

Вейкеськак эсе макст вайгеленть,

Прок весень чавинзе кельме.

 

Ды мон сюдыя эсь од порам,

Ков неить сельмем — тов туинь.

Эстень каргонь лужаня моро

Оякс кинь печтямо муинь.

 

Ды секс талакадынь певтеме,

Зярдо каршон сельметь варштасть.

Прок те умок ёмазь вечкемам

Монень зорянь масторсто сась.

 

Панжадо вальма лангс озадо,

Цють пейдезь лангозон ванат.

Ашо сёлмсо лапиця садокс,

Тон тейтерьксчисэть сэрьс ёнат!

 

Категория: Стихи | Добавил: tati (20.07.2010)
Просмотров: 495 | Рейтинг: 0.0/0 |
Всего комментариев: 0
Имя *:
Email *:
Код *:
...ERZINFORM
ОД СЁРМАДКСТ
[31.10.2010][Стихи]
Александр Арапов. К... (0)
[24.01.2010][Мои статьи]
Художники в СССР. Из... (0)
[21.10.2010][Стихи]
Исланкин Юрий Иванов... (0)
[21.10.2010][Стихи]
Исланкин Юрий Иванов... (0)
[21.10.2010][Мои статьи]
Исланкин Юрий Иванов... (0)
ВЕШНЕК
ЛОПАНТЬ ЯЛГАНЗО
  • Официальный блог
  • Сообщество uCoz
  • FAQ по системе
  • Инструкции для uCoz

  • Copyright MyCorp © 2017
    Сделать бесплатный сайт с uCoz