ЛЕДСТНЕМАТ АВАДОН
 

Моданть ланга умок а якат,

Шкань тарвазтнэ пингеть керить...

Ансяк, тиряй, тонь шержей тякат,

Эйсэть ледстнезь, яла эрить.
 

Тонеть сюкпря эрьванть седейсэ

Вельмекшни апак терде, сонсь.

Сти лембе валдо сонзэ эйстэ,

Кодамокс, авай, ульнить тонсь.
 

Мои мартост вейсэ меште потсон

Тонеть седей валон макссынь.

Кадык икелеть парсей коцтонь

Чевте янокс ацавить сынь.
 

Теевлить яннэванть шождасто,

Кода зярдо-бути, эскелькст,

Неевлить-марявлить мельшкасто:

Пильгеть эждить чинь сырнень пелькст.
 

Кадык пилезэть валон пракшныть,

Кадык сынь истя эждить тонь,

Кода од пингестэть эждекшнить

Гай эйкакшчинь иетнень монь.
 

Сормсевкст некшнинек минь чамастот:

Печтязь аволь шожда иеть.

Эйкакшот туртов вечкемастот

Венстевиль тонь оймевиеть.
 

Секс, тевс кедьвиест путозь-кадозь,

Тиряст вечкеманть пингтнень перть

Эсь оймесэст, седейсэст кандозь,

Эрить нуцькат, цёрат, тейтерть.